Reklamimi i pajisjeve mjekësore do të vihet nën kontroll ndërkohë që do të monitorohet mënyra sesi përçohet informacioni tek konsumatori. Një projektligj që sjell një sërë ndryshimesh në ligjin “Për pajisjet mjekësorë” përcakton saktësisht se cilat janë kushtet që duhet të respektojnë prodhuesit, distributorët e autorizuar apo tregtarët për të reklamuar apo sponsorizuar aktivitete ku bëhet evident publiciteti për pajisje të caktuara mjekësore. Kështu pas nenit 23 është shtuar neni 23/2 për publicitetin ku thuhet se rregullat për pajisjet mjekësore miratohen me urdhër të Ministrit të shëndetësisë dhe Mbrojtjes Sociale, në përputhje me hollësitë e paraqitura në përmbledhjen e karakteristikave të produktit.
“Publiciteti për pajisjet mjekësorë nuk :
a. reklamimin për pajisjet drejtuar personelit të kualifikuar shëndetësor;
b. vizitën nga përfaqësuesit mjekësorë te personeli i kualifikuar shëndetësor, për promovimin e PM;
c. dhurimin e mostrave;
d. sponsorizimin e takimeve promovuese/konferencave që ndiqen nga personeli i kualifikuar shëndetësor, të organizuara në bazë kontratash ligjërisht të rregullta mes palëve.
e. sponsorizimin e kongreseve shkencore që ndiqen nga personeli i kualifikuar shëndetësor, të organizuara në bazë kontratash ligjërisht të rregullta mes palëve.
f. sponsorizimin e pjesëmarrësve në kongrese shkencore që ndiqen nga personeli i kualifikuar shëndetësor;
g. shpalljet faktike, informative dhe materiali i referencës, në lidhje me ndryshimet në paketime, paralajmërimet për efektet negative, si pjesë e masave paraprake të përgjithshme për barnat, katalogët tregtarë dhe listat e çmimeve, me kusht që ato të mos përfshijnë pretendime për barin” thuhet në projektligj.
Nga ana tjetër nënvizohet se subjektet që organizojnë aktivitete sipas përcaktimeve të mësipërme duhet të raportojnë një herë në vit pranë Agjencisë Kombëtare të barnave dhe Pajiseve Mjekësore.
Në pikën pesë të nenit të ri theksohet se reklamimi i pajisjeve mjekësore do të ndalojë çdo informacion që së pari inkurajon pacientët në përdorimin e pajisjes duke zëvendësuar kontrollet dhe trajtimet nga profesionistët. Së dyti sugjeron se shëndeti i subjektit mund të ndikohet nga mospërdorimi i pajisjes mjekësore që është reklamuar. Së treti bazohet në raste të veçanta, duke çuar në një vetëdiagnostikim të gabuar të pacientit apo së katërti në rastet e përfshirjes së pacientit në reklamë është i detyrueshëm konsenti i tij.
Projektligji sjell edhe një sërë ndryshimesh për mënyrën sesi do të bëhet rimbursimi i pajisjeve mjekësore çka përcaktohet me Vendim të Këshillit të Ministrave si dhe vendos për herë të parë që çdo pajisje mjekësore pajiset me certifikatë regjistrimi e cila është e vlefshme për një afat 5 vjeçar nga data e lëshimit./monitor
