Ambasadorja amerikane në Shqipëri, Yuri Kim, u ka dërguar një letër krerëve të partive politike duke u kujtuar që janë përgjegjës për personat që emërojnë si kandidatë për deputet në zgjedhjet e ardhshme parlamentare.
“Edhe pse individët janë përgjegjës për të treguar historikun kriminal, krerët e partive duhet të sigurojnë integritetin dhe vërtetësinë e deklarimeve të personave që kërkojnë të zgjidhen nën siglën e partisë së tyre”, thotë Kim në letrën dërguar kryetarëve të partive politike shqiptare.
“Siç e dini, Shtetet e Bashkuara janë të përkushtuara për të luftuar korrupsionin dhe mbështesin këdo që kërkon të ndalojë zyrtarët e korruptuar të veprojnë të pandëshkuar dhe në mënyrë të paligjshme. Ne do të vazhdojmë të ndalojmë hyrjen në vendin tonë të personave të korruptuar, ju mund të keni rolin tuaj në këto përpjekje duke i mbajtur këta persona jashtë listave tuaja”, shton Kim.
Sipas nenit, 7031, seksioni (c) të përmendur nga Ambasadorja Yuri Kim, në një letër drejtuar kryetarëve të partive politike në vend, çdo vit senati amerikan miraton listën e personave që nuk mund të hyjnë dot në SHBA.
Nën ketë nen, deri më sot SHBA-të i kanë hequr të drejtën për të udhëtuar në SHBA, ish-kryeprokurorit Llalla dhe ish-kryebashkiakut Dako.
Ambasadorja Kim, shprehu gjithashtu mbështetjen e SHBA-ve për këdo që angazhohet të dënojë personat e korruptuar:
“SHBA-të janë të angazhuara në luftën ndaj korrupsionit dhe qendrojnë në krah të çdokujt që kërkon të ndalojë dhe të ndëshkojë zyrtarët e korruptuar nga veprimet e paligjshme”.
Gjithashtu ajo i kërkoi kryetarëve të partive politike të kontrollojnë figurën e kandidatëve për deputetë në zgjedhjet e ardhshme.
“Ne inkurajojmë partitë politike të vetojnë kandidatët dhe të përzgjedhin vetëm ata që janë në përputhje me ligjin shqiptarë”, shkruan Yuri Kim në një letër dërguar, kryetarit të PS-së, LSI-së dhe PD-së.
Kim theksoi se ata janë përgjegjësit e vetëm për personat që kandidojnë në siglën e tyre partiake. Ajo i kujtoi politikanëve shqiptarë ligjin e dekriminalizimit përmes të clit deputetët dhe kryebashkikë u larguan nga detyra./h.e
