Në seancën e sotme të Kuvendit të Kosovës është debatuar për tensionet që kanë kapluar veriun e vendit në ditët e fundit.
Kryeministri Albin Kurti, në fjalimin e tij në kuvend, tha se vendimi për hyrjen në ndërtesat e komunave në veri të vendit në shoqërim të policisë nuk ishte politik.
Ai theksoi se ky vendim është marrë për shkak të mundësisë që kryetarët e komunave të sulmohen.
“Në këtë pikë, më duhet të theksoj se shoqërimi i kryetarëve të rinj me forcat e sigurisë, është vlerësim i institucioneve të sigurisë, të cilët vlerësojnë shkallën e rrezikshmërisë, pra, nuk është vendim politik, por unë si kryeministër e mbështes këtë. Edhe atëherë, edhe sot. Kanë vlerësuar drejt dhe në ditët në vijim u dëshmua që kanë vlerësuar drejt”, u shpreh Kurti.
Duke theksuar se Policia e Kosovës ka marrë nën kontroll vetëm një ndërtesë që është pronësi e Republikës së Kosovës, Kurti tha:
“Po e them këtë, sepse të shumtë janë ata të cilët praninë e forcave të policisë e kanë quajtur si hyrje me forcë në ndërtesë. Nuk ka nevojë ta quajmë hyrje me forcë në ndërtesë, sepse ajo ndërtesë është e Republikës së Kosovës. Nuk hyn policia me forcë në ndërtesë të vet. Nuk hyn kryetari i komunës me forcë në ndërtesë të vet. Ajo është zyra e tij. Unë nuk mund t’i mbyll sytë kur grupe kriminale të llojit fashist-paramilitar kërcënojnë rendin kushtetues e ligjor të Republikës. Jam i vetëdijshëm që jo të gjithë ata që po marrin pjesë në grumbullimet përpara objekteve janë pjesë e grupeve të tilla, por, fatkeqësisht, shumë qytetarë serb për shkak të presionit e kërcënimit të Beogradit zyrtar janë të detyruar të shërbejnë si mburojë njerëzore për sulmet e grupeve të tilla kriminale”.
Kryeministri Albin Kurti deklaroi se është për normalizim të situatës, por jo para arrestimit të bandave kriminale. Sipas tij, zvogëlimi i pjesëtarëve të njësisë speciale në veri të Kosovës do të ndodhë, por kërkon punë.
Në debatin parlamentar për situatën në veri, shefi i ekzekutivit u shpreh se policët janë në ndërtesa të komunës, për shkak se jashtë ka banda kriminale.
“Unë jam për një situatë normale, ku edhe nëpër komunat në veri të Kosovës nuk ka më shumë policë sesa në komunat tjera. Mirëpo, ka punë të arrijmë në atë pikë. Një herë duhet të largohen për në Serbi, ose të arrestohen në Kosovë, ose edhe nga forcat ndërkombëtare, sepse mund të kenë shkuar edhe në vende të treta. Ata ekstremistë nacional-shovinistë kriminelë të strukturave ilegale e paralele. Pra, një herë ata duhet të largohen ose të burgosen, e vetëm më pastaj ne mund ta konsiderojmë seriozisht zvogëlimin e njësisë speciale dhe pjesëtarëve të saj në komuna drejt normalizimit të plotë”, tha Kurti.
Kurti u shpreh se nuk mund të tolerohen protestat me thirrje për vrasje e sulmeve nga policëve.
“Në bazë të sondazheve që janë organizuar nga institucionet ndërkombëtare, mbështetja për Listën Serbe ka rënë në shtatë për qind. Pra, njëmend dalja ka qenë e ultë, por historikisht rejtingun më të ultë kurrë se ka pasur Lista Serbe. Çfarë tregon kjo? Kjo tregon që situata është e pjekur për parti të reja serbe. Edhe unë besoj që kjo duhet të ndodhë. Duhet të lindin parti të reja serbe. Edhe ato ekzistueset nuk duhet të jenë më nën tutelin e Beogradit dhe Listës Serbe. Asisoj kemi pluralizëm politik dhe kemi kampanjë fer”, përfundoi Kurti
Ai gjithashtu shtoi se protestuesit në veri të Kosovës nuk janë për zgjedhje të reja lokale, duke theksuar se pushteti në Kosovë nuk mund të merret me sulme dhe granata por vetëm me zgjedhje.
Kreu i Partisë Demokratike të Kosovës (PDK), Memli Krasniqi, nga ana e tij, duke e kritikuar kryeministrin Kurti se bën veprime pa u kordinuar me partnerët ndërkombëtar për veriun e vendit, deklaroi: “Për herë të parë na ke sjellë në një situatë të na dënojë publikisht sekretari amerikan i shtetit. Jo vetëm ai, por ai është më i rëndësishmi sepse raporti ynë me SHBA-në është i shenjtë. Nuk të lejojmë ta rrezikosh atë sepse është i shenjtë”.
Ndërkaq, Kreu i Lidhjes Demokratike (LDK), Lumir Abdixhiku, theksoi se Kosova nuk mund t’i realizojë as të drejtat e saj pa koordinim me aleatët e saj në perëndim.
“Jo vetëm pa aleat, por me aleat qartazi kundër nesh, vendi ynë nuk ka gjasë të shtrojë as sovranitetin, as integritetin, as stabilitetin. Vendi ynë ka gjasë të humbasë edhe aleatët, edhe sovranitetin; dhe në këtë rrugë po na dërgon Albin Kurti sot; edhe pa aleatë, edhe pa sovranitet”, tha Abdixhiku.
