Shqipëria dhe Italia forcuan edhe më tej partneritetin në fusha të rëndësishme, me shkëmbimin e një sërë marrëveshjesh dhe memorandumesh mirëkuptimi, në kuadër të mbledhjes së parë ndërqeveritare mes vendeve të mbajtur në Romë.
Në përfundim të mbledhjes së parë të përbashkët midis qeverisë shqiptare dhe asaj italiane, Kryeministri i Shqipërisë, z. Edi Rama, dhe Kryeministrja e Italisë, znj. Giorgia Meloni, vlerësuan këtë moment si një ditë historike që shënon një etapë të re në marrëdhëniet dypalëshe dhe në forcimin e partneritetit strategjik mes dy vendeve.
Forcimi i partneritetit strategjik
Kryeministri Rama theksoi se për herë të parë, dy qeveritë ulen për të diskutuar projekte konkrete dhe për të ndërtuar së bashku të ardhmen e përbashkët, duke bërë një bilanc të marrëdhënieve ekzistuese dhe duke hedhur bazat për bashkëpunim të zgjeruar në fusha të ndryshme.
Rama vlerësoi mbështetjen e Italisë në çdo etapë të marrëdhënieve ndërqeveritare dhe theksoi se me këtë qeveri italiane, “dëshira për të bërë më shumë është shndërruar në realitet”. Ai falënderoi ministrat italianë për angazhimin e tyre konkret në fusha si mbrojtja, ekonomia dhe diplomacia, duke përmendur veçanërisht kontributin e ministrit Guido Crosetto dhe ministrit të Jashtëm Antonio Tajani.
Kryeministri shqiptar nënvizoi gjithashtu rëndësinë e bashkëpunimit në forcimin e aftësive të mbrojtjes së përbashkët, si dhe rolin strategjik të Korridorit VIII, projekt që ka marrë një ritëm të përshpejtuar falë ndërmjetësimit të palës italiane.
Një tjetër arritje e theksuar nga Rama ishte marrëveshja për njohjen e pensioneve për shtetasit shqiptarë që kanë punuar dhe paguar kontribute në Itali, një hap i rëndësishëm social që lidhet ngushtë me kujdesin e treguar personalisht nga Kryeministrja Meloni.
Një kapitull i ri bashkëpunimi
Nga ana e saj, Kryeministrja Meloni e cilësoi mbledhjen si historike, jo vetëm për formatin e saj të paprecedentë, por edhe për sasinë dhe cilësinë e marrëveshjeve të nënshkruara midis dy qeverive.
Ajo theksoi se marrëdhëniet mes Italisë dhe Shqipërisë kanë rrënjë të thella dhe të qëndrueshme, duke reflektuar një miqësi që shkon përtej interesave reciproke. Meloni nënvizoi emocionin që solli takimi i përbashkët i të dy kabineteve, ku ministrat shqiptarë morën fjalën në italisht, si dëshmi e afërsisë kulturore e historike mes dy vendeve.
Bashkëpunimi ekonomik dhe infrastrukturor
Meloni theksoi se Italia është partneri kryesor tregtar i Shqipërisë, me mbi 3,000 kompani italiane që veprojnë në territorin shqiptar. Ajo paralajmëroi krijimin e një Forumi Ekonomik Dypalësh, që do të zhvillohet brenda gjashtë muajve, për të forcuar lidhjet ndërmjet sipërmarrjeve të dy vendeve.
Në fjalën e saj, ajo vuri theksin te energji, transporti dhe Korridori VIII, duke e cilësuar atë si një rrugë strategjike që lidh brigjet e Adriatikut me Ballkanin dhe Europën Juglindore. Ky projekt, tha Meloni, do të sjellë mirëqenie, zhvillim dhe siguri energjetike, jo vetëm për Italinë e Shqipërinë, por për të gjithë rajonin europian.
Të dy krerët e qeverive riafirmuan angazhimin për bashkëpunim të ngushtë në çështjet ndërkombëtare, përfshirë zhvillimet në Ukrainë, Lindjen e Mesme dhe çështje të tjera globale që prekin paqen dhe stabilitetin ndërkombëtar. Meloni nënvizoi se marrëveshjet e nënshkruara mbulojnë fusha të gjera — nga siguria dhe financat deri te integrimi ekonomik dhe politik.
Shqipëri – Itali, 15 marrëveshje dhe memorandume bashkëpunimi
Marrëveshjet që u shkëmbyen sot nga ministrat respektivë të kabineteve qeveritare mbulojnë një gamë të gjerë fushash strategjike.
- Memorandum mirëkuptimi për bashkëpunimin mbi sigurinë kibernetike;
- Marrëveshje ndërqeveritare në lidhje me koncesionin e një huaje ndihme për mbështetjen e krijimit të një sistemi të mbrojtjes civile shqiptare;
- Marrëveshje ekzekutive për nismën kundrejt përforcimit të aftësive të mbrojtjes civile në Shqipëri;
- Marrëveshje për realizimin e projektit në mbështetje të neonatologjisë, në mbrojtje të fëmijëve dhe nënave;
- Memorandum mirëkuptimi operativ kundër trafikut të drogës;
- Marrëveshje për bashkëpunimin në sektorin e mbrojtjes;
- Memorandum mirëkuptimi mes fondacionit MAXXI, Muzeu Kombëtar i Arteve i Shekullit XXI dhe Galeria Kombëtare e Arteve e Republikës së Shqipërisë;
- Protokoll mirëkuptimi për bashkëpunimin në fushën e mbrojtjes civile;
- Marrëveshje teknike për dorëzimin e dy motovedetave të Guardia Costiera italiane për Forcën Detare Bregdetare Shqiptare;
- Deklaratë mirëkuptimi mes departamentit të Mbrojtjes Civile Italiane dhe Agjencisë Kombëtare të Mbrojtjes Civile shqiptare dhe Agjencisë Italiane për Bashkëpunim dhe Zhvillim, zyra e Tiranës;
- Marrëveshje financiare mes Cassa Depositi e Prestiti SpA dhe Këshillit të Ministrave të Republikës së Shqipërisë, për përmirësimin e rrjetit të transmetimit të energjisë eklektike në Shqipërinë veriore, pas tërmetit të vitit 2019;
- Memorandum mirëkuptimi me Cassa Depositi e Prestiti SpA dhe Ministria e Financave të Republikës së Shqipërisë;
- Memorandum mirëkuptimi me Simest SpA dhe Agjencisë për Zhvillimin e Investimeve Shqiptare, AIDA;
- Memorandum mirëkuptimi mes Fincantieri dhe KAYO, memorandum paraprak përpara krijimit të joint ventures për punimet në kantieret e Pashalimanit;
- Memorandum mirëkuptimi mes Leonardo SpA dhe KAYO.
/Argumentum.al
