U nënshkrua sot Memorandumi i Bashkëpunimit, midis “Eagle Hills Real Estate Development” shpk, përfaqësuar nga investitori e zhvilluesi me famë botërore Muhammed El Alabbar dhe “Albanian Seaports Development Company”, për realizimin e projektit “Durrës Yachts & Marina”.
Të pranishëm në nënshkrimin e këtij Memorandumi janë kryeministri Edi Rama dhe zv.kryeministrja njëherazi ministre e Infrastrukturës dhe Energjisë, Belinda Balluku.
Ky projekt, i cili mori statusin e investimit strategjik do të zhvillojë e rijetëzojë qytetin e Durrësit, duke ndërtuar një port me kushte moderne dhe luksoze, për të ofruar për herë të parë një lloj të ri turizmi në Shqipëri.
Së bashku me portin, do të ndërtohet një zonë e re rezidenciale si dhe shërbimesh të një turizmi bregdetar elitar. Me këtë projekt, teksa porti tregtar i Durrësit zhvendoset në zonën e Porto Romanos, porti i ri që do të ndërtohet do të përqendrohet vetëm tek turizmi dhe shërbimet e këtij sektori.
Një investim prej 2 miliardë eurosh dhe që ofron 12 mijë vende të reja pune, ndikimi në ekonomi dhe në turizëm pritet të jetë shumë i prekshëm e pozitiv.
Porti i ri turistik i Durrësit e ngre turizmin shqiptar në një nivel të ri, si dhe i përshtatet strategjisë së qeverisë për transportin detar, ku përfshihen shumë plane dhe investime për të përmirësuar infrastrukturën e porteve në vend.
Me portin e ri turistik të Durrësit, dhe portet e reja në Shëngjin, Vlorë e Sarandë, si dhe me portet e reja tregtare, në vitet e ardhshme Shqipëria do të përjetojë rritje ekonomike prej turizmit dhe vendeve të reja të punës që do të krijohen nga këto investime.
Kryeministri e quan këtë investim “portin më të madh turistik të Mesdheut”, duke shtuar se investitori ka një reputacion global të padiskutueshëm.
“Do të ishte e paimagjinueshme, jo 50 vjet përpara, por edhe 5 vjet përpara, që do kishim një investim të tillë në turizëm, në një vend që filloi të zhvillohej si vend me vizion për të qenë konkurrues në turizëm, vetëm kur ne filluam të ushtrojmë detyrën. Kjo është e vërteta,” deklaroi Rama, duke argumentuar se më parë nuk kishte turizëm, vetëm turizëm të brendshëm dhe me qytetarët e Kosovës.
Kryeministri deklaroi se kjo periudhë turistike ka shënuar rritje të jashtëzakonshme, krahasuar me vitet e mëparshme, duke theksuar se n“ë një nga klasifikimet e bëra për rritjen e turizmit në vendet e Mesdheut, Tirana zë vendin e dytë pas Antalias”.
Rama tha se, në portin e ri që do të ndërtohet në Porto Romano, nga kompania holandeze, do të marrë përgjegjësi për kalimin e mallrave, ndërsa vendin e tij e zë porti turistik, ashtu si edhe në shumë qytete të tjera porte të Evropës dhe botës.
Kryeministri kujtoi se kompania “Eagle Hills Real Estate Development” po ndërton edhe një investim madhor buzë lumit në Beograd, duke theksuar se në Shqipëri ky investim do të rrisë eksponencialisht vlerën e pasurisë së të gjithë qytetarëve të Durrësit, si dhe të gjitha hoteleve në të gjithë bregdetin e Durrësit.
“Këtu është fjala për imazhin komplet tjetër që do të ketë Shqipëria turistike në botë”, tha Rama.
Duke ndarë shembullin e portit të Malit të Zi, Kryeministri tha se ishte falë atij investimi që ky vend ka rrogat më të lartë në rajon, si dhe se ky port do të hapë një perspektivë të re, me një investim ku shteti shqiptar do të jetë aksioner e ortak.
