Kosova mund të mbajë zgjedhje të reja në komunat me shumicë serbe, të tronditura nga protesta të dhunshme, nëse 20% e votuesve nënshkruajnë një peticion duke i kërkuar ato, tha presidentja e Kosovës, Vjosa osmani për agjencinë e lajmeve Reuters.
Në një intervistë ekskluzive në zyrën e saj, presidentja Vjosa Osmani tha se besonte se nënshkrimi i një peticioni, ishte mënyra më “demokratike” për të vazhduar me procesin e mbajtjeve të zgjedhjeve të reja.
“Në këtë mënyrë mendoj se do të siguronim pjesëmarrjen e serbëve sepse kërkesa do të kishte ardhur fillimisht nga ta, pra nga qytetarët”, tha ajo.
Protestat e dhunshme që shpërthyen në katër komuna veriore, pasi Kosova vendosi kryetarë komunash shqiptarë etnikë të cilët u zgjodhën për të drejtuar ato komuna, nga zgjedhjet me një pjesëmarrje prej vetëm 3.5%.
Serbët, të cilët përbëjnë një shumicë në këtë rajon, bojkotuan zgjedhjet lokale.
Presidentja Osmani tha se largimi i kryetarëve të komunave përmes një peticioni me nënshkrime nga votuesit, do të ishte “një lloj referendumi” i cili do të hapte rrugën për një votim të dytë që do të mbahej për zgjedhjen e kryetarëve të rinj. Ajo tha se i gjithë procesi mund të kryhet brenda disa muajsh.
Megjithatë, ishte e paqartë nëse votuesit serbë lokalë do të merrnin pjesë në një peticion.
Serbët në rajonin verior të Kosovës nuk e pranojnë shpalljen e pavarësisë nga Serbia në vitin 2008, pothuajse një dekadë pas përfundimit të një lufte atje, dhe ende e shohin Beogradin si kryeqytetin e tyre.
Ndërsa tensionet mes Serbisë dhe Kosovës po ziejnë, NATO ka përforcuar forcat e saj paqeruajtëse në veri të vendit.
Osmani tha se ajo dëshironte që ato trupa paqeruajtëse të qëndronin derisa Kosova të pranohej në NATO.
‘Mbret dramash’
Osmani tha se para se të shpallen zgjedhjet e reja, Kosovës do t’i nevojiten garancitë nga bashkësia ndërkombëtare se Beogradi nuk do të ndërhyjë.
Serbia mohon akuzat e Kosovës se ka penguar kandidatët serbë të kandidojnë për kryetarë komunash. Ajo mohon gjithashtu pretendimet se demonstruesit që u përleshën me trupat dhe policinë e NATO-s në rajonin verior të Kosovës më 29 maj, ishin dërguar nga Beogradi.
Serbia ende zyrtarisht e konsideron Kosovën si pjesë të territorit të saj. Serbët në veri të Kosovës po kërkojnë më shumë autonomi për rajonin e tyre sipas një marrëveshjeje të vitit 2013 që nuk është zbatuar.
Javën e kaluar, një ndihmës i presidentit të SHBA, Joe Biden, foli me kryeministrin e Kosovës Albin Kurti dhe presidentin serb, Aleksandar Vuçiq, duke e shtyrë Serbinë të tërheqë forcat e armatosura të vendosura pranë kufirit dhe duke u kërkuar protestuesve të jenë paqësorë.
Osmani u takua javën e kaluar me Vuçiqin në një takim të ndërmjetësuar nga presidenti francez Emmanuel Macron dhe kancelari gjerman Olaf Scholz në Moldavi.
Ajo e përshkroi presidentin serb si “një mbret të dramave”.
“Vuçiq në shumicën e takimeve të tij është si një mbret dramash,” tha ajo. “Kështu që ai, natyrisht, u përpoq të krijonte përsëri shumë dramë, por nuk dha ide që do të kontribuonin për paqen dhe stabilitetin në rajon.”
“Pra, atij i pëlqen të pretendojë se po bën lëshime të mëdha, se ka shumë presion mbi të, se po vuan, se është në rrezik dhe të gjitha këto. Por këto lloj zemërimesh, duhet të lihen jashtë dhomës që pas moshës katër vjeç.”
Zyra e Vuçiqit nuk iu përgjigj menjëherë kërkesës së Reuters për koment mbi përshkrimin e Osmanit për takimin./RTK
