Ministria e Shëndetësisë ka përditësuar të dhënat e fundit në lidhje me pandeminë globale të COVID-19. Sipas saj, në 24 orët e fundit kanë rezultuar pozitivë 18 raste, ndërsa në total numri I të infektuarve ka shkuar në 277 persona.
Ndërkohë një tjetër pacient 78-vjeçar nga Durrësi ka ndërruar jetë si pasojë e COVID-19 duke e çuar numrin e viktimave në Shqipëri në 16. Lajmi u bë i ditur nga specialistja e ISHP-së, Rovena Daja. Në mesin e të infektuarve janë edhe tëtë fëmijë, ndërsa mosha mesatare e të prekurve nga coronavirus sipas ministrisë së Shëndetësisë është 50 vjeç.
“Në vijim të komunikimit të përditshëm, Ju bëjmë me dije se vazhdon puna në terren për identifikimin e rasteve të reja dhe gjurmimin e kontakteve të rasteve të konfirmuara pozitive. Epidemiologët në çdo njësi vendore të kujdesit shëndetësor nga veriu në jug, janë në terren dhe po bëjnë një punë të jashtëzakonshme për të identifikuar në kohë kontaktet, pas verifikimit të rasteve të dyshuara. Ju bëjmë me dije se mëngjesin e sotëm ka ndërruar jetë një pacient 78- vjeçar nga Durrësi i konfirmuar me COVID-19. 78-vjecari ishte në gjendje të rëndë, i intubuar prej 3 ditësh dhe pavarësisht përpjekjeve të stafit mjekësor fatkeqësisht nuk arriti të mbijetojë. Ministria e Shëndetësisë dhe Mbrotjes Sociale i shpreh ngushëllimet familjes së të ndjerit. Deri tani janë 16 persona që kanë ndërrur jetë nga COVID-19 në Shqipëri. Në 24 orët e fundit janë testuar 96 persona të dyshuar, prej të cilëve janë konfirmuar 18 raste të reja me COVID-19. Deri në këto momente janë testuar 1919 raste të dyshuara dhe prej tyre janë të konfirmuar pozitivë me COVID-19, 277 raste, nga të cilët vetëm 8 janë femijë. Mosha mesatare e rasteve pozitve me COVID-19 është 50 vjeç. Lajmi i mirë është që gjatë 24 orëve të fundit kemi 9 pacientë të shëruar duke e çuar numrin e të shëruarve nga COVID-19 në 76”,tha zonja Daja.
Gjithashtu specialistja e ISHP-së theksoi se aktualisht në Spitalin Infektiv në QSUT dhe në spitalin COVID 2 “Shefqet Ndroqi” janë të shtruar 81 persona, 8 prej tyre në terapi intensive. Lajmi i mirë është që 9 persona të personelit mjekësor kanë rezultuar negativë, pas testeve të kryera sipas protokollit që parashikon OBSH-ja.
“Sot janë testuar edhe 9 personel shëndetësor të cilët kanë rezultuar negativë.Në shërbimin infektiv aktualisht janë 81 të shtruar. 8 prej tyre janë në terapi intensive ndërsa 4 nga këta janë të intubuar. Pjesa tjetër e të shtruarve në pavion janë në gjendje të stabilizuar deri në këto momente. Ndërkohë në spitalin COVID 2 “Shefqet Ndroqi” kemi 1 pacient të shtruar”. shtoi ajo
Harta e qyteteve të prekura nga COVID-19 është shtrirë në 17 qytete, kurse Tirana kryeson për numrin e rasteve të konfirmuara. Ministria e Shëndetësisë ka ftuar qytetarët që në rast se kanë shenja apo simptoma të coronavirus të telefonojnë në numrin 127.
“Harta e të prekurve nga COVID-19 zgjerohet në Tiranë, Durrës, Kavajë, Lezhë, Has, Elbasan, Shkodër dhe Pukë, përveç rasteve të zbuluar për të cilat po kryhet hetimi epidemiologjik dhe ku po punohet me shumë intesitet nga epidemiologët për gjurmimin e kontakteve të rasteve pozitive dhe ndërprerjen e zinxhirit të transmetimit të infeksionit.
Shpërndarja gjeografike e rasteve pozitive, është si vijon:
– Tiranë 143 raste
– Durrës 30 raste
– Lushnje 4 raste
– Elbasan 8 raste
– Fier 23 raste
– Kavajë 6 raste
– Rrogozhinë 2 raste
– Korçë 16 raste
– Vlorë 5 raste
– Shkodër 10 raste
– Lezhë 6 raste
– Berat 1 rast
– Has 8 raste
– Krujë 5 raste
-Tropojë 4 raste
– Pukë 4 raste
– Mirditë 2 raste
Ministria e Shëndetësisë dhe Mbrojtjes Sociale i kërkon qytetarëve të vijojnë të respektojnë masat e distancimit social.
Ministria e Shëndetësisë apelon qytetarët të telefonojnë në numrin 0800 40 40 për përfitimin e barnave me rimbursim dhe cdo pyetje për COVID-19 ndërsa në numrin e urgjencës kombëtare 127 duhet të telefonojnë nëse dyshojnë se kanë shenja të COVID-19.”, shtoi ajo.
