Rama me ekipin e negociatave: Në Bruksel të flitet për cilësinë e punës sonë

Në kuadrin e çeljes së negociatave për anëtarësimin e Shqipërisë në Bashkimin Evropian  Kryeministri Edi Rama zhvilloi një takim me ekipin e negociatorëve shqiptarë, të cilët do të punojnë nën drejtimin e Ministres së Shtetit, njëkohësisht Kryenegociatores Majlinda Dhuka.

Në takim merrte pjesë edhe Ministrja për Evropën dhe Punët e Jashtme Olta Xhaçka, si dhe Ministrja e Shtetit, njëkohësisht Kryenegociatore Majlinda Dhuka.

Pasi prezantoi rolin e saj në këtë proces tejet të rëndësishëm për Shqipërinë, Kryeministri Rama kërkoi nga negociatorët angazhimin maksimal në kryerjen e misionit të tyre.

“Unë dua që në Bruksel skuadra shqiptare të krijojë një përshtypje absolutisht pozitive. Dua që në Bruksel të flitet për seriozitetin, të flitet për këmbënguljen, të flitet për kapacitetet dhe të flitet për cilësinë e punës të skuadrës shqiptare”, iu drejtua Kryeministri grupit të negociatorëve.

Duke u ndalur te fillimi i procesit të negociatave, Rama tha se “Ministrja e re e Shtetit, do të ndjekë çdo ditë pa pushim këtë proces, për llogari të qeverisë dhe si përfaqësuese e drejtpërdrejtë e imja, e Kryeministrit, duke garantuar maksimumin e angazhimit dhe duke garantuar edhe maksimumin e koordinimit të të gjithëve ju, në një proces që është jashtëzakonisht sfidues posaçërisht për thellësinë e adresimit të të gjitha problematikave të çdo sektori dhe për thellësinë e koordinimit mes gjithë sektorëve”.

“Është shumë e rëndësishme që angazhimi për procesin të jetë prioriteti absolut i secilit dhe secilës prej jush dhe patjetër edhe i të gjithë atyre që janë nën varësinë tuaj ose që kalojnë tani  nën varësinë e Kryeministrisë, duke udhëhequr në të përditshmen e tyre si staf i ministres së Shtetit për negociatat dhe që është njëkohësisht edhe Kryenegociatorja e Republikës së Shqipërisë. Ky është një ndryshim që e kemi dakordësuar paraprakisht me Ministren për Evropën dhe Punët e Jashtme dhe me Ministren e Shtetit, që do të thotë që e gjithë drejtoria dhe të pesë sektorët që janë pjesë e saj në Ministrinë e Jashtme, tani është koha të kalojë në varësi të drejtpërdrejtë këtu në Kryeministri dhe të administrohet në të përditshmen  e vet nga Ministrja e Shtetit”, theksoi Rama.

Kryeministri Rama informoi se “Ministrja e Shtetit ka kompetencat e të gjithë procesit që lidhet me përthithjen e normativës evropiane në të drejtën kombëtare, patjetër ka dhe detyrimin  e  informimit të vazhdueshëm dhe të qëndrueshëm të parlamentit, por këtu, duke garantuar të gjithë procesin horizontal në komunikim të vazhdueshëm me çdo ministri dhe këtu vjen fokusi tek roli i secilit dhe secilës prej jush. Dua që të jemi shumë të qartë që ju e dini shumë mirë, jam i bindur, por nuk është e tepërt ta përsërisim se në këtë proces intensiteti i punës suaj dhe intensiteti i ndërveprimit me Komisionin Europian, rritet eksponencialisht, pra nuk jemi më në kushtet e një ndërveprimi me intensitetin e deritanishëm”.

Mjafton, vijoi Rama, të kemi parasysh që vizitat tuaja në Bruksel dhe të përfaqësuesve të Komisionit këtu, janë të përjavshme, nuk janë të përdisamuajshme, por janë të përjavshme.

“Dhe është themelore që secila dhe secili prej jush të garantojë me punën, me seriozitetin, me cilësinë e materialeve, me cilësinë e komunikimit dhe të ndërveprimit që Shqipëria të shikohet me respekt në çdo hap. Atë respekt që kemi fituar në aspektin politik, duhet ta fitojmë tani në aspektin teknik”, tha Rama.

Kryeministri Rama theksoi se “pjesën më të madhe tuajën, kam pasur mundësinë t’i njoh, kam pasur mundësinë t’i vlerësoj për cilësitë dhe kam pasur mundësinë ta shikoj edhe në një progres të caktuar, pasi kam parasysh këtu, disa nga zëvendësministrat kanë qenë pjesë e kësaj rruge qysh në krye të herës. Puna juaj ka folur vetë për aq sa ka qenë, por tani volumi i punës është i tillë që sfida është komplet e re. Dhe jo vetëm kaq, por është shumë e rëndësishme që të theksoj këtu se vendosja e kryenegociatores së re, faktikisht nënvizon ndryshimin e natyrës se marrëdhënieve mes nesh dhe Bashkimit Evropian përmes Kryenegociatorit si urë. Ambasadori Mazi bëri një punë shumë të lavdërueshme diplomatike, duke qenë një krah shumë i rëndësishëm në këtë proces, për mua, për Ministren deri në momentin kur u vendos që negociatat të hapen formalisht”.

“Ju e dini shumë mirë se jeni pjesë e kësaj pune që ne nuk kemi pritur hapjen e negociatave për të bërë shumë nga punët që të tjerë i kanë bërë pasi janë hapur negociatat dhe faktikisht kemi një pozicion të avantazhuar për shkak se e kemi bërë një pjesë të madhe të punës që përkon edhe me pjesën e fillimit zyrtar të negociatave, por natyra shumë teknike tani e procesit kërkon pikërisht një profil shumë teknik”, nënvizoi Rama.

Kryenegociatorja Majlinda Dhuka

Ministrja e Shtetit, njëkohësisht Kryenegociatorja Majlinda Dhuka kërkoi sot nga ekipi i negocitorëve, bashkëpunim, shpejtësi, progres dhe rezultat.

Gjatë takimit të zhvilluar nga Kryeministri Edi Rama me ekipin e negociatorëve shqiptarë në kuadër të çeljes së negociatave për anëtarësimin e Shqipërisë në BE, Dhuka tha se “është me përgjegjësi të lartë që e nis detyrën time sot”.

“Të dashur kolegë, ju kërkoj të gjithëve bashkëpunim, shpejtësi, progres, rezultat. Me shumicën prej jush kam punuar edhe më herët, tani kam një motiv më shumë për t’i thelluar marrëdhëniet me ata që nuk kam punuar drejtpërdrejt do të jetë kënaqësi për mua”, theksoi Dhuka.

Ministrja e Shtetit njëkohësisht kryenegociatorja Dhuka tha se “momenti është historik, besimi qe na është dhënë është i veçantë, do t’ju lutesha për bashkëpunim maksimal”.

./ata