Besimtarët musliman festojnë Fitër Bajramin, dhe për këtë ditë të shënuar nuk kanë munguar dhe urimet e rastit nga protagonistët politikë në vendin tonë. Kështu, Presidenti Meta, Kryeministri Rama, Kryetari i Partisë Demokratike Lulzim Basha, Ish-kryeministri Berisha, kanë uruar besimtarët shqiptarë për Fiter Bajramin!
Presidenti Ilir Meta ka uruar besimtarët myslimanë për festën e Fitër Bajramit. Meta thotë se suksesi i njeriut qëndron tek forca për të kapërcyer vështirësitë teksa uron besimtarët që zoti t’u pranojë agjërimin.
STATUSI NGA ILIR META:
“GËZUAR FITËR BAJRAMIN!
Sot besimtarët myslimanë kremtojnë përkushtimin dhe sakrificën e Muajit të Madhërueshëm të Ramazanit, muajit të vetëpastrimit shpirtëror, të amnistisë hyjnore dhe solidaritetit njerëzor.
Agjërimi si rit abrahamik, për besimtarët risjell çdo vit nevojën e largimit nga ligësitë që janë pasojë e mospajtimit të arsyes me dëshirat.
Po ashtu Kryeministri Edi Rama uron besimtarët myslimanë festën e Fitër Bajramit me një foto nga xhamia e Et’hem Bej në Tiranë.
Në foto shkruhet se ”Paqja dhe mëshira e Allahut qoftë me ju”.
Kryetari i Partisë Demokratike, përmes një mesazhi në Facebook, shprehet se koha që po kalojmë është plot sprova për shqiptarët.
Mesazhi i plotë i Bashës:
Nga zemra ju uroj të gjithë besimtarëve myslimanë: Gëzuar Fitër Bajramin, festën e madhe të shpresës dhe besimit!
Koha që po kalojmë është plot sprova të mëdha për çdo shqiptar. Mes vështirësive e sfidave, mes sakrificave dhe vuajtjeve, forca e besimit në Zot na mbush me shpresë, na jep siguri se e keqja do të mundet, se e nesërmja do të jetë më e mirë.
Bashkoj lutjet e mija me të gjithë besimtarët, në veçanti për çdo bashkëqytetar në vështirësi e pamundësi, për ata që lëngojnë e kanë nevojë për dritën në fund të tunelit, për prindërit dhe për fëmijët tanë e për mbarë kombin tonë, me këtë sure me titullin kuptimplotë Shndritja:
“Si kur shndrin dielli i mesditës,
Ashtu dhe natën kur terri bie,
Zoti yt nuk të ka braktisur,
As zemëruar me ty nuk është.
Dhe patjetër çfarë po vjen,
Për ty më mirë do të jetë se çfarë po shkon,
Dhe Zoti duarplot do të jetë me ty,
E ti i lumtur”.
Zoti ju dhëntë begati dhe ua pranoftë agjërimin e adhurimet e muajit të bekuar të Ramazanit! Gëzuar Fitër Bajramin!
Zoti e bekoftë Shqipërinë!
Përmes një mesazhi në Facebook, ish-kryeministri Berisha shpreh nderimet e tij të veçanta për të gjithë agjëruesit.
“Urimet më të përzemerta këtë natë Bajrami për të gjithë besimtarët muslimanë. Nderim të veçantë për të gjithë ata që mbyllën sonte me agjërim muajin e madhnueshëm të Ramazanit!”, shkruan ish-kryeministri Sali Berisha.
© Argumentum