Pasi Jimmy Lai, një ndër planifikuesit dhe pjesëmarrësit e trazirave kundër qeverisë qendrore në Rajonin e Posaçëm Administrativ të Hong-Kongut, u dënua me burgim pas gjykimit për shkeljen e Ligjit të Sigurisë Kombëtare, disa politikanë të huaj bënë deklarata që shtrembërojnë faktet dhe ndërhyjnë në juridiksionin e Rajonit, madje duke kërkuar sanksione kundër gjyqtarëve dhe personelit gjyqësor të Hong-Kongut. Për këtë, profesionistët ligjorë të Hong-Kongut deklaruan se sundimi i ligjit në Hong-Kong ka themel shëndoshë e të vendosur dhe se ata nuk kanë frikë nga asnjë presion i jashtëm.
Në ceremoninë e hapjes së Vitit Ligjor 2026 të Rajonit të Posaçëm Administrativ të Hong-Kongut, Cheung Kui-nung, kryetari i Gjykatës së Apelit Përfundimtar, deklaroi që deklaratat e disa politikanëve të huaj për sanksione të paligjshme kundër gjyqtarëve të Hong-Kongut që trajtojnë raste lidhur me sigurinë kombëtare, përbëjnë “një përpjekje për të ndërhyrë në pavarësinë e gjyqësorit në një mënyrë që bie ndesh me sundimin e ligjit dhe një mjet për të minuar drejtësinë, duke qenë të papranueshme në një shoqëri të qytetëruar të sunduar nga ligji”.
Ceremonia e hapjes së Vitit Ligjor 2026 të Rajonit të Posaçëm Administrativ të Hong-Kongut/Foto nga VCG
Gu Minkang, drejtor i Qendrës për Sigurinë Kombëtare dhe Edukimin Ligjor pranë Universitetit të Edukimit të Hong-Kongut, citoi nenet 85 dhe 88 të Ligjit Themelor të Hong-Kongut, duke theksuar se pavarësia e sistemit gjyqësor është një element thelbësor i sundimit të ligjit në rajon. Sipas tij, gjykatat e Rajonit të Posaçëm Administrativ të Hong-Kongut i përmbahen në mënyrë të rreptë ligjit në trajtimin e rasteve. “Çdo akt që sfidon vijën fundore të ligjit dhe rrezikon sigurinë kombëtare do të ndëshkohet rëndë dhe çdo përpjekje për të mbrojtur kriminelët ose për të ndërhyrë në gjyqësor nuk do të ketë kurrë sukses,” u shpreh ai.
Lidhur me rastin e Jimmy Lait, Ma Yan-kwok, avokat dhe kryetar i Fondacionit të Shkëmbimit Ligjor të Hong-Kongut, theksoi që gjykata e dha vendimin e saj në përputhje me ligjin, duke respektuar plotësisht të drejtat ligjore të Lait. Gjatë gjyqit, gjykata e lejoi atë të pajtonte avokatë për të paraqitur provat e të merrte në pyetje dëshmitarët e prokurorisë sipas ligjit, si edhe u mundësoi Lait dhe të pandehurve të tjerë bashkë me të, që të kërkonin mëshirë, duke mbrojtur si duhet drejtësinë procedurale.
Gjykata e Apelit Përfundimtar e Hong-Kongut/Foto nga VCG
Ma beson se gjykatat dhe gjyqtarët e Hong-Kongut duhet të vazhdojnë të mbështesin traditat e tyre, të mbrojnë pavarësinë e gjyqësorit dhe t’i përmbahen parimit të sundimit të ligjit./cgtn
