Kryeministri i Shqipërisë, Edi Rama, ka vizituar Greqinë, në kuadër të hapjes së ekspozitës me pikturat dhe vepra të tjera artistike të tij, ndërkohë ka realizuar edhe takime pune me zyrtarë të lartë grekë.
Rama është takuar me presidenten e Greqisë, Katerina Sakellaropoulou, homologun e tij, Kyriakos Mitsotakis, kryeparlamentarin grek, Constantine Tassoulas dhe kryediplomatin grek, Nikos Dendias.
Në fjalën e tij në ceremoninë e hapjes së ekspozitës ku të pranishëm ishin edhe Mitsotakis dhe Dendias, Rama theksoi se arti i tij është abstrakt dhe është mjaft demokratik, sipas tij “në kuptimin që i lejon gjithsecilit të mendojë e të shohë gjithë çfarë dëshiron”.
“Jam shumë mirënjohës për këtë pritje të mahnitshme dhe për këtë ngjarje kaq të veçantë. Nuk është ekspozita ime e parë artistike, por është e para herë që vizitoj një vend si kryeministër dhe në çantë nuk mbaj vetëm shënimet, por edhe artin tim”, u shpreh Rama.
Ministri i Jashtëm grek, Nikos Dendias, gjatë fjalës në ceremoninë e hapjes së ekspozitës tha se Shqipërinë e shikojnë si një mike të afërt, duke shtuar se “shpresoj, së shpejti, si pjesë e familjes sonë të përbashkët evropiane”.
Kryeministri Edi Rama u prit gjithashtu në një takim në Athinë nga kryetari i parlamentit grek, Constantine Tassoulas.
Kryeministri Rama shprehu falënderimet për mikpritjen ndërsa u shpreh se është kënaqësi e veçantë që ndodhet sot në Athinë.
Kryeministri vlerësoi se marrëdhëniet mes dy vendeve janë shumë të mira dhe në përmirësim të vazhdueshëm.
“Dëshira e dyanshme për t’i forcuar këto marrëdhënie çdo ditë është shumë e madhe. Dhe baza e këtyre marrëdhënieve janë padyshim dy popujt tanë dhe urat e forta mes nesh janë qoftë me qytetarët grekë që jetojnë në Shqipëri dhe qytetarët shqiptarë që jetojnë në Greqi”, tha Rama.
Nga ana e tij, Tassoulas u shpreh se temë e bisedimeve do të jetë forcimi i marrëdhënieve duke pasur si urë të pakthyeshme minoritetin grek në Shqipëri dhe komunitetin shqiptar në Greqi.
“Në vizitën e fundit të kryeministrit grek në Derviçan, që e shoqërua edhe ju zoti Kryeministër janë thënë fjalë shumë të sakta për progresin e Shqipërisë dhe prosperiteti ne minoritetit grek në Shqipëri dhe për për përshpejtimin europian të vendit tuaj”, tha ai.
Tassoulas vuri në dukje se Greqia festoi dy ditë më parë 20-vjetorin në BE.
“Vetëm nga programet në fushën e bujqësisë në këto 40 vite Greqia fitoi 200 miliardë euro. Me të drejtë vendi juaj synon ecjen drejt BE-së. Me të drejtë vendi ynë mbështet rrugëtimin europian të Shqipërisë. Të dyja vendet tona duke pasur ura lidhëse minoritetin grek në Shqipëri dhe komunitetin shqiptar në Greqi po ecin përpara. Me këto mendime, me konfirmimin dhe duke qenë i sigurt për përmirësimin e marrëdhënieve tona e jetesës së minoritetit grek në Shqipëri dhe të nivelit të jetesës në përgjithësi në Shqipëri ju uroj mirëseardhjen në parlamentin helen. Uroj që organizimi i kujdesshëm i politikës së jashtme të jetë në dobi të dy vendeve tona”, tha ai.
Gjatë vizitës zyrtare në Athinë kryeministri Edi Rama ka zhvilluar një takim edhe me presidenten e vendit Katerina Sakelaropulu, dhe kryeparlamentarin Konstandin Tasulas. Gjatë takimit me presidenten, Rama u shpreh optimist për zgjidhjen e të gjitha çështjeve të lëna pezull. Po ashtu, në takime është theksuar rëndësia e bashkëpunimit mes vendeve si dhe mbështetja në rrugën drejt integrimit.
‘Marrëdhënia e njerëzve të zakonshëm është e shkëlqyer, kjo na ka ndihmuar që ta shihnim njëri tjetrin me sytë e njerëzve të zakonshëm. Jam shumë optimist se pikërisht në këtë klimë do të zgjidhim më së miri të gjitha çështjet e lëna pezull mes dy vendeve. Edhe dakortësia për t’ju drejtuar një pale të tretë për zgjidhjen e detit tregon se jemi në rrugën e duhur për t’i dhënë zgjidhje problemeve.’- u shpreh Rama.
/Argumentum.al
