Protestat kundër presidentit Trump arrijnë përmasa të reja. Në më shumë se 2700 qytete qytetaret dhe qytetarët demonstruan nën moton “No Kings” kundër abuzimit me pushtetit, represionit dhe politikës së migracionit.
Në SHBA sërish u zhvilluan protesta në mbarë vendin kundër presidentit Donald Trumpdhe politikës së tij. Nën moton “No Kings” (“Jo mbretër”) të shtunën (18.10.2025) u mblodhën gati shtatë milionë vetë në mbi 2700 qytete, rreth dy milionë më shumë se në protestat e kaluara në qershor, sipas të dhënave të organizatorëve.
Demonstratat u zhvilluan ndër të tjera në Nju Jork, Çikago, San Francisco, Los Angeles, Nju Orleans, por edhe në qytete më të vogla në brendësi të SHBA-së. Në faqen online të lëvizjes, që bashkon rreth 300 organizata, thuhet: “Presidenti beson, se pushteti i tij është absolut. Por në Amerikë ne nuk kemi mbretër.”
Trump: “Unë nuk jam mbret”
Në shumë manifestime pjesëmarrësit mbanin pankarta, në të cilat Trump paraqitej si Jozef Stalin, mbretëresha e Anglisë apo si mbreti i diellit Ludvig i XIV. Shumë në sloganet e tyre bënin thirrje për dorëheqjen e tij, të tjerë kërkonin shkarkimin e policisë së migracionit ICE, që prej muajsh me udhëzimet e Trumpit po vepron kundër migrantëve ilegalë.
Nga ana e republikanëve në prag të demonstratave u tha, se demonstruesit “e urrejnë Amerikën”. Trump tha në televizionin Fox News: “Unë nuk jam mbret.” Njëkohësisht ai i akuzoi demonstruesit se janë të gatshëm të përdorin dhunë. Kryetari i Dhomës së Përfaqësuesve, Mike Johnson, nga republikanët e Trumpit tha, se pret që në protestat “No-Kings” të ketë “mbështetës të Hamasit”, “tipa antifa” dhe “marksistë”.
Protesta paqësore në mbarë vendin
Kundërshtarët e Trumpit e akuzojnë presidentin dhe njerëzit përreth tij, se qëllimisht nxisin përshkallëzimin dhe duan të normalizojnë angazhimin e ushtrisë kundër atyre që mendojnë ndryshe. Disa qytete dhe shtete federale që drejtohen nga demokratët në opozitë në parlamentin e SHBA-së ndërkohë u janë kundërvënë përmes gjykatave vendimeve për mobilizimin e gardë kombëtare në komuna.
Gjatë muajve të fundit ka pasur protesta të vazhdueshme kundër politikës së migracionit gjatë presidencës Trump. Pjesërisht në protesta të tilla ka pasur edhe përplasje me forcat e rendit. Demonstratat masive të së shtunës në mbarë vendin ishin në përgjithësi paqësore. Vetëm në periferi ka pasur përplasje sporadikisht.
Që nga marrja e presidencës në janar janë shtuar protestat kundër Trumpit. Grupime të ndryshme janë organizuar në lëvizjen “No Kings”, por është një sfidë, që të unifikohen kaq shumë organizata me interesa të ndryshme.
Lëvizja “No Kings” i nisi protestat më 14 qershor duke marrë si shkas paradën ushtarake në Uashington me rastin e 250 vjetorit të themelimit të Ushtrisë së SHBA-së, që Trump dëshiroi ta kremtojë pasi përkonte edhe me datëlindjen e tij 79 vjetorin e lindjes./DW
