Aktorja e njohur shqiptare dhe shumë e dashur për publikun festoi një ditë më parë 93 vjetorin e lindjes.
Margarita Xhepa është konsideruar si një nga Zonjat e Mëdha të teatrit dhe filmit shqiptar që ka skalitur memorien e publikur shqiptare me role brilante që prej fillimit të saj, në vitet 60 dhe deri më tani.
Në maj të vitit 2004, u rikthye në skenën e Teatrit Kombëtar për të shkëlqyer në dramën “Streha e të harruarve”, një tjetër sukses në karrierën e saj 50-vjecare.
Gjatë karrierës së saj të pasur, Margarita Xhepa interpretoi mbi 150 role në teatër dhe 32 role në kinematografi.
Në vitin 1997, interpretoi në filmin grek “Mirupafshim” (regjisor J. Koras, K. Vupuras). Filmi u laureua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa, Çmimin e Nderit.
Në vitin 2007, aktores iu dha “Çmimi i Karrierës” për rolin e Nadjezhnës në monodramën “Kënga e mjellmës” së Çehovit, ndërsa iu është akorduar gjithashtu edhe titulli “Artiste e Popullit”.
Për ndarjen nga jeta të aktores Xhepa, zyrtarë të lartë dhe politikanë kanë përcjellë mesazhet e tyre të ngushëllimit.
Presidenti i Shqipërisë, Bajram Begaj, shprehu ngushëllime për ndarjen nga jeta të aktores Xhepa.
Sipas Presidencës së Shqipërisë, përmes një mesazhi drejtuar familjes së saj, komunitetit të artistëve dhe mbarë shqiptarëve, Begaj vlerësoi figurën e Margarita Xhepës si artiste, si grua, si nënë, por dhe rolin e saj në shoqëri.
“Me trishtim mësova se Margarita Xhepa, ylli i skenës dhe ekranit shqiptar, u shua sot. Me interpretimet e saj, ku spikati në mishërimin e figurës së gruas dhe veçanërisht të nënës, Margarita Xhepa çoi dritë dhe u bë pjesë e dashur e familjeve shqiptare. Artistja e madhe, një figurë publike e respektuar, grua dhe nënë e nderuar, deri në vitet e fundit të jetës së saj iu kushtua artit”, është shprehur Begaj në mesazhin e tij.
Kryeministri Edi Rama ka reaguar pas ndarjes nga jeta të ikonës së kinematografisë shqiptare, Margarita Xhepa.
“Lamtumirë yll”, shkroi Rama krah disa fotove të hershme të aktores së ndjerë.
Ceremonia e homazheve për nder të aktores Xhepa do të mbahet më 4 prill në Teatrin Kombëtar të Operës dhe Baletit.
/Argumentum.al