“Sot kemi shoqërinë “Eagle Hills” e cila është e njëjta shoqëri e cila administrohet drejtpërdrejt nga zoti Alabbar që ndërton vijën ujore në lumin që përshkon Beogradin, një investim që pati bërë bujë të madhe atëherë, madje na e kanë vënë përpara herë pas here, “shikoni Malin e Zi, shikoni deri në Beograd, ata nuk kanë as det, shiko se çfarë bëhet, ju nuk keni investime”, duke harruar se nga vijnë ata e nga vijmë ne në raportet me turizmi në tërësi. Një vend që e ka pasur detin armik ose zonë të armikut për shekuj dhe pa harruar edhe periudhën e komunizmit. Gjithsesi sot ne jemi në kushtet kur po e nënshkruajmë një protokoll i cili i hap rrugë ligjit, për të konkluduar negociatat për një kontratë që do të jetë një kontratë shembullore e kontrata do të jetë përgjigja më e mirë për të gjithë ata që kanë spekuluar e nuk anë lënë gjë pa thënë për këtë projekt që është një nga projektet që do të ndryshojë jo Durrësin por Shqipërinë përgjithmonë. E tha zoti Alabbar, këtu nuk është e 12 mijë vendeve të reja të punës, vende cilësore. Këtu nuk është çështja e mbi 1000 jahteve që vijnë e që sjellin konsumatorë në Durrës, që do të ngrenë jashtëzakonisht shumë nivelin e konsumit, se kjo është ajo për të cilën ne kemi nevojë, që turizmi ynë të kalojë në një nivel tjetër”, tha Rama.
Investitori Muhammed El Alabbar, duke folur për portin turistik të Durrësit tha se, ne do të krijojmë një gjë kaq të veçantë që kur njerëzit të vijnë, ata të mos duan të largohen kurrë. Këtë jua premtoj.
“Dua të falenderojë qeverinë e Shqipërisë që më dha këtë shans të jashtëzakonshëm. Falenderoj ekipin tim që ka biseduar për një kohë të gjatë, po ashtu dua të falënderojë dhe ekipin e qeverisë dhe mund ta them se nuk ka qenë negociatë e lehtë”, tha ai.
“Ajo çfarë është e jashtëzakonshme është se i ka sjellë kaq pranë Shqipërinë dhe Emirateve Arabe dhe dua të theksoj se Madhëria e tij është i lumtur që jeni në këtë pikë sepse herën e fundit tha se duhet ta përfundojmë këtë gjë. Shpresojmë që është fillesa e bashkëpunimit. Nëse dikush na pyet se për çfarë është e gjitha kjo, është për krijimin e një jete të re. Koha do të provojë për të gjithë se interesi ynë është krijimi i një jete të re. Kjo ka të bëjë me krijimin e një jetë të re me krijimin e besimit në një vend në një qytet. Natyrisht mundësi për kontrata, rritja e turizmit. Por kjo do jetë shumë më tepër se sa mendoni dhe arsyeja është se unë këtë gjë e kam bërë prej vitesh”, theksoi El Alabbar.
Zv/kryeministrja dhe ministre e Infrastrukturës dhe Energjisë, Belinda Balluku në fjalën e saj, u shpreh se “sot më në fund pas një kohe të gjatë, të një negociate të gjatë, e cila daton me shumë se tre vite më parë, dhe Princi i Kurorës së Emirateve të Bashkuara, Muhammed Bin Zayed na e thotë shpesh se kjo ka qenë negociata më e gjatë që ka pasur në historinë e tij si investitor. Kjo tregon se ne kemi qenë një ekip i kujdesshëm për të hedhur hapa të kujdesshëm për t’ju vendosur ju në një bazë të fortë ligjore e cila do ju shërbejë në të ardhmen për të siguruar investimin e rëndësishëm që do të keni në portin e Durrësit”.
Balluku theksoi se investimi është më i madhi i parë ndonjëherë jo në Shqipëri, por dhe në rajon.
“Flitet për 2 miliardë dollarë investim, e cila në të vërtetë është një shifër e konsiderueshme dhe ne kurrë nuk e kemi patur jo në Shqipëri, por dhe në rajon një shifër të tillë të investimit. Ajo çfarë do të sjellë ky investim në rritjen e ekonomisë në mënyrë direkte apo indirekte do jetë akoma dhe më e madhe”, tha ajo.
Balluku shtoi se do preken një sërë fusha, si turizmi, peshkimi gjithashtu, pavarësisht se kemi një zonë ku kemi investuar, por parashikohet që porti i peshkimit të kthehet në një zonë argëtimi ku do të ndërtohen restorante, vende të tjera ku mund të kalohet koha dhe e qytetarëve, dhe e turistëve në mënyrën më të mirë të mundshme.
“Sigurisht, sa i përket ekonomisë, ajo do të pësojë një shpërthim në atë zonë. Jo vetëm për shkak të të gjithë zhvillimit, por sidomos edhe për marinën elitë të jahteve që do ndërtohet aty ku gjendet sot porti i Durrësit”, tha ajo.
Duke folur për ndërtimin e Portit të Durrësit, Balluku theksoi se do ndërtojmë një port modern që do i përgjigjet kërkesave jo vetëm të Shqipërisë por gjithë rajonit.
/Argumentum.al
