Partia Socialiste duket se bëri një tërheqje nga kërcënimi se do të miratojë në mënyrë të njëanshme ndryshime në kodin zgjedhor, duke premtuar se do të lërë kohë për dialog me opozitën ndërsa faktori ndërkombëtar duket se u angazhua në masa presioni ndaj kryeministrit Edi Rama.
Në një njoftim për shtyp të publikuar në faqen e kuvendit të martën, bëhet e ditur se kryetari Gramoz Ruçi ka porositur shtyrjen e seancës plenare të 1 tetorit për në 5 tetor. Sipas njoftimit, opozita parlamentare ka kërkuar heqje nga rendi i ditës të nismave për ndryshimin e kodit ligjor, gjë që është pranuar.
“Me porosi të Kryetarit të Kuvendit, z. Gramoz Ruçi, për t’u lënë kohë të mjaftueshme grupeve parlamentare për dialog lidhur me ndryshimet në Kodin Zgjedhor, si dhe komisionit përgjegjës për Çështjet Ligjore, Administratën Publike dhe të Drejtat e Njeriut për shqyrtimin e tyre, seanca plenare e Kuvendit të Shqipërisë, programuar për ditën e enjte, datë 1 tetor, ora 10:00, do të zhvillohet ditën e hënë, datë 5 tetor, ora 10:00,” thuhet në njoftim.
Të hënën në mbrëmje, ambasadori i BE-së në Tiranë Luigi Soreca dhe ajo e SHBA-së Yuri Kim deklaruan publikisht se dëshirojnë që ndryshime në sistemin zgjedhor, si ato të kërkuara nga kryeministri Edi Rama, duket të realizohen vetëm përmes konsultimeve në Këshillin Politik duke i kërkuar Ramës që të respektojë marrëveshjen e 5 qershorit mes palëve kryesore politike parlamentare dhe jashtëparlamentare.
“Ne ripërsërisim qëndrimin tonë se marrëveshja e 5 qershorit duhet të respektohet,” deklaroi Soreca në Tëitter. “Çdo propozim i mëtejshëm për amendime të tjera që shkojnë përtej marrëveshjes duhet të diskutohen siç duhet në kuadër të Këshillit Politik,” shtoi ai.
Edhe ambasadorja Yuri Kim, e cila qershorin e kaluar tërhoqi vëmendjen e medias kur i kërkoi specifikisht kryetarit të PD-së Lulzim Basha të arrijë marrëveshje përmes shprehjes “topi është te Luli Basha”, duket se të hënën ia hoqi topin kryeministrit Edi Rama kur tha se çdo propozim për ndryshim duhet të jetë “në mirëbesim”.
Në veçanti, qëndrimi i Soreca se ndryshimet duhet të kryhen përmes bisedimeve në Këshillin Politik duket se bie ndesh me qëndrimin e Ramës, i cili thotë se parlamenti aktual është një realitet i ri dhe ka fuqi të bëjë ndryshime.
Opozita kryesore u largua nga parlamenti janarin e kaluar dhe filloi protesta në rrugë, në disa raste të dhunshme, deri në pikën kur Shtetet e Bashkuara duket se i kërcënuan të tërhiqen nga protestat e dhunshme ose mund të riklasifikohen si parti jozgjedhore. Që nga ajo kohë, ndërkombëtarët kanë tentuar të mbajnë opozitën jashtëparlamentare dhe maxhorancën të angazhuar në dialog, gjë që u konkretizua këtë janar me krijimin e Këshillit Politik, një grup negocimi ku marrin pjesë si opozita parlamentare ashtu edhe ajo jashtëparlamentare.
Pasi ky këshill arriti një marrëveshje më 5 qershor, kryeministri Edi Rama rihapi lojën duke deklaruar në fillim të korrikut se dëshironte ndryshime kushtetuese për të hequr sistemin e koalicioneve parazgjedhore, një hap që opozita e konsideron si shkelje të marrëveshjes së 5 qershorit.
Negociatat në këshillin politik pritet të rifillojnë më 1 tetor.
