Rusia rifillon eksportet e gazit përmes Nord Stream 1

Flukset e gazit rus përmes gazsjellësit Nord Stream 1 rifilluan të enjten pas 10 ditësh mirëmbajtje, sipas agjencisë gjermane të lajmeve dpa.

Gazi po rrjedh përsëri dhe niveli i transportit të gazit përmes Nord Stream 1 ka rifilluar në nivelin e para-mirëmbajtjes, rreth 40 për qind të kapacitetit të transportit të tubacionit, citohet të ketë thënë një zëdhënës i Nord Stream AG.

Megjithatë, ai shtoi se vëllimet e regjistruara gjithashtu mund të ndryshojnë brenda një dite dhe do të duhet pak kohë para se të arrihet kapaciteti i plotë i transportit.

Ndërkohë, Klaus Mueller, shefi i agjencisë federale të rrjetit Bundesnetzagentur, tha të mërkurën në mbrëmje se 30 për qind e kapacitetit maksimal të transportit do të kalonte përmes tubacionit.

Nord Stream 1 transporton 55 miliardë metra kub gaz çdo vit nga Rusia në Gjermani nën Detin Baltik dhe ka qenë jashtë linje që nga 11 korriku.

Kërkesat për rrjedhjen e gazit natyror rus përmes gazsjellësit Nord Stream 1 në Gjermani ishin 29,284,591 kilovat orë në orë për slotin nga 6 deri në 7 të mëngjesit, sipas Reuters, duke cituar të dhënat nga faqja e internetit e operatorit, Nord Stream AG.

Konsorciumi ndërkombëtar i pesë kompanive të mëdha u krijua në 2005 për planifikimin, ndërtimin dhe funksionimin pasues të dy tubacioneve të gazit natyror prej 1224 kilometrash përmes Detit Baltik.

Një zëdhënës i OMV të Austrisë tha se Gazprom sinjalizoi se do të dorëzonte rreth 50 për qind të vëllimeve të dakorduara të gazit të enjten.

Më 14 qershor, Rusia reduktoi flukset e gazit në 40 për qind të kapacitetit përmes tubacionit, duke përmendur vonesën e një turbine të shërbimit në Kanada. Kanadaja ka thënë se kishte lëshuar një leje për kthimin e turbinës, por nuk dihet se kur do të arrijë në Nord Stream.

Perëndimi ka akuzuar Moskën për përdorimin e burimeve të saj energjetike si armë. Megjithatë, Rusia këmbëngul se është një furnizues i besueshëm dhe hedh poshtë pretendimet, duke thënë se duke mbështetur Ukrainën, Perëndimi po bën luftë ekonomike kundër Moskës.

Bashkimi Evropian u tha vendeve anëtare të mërkurën që të ulin përdorimin e gazit me 15 për qind deri në mars, duke paralajmëruar se një mbyllje e plotë e furnizimeve me gaz rus ishte “e mundshme”.

/Argumentum.al