SHBA dhe Greqia kanë riafirmuar angazhimin e tyre ndaj të ashtuquajturit “Dialog Strategjik” i nivelit të lartë që është zhvilluar në Selanik midis krerëve të diplomacisë së dy vendeve, si një dëshmi e marrëdhënieve të jashtëzakonshme dypalëshe.
Sa i përket bashkëpunimit rajonal Sekretari amerikan i shtetit Mike Pompeo dhe MPJ të Greqisë Nikos Dendias kanë ndarë gjatë 50 minutave të takimit, pikëpamjet e tyre mbi zhvillimet në Mesdheun Lindor duke ripohuar se çështjet e delimitimit të kufijve detare duhet të zgjidhen në mënyrë paqësore në përputhje me të Drejtën Ndërkombëtare.
Në këtë drejtim, Shtetet e Bashkuara kanë mirëpritur përfundimin e marrëveshjeve të Greqisë me Italinë dhe Egjiptin, si dhe përpjekjen e Athinës për t’u angazhuar me vendet e tjera në rajon në lidhje me kufijtë detare.
Gjithashtu në deklaratën e përbashkët që kanë nënshkruar dy homologet Pompeo dhe Dhendias ritheksohet mbështetja për integrimin e të gjitha vendeve të Ballkanit Perëndimor në institucionet evropiane dhe transatlantike sipas zgjedhjes së shtetasve të tyre dhe është sjellë si shembull përpjekja e Athinës për nënshkrimin e marrëveshjes së Prespës dhe anëtarësimin e Maqedonisë së Veriut në NATO.
Sa i përket energjisë është përgëzuar përfundimi i gazsjellësit Trans-Adriatik dhe janë diskutuar Interconjektori Greqi-Bullgari,Greqi- Maqedonia e Veriut, projektet e njësive të rigazifikimit dhe magazinimit të gazit në Alexandroupoli dhe Kavala. Në këtë aspekt është theksuar pjesëmarrja e shoqërive amerikane si ExxonMobil në partneritet me Total dhe Hellenic Petroleum për kërkimet për gaz natyror në brigjet e Kretës.
Dëshira dhe qëllimi i dy vendeve është shprehur në rritjen e partneritetit strategjik në sektorët e tregtisë, informacionit ,teknologjisë 5G, privatizimit, infrastrukturës strategjike, fushën e mbrojtjes dhe sigurisë dhe bashkëpunimin në luftën kundër terrorizmit.
Pompeo ka zhvilluar edhe një takim me biznesmenë të Greqisë së Veriut të interesuar për investime në fushën e energjisë në rajonin Ballkanik, ndërsa takon të martën kryeministrin grek Mitsotakis në Kretë.
