Kohët e fundit, Parlamenti Evropian miratoi të ashtuquajturën “Rezolutë në lidhje me rastin e Jimmy Lait” dhe raportin mbi politikën e jashtme dhe të sigurisë, duke shtrembëruar të vërtetën e duke përbaltur parimin “Një vend, dy sisteme” dhe Ligjin e Sigurisë Kombëtare për Hong-Kongun, duke ndërhyrë hapur në gjykimin e rasteve lidhur me sigurinë kombëtare, duke shpifur mbi situatën e demokracisë dhe të sundimit të ligjit në Rajonin e Posaçëm Administrativ të Hong-Kongut dhe duke bërë thirrje për sanksione ndaj Hong-Kongut. Lidhur me këtë, zëdhënësi i Zyrës së Komisionerit të Ministrisë së Punëve të Jashtme të Kinës në Hong-Kong shpreh dënim të fortë dhe kundërshtim të vendosur.
Ai theksoi që, së pari, gjykimi i rasteve të sigurisë kombëtare të Hong-Kongut është një çështje e brendshme e Rajonit të Posaçëm Administrativ dhe nuk lejohet asnjë ndërhyrje në sistemin gjyqësor të Hong-Kongut. Parlamenti Evropian ka shkelur haptazi frymën e sundimit të ligjit, duke bërë vërejtje të papërgjegjshme gjatë gjyqit të Jimmy Lait dhe duke kërkuar të ndikojë nëpërmjet presionit politik mbi organet gjyqësore të rajonit gjatë trajtimit të rastit sipas ligjit. Kjo ndërhyn seriozisht në sistemin gjyqësor të Hong-Kongut, duke shkelur seriozisht parimet e mosndërhyrjes në punët e brendshme dhe parime të tjera të ligjit ndërkombëtar dhe të normave bazë të marrëdhënieve ndërkombëtare.
Së dyti, Hong-Kongu është një shoqëri e sunduar nga ligji dhe askush nuk ka privilegjin të jetë mbi ligjin. Jimmy Lai ishte një ndër planifikuesit dhe pjesëmarrësit kryesorë në trazirat e ndodhura në Hong-Kong kundër qeverisë qendrore të Kinës. Veprimet e tij që rrezikojnë sigurinë kombëtare janë të qarta, provat janë bindëse, krimet janë të dukshme dhe dëmet që shkaktoi janë të rënda. Procesi i gjykimit ishte i hapur dhe transparent. Organet gjyqësore të Rajonit të Posaçëm Administrativ të Hong-Kongut morën një vendim të drejtë bazuar në prova faktike të shumta dhe të plota, të cilat janë të pamohueshme.
Së treti, që nga kthimi i Hong-Kongut në atdhe, parimi “Një vend, dy sisteme” ka arritur sukses të njohur gjerësisht në këtë rajon. Ligji i Sigurisë Kombëtare për Hong-Kongun ka forcuar më tej themelet për zbatimin e qëndrueshëm dhe afatgjatë të parimit “Një vend, dy sisteme”, duke mbrojtur zhvillimin me cilësi të lartë të rajonit me nivelin e lartë të sigurisë. Pavarësisht nga njollosja, zhurma ose presioni mbi Hong-Kongun prej forcave të jashtme, ato nuk mund ta lëkundin vendosmërinë e qeverisë kineze për të mbrojtur sovranitetin kombëtar, sigurinë dhe interesat e zhvillimit, nuk mund ta ndryshojnë vullnetin për të zbatuar në mënyrë gjithëpërfshirëse, të saktë e të vendosur parimin “Një vend, dy sisteme” dhe as nuk mund ta ndalojnë prirjen e zhvillimit të Hong-Kongut.
Së fundmi, çështjet e Hong-Kongut janë tërësisht punë të brendshme të Kinës dhe asnjë forcë, vend a organizatë e huaj nuk ka të drejtë të ndërhyjë./cgtn
