Përfaqësuesi i Përhershëm i Kinës në Kombet e Bashkuara Fu Cong i dërgoi të premten një letër Sekretarit të Përgjithshëm të OKB-së António Guterres, duke shpjeguar qëndrimin e qeverisë kineze në lidhje me komentet e gabuara të kryeministres japoneze Sanae Takaichi ndaj Kinës.
Fu tha që Takaichi bëri provokime të hapur mbi Tajvanin gjatë një seance parlamentare këtë muaj. Ai theksoi se kjo është hera e parë që nga disfata e Japonisë që një udhëheqës japonez promovon zyrtarisht idenë se “një ngjarje e mundshme për Tajvanin është një ngjarje e mundshme edhe për Japoninë”, duke e lidhur atë me ushtrimin e vetëmbrojtjes kolektive; hera e parë që Japonia lë hapur të kuptohet mundësinë e përfshirjes së armatosur në çështjen e Tajvanit, si edhe hera e parë që lëshohet një kërcënim i nënkuptuar ushtarak kundër Kinës, gjë që përbën një sfidë e drejtpërdrejtë ndaj interesave thelbësore të Kinës.
Fu tha që këto komente janë plotësisht të gabuara e shumë të rrezikshme, me një ndikim thellësisht të dëmshëm. Pavarësisht demarsheve të shumta solemne e protestave të forta të Kinës, pala japoneze nuk tregon shenja pendimi e nuk pranon të tërheqë deklaratat e saj të gabuara, tha i dërguari kinez, duke shtuar se Kina shpreh pakënaqësi të fortë dhe e kundërshton me vendosmëri këtë.
Fu vuri të dukje që deklarata e Takaichi-t shkel të drejtën ndërkombëtare dhe normat themelore që rregullojnë marrëdhëniet ndërkombëtare, minon rendin e pasluftës dhe përbën një provokim të hapur ndaj 1.4 miliardë kinezëve dhe kombeve të tjera aziatike, që vuajtën nga agresioni i Japonisë gjatë kohës së luftës.
Ai ritheksoi se Tajvani është një pjesë e pandalshme e Kinës dhe se zgjidhja e çështjes së Tajvanit është punë e brendshme e Kinës. Çdo përpjekje e Japonisë për të ndërhyrë ushtarakisht do të përbënte agresion dhe Kina do të ushtronte me vendosmëri të drejtën e vet të vetëmbrojtjes sipas Kartës së OKB-së dhe ligjit ndërkombëtar, për të mbrojtur sovranitetin dhe integritetin e saj territorial, shtoi Fu.
Ai i kërkoi qeverisë japoneze të reflektojë thellë mbi përgjegjësitë e saj historike, të respektojë angazhimet e saj politike për çështjen e Tajvanit, të ndërpresë menjëherë provokimet dhe të tërheqë komentet e gabuara.
Kjo letër do t’u shpërndahet të gjitha vendeve anëtare të OKB-së si një dokument zyrtar i Asamblesë së Përgjithshme./cgtn
