Shqipëria e Kosova, bashkëfinancim për ndërtimin e linjës hekurudhore Durrës-Prishtinë

Shqipëria dhe Kosova do të nisin punën për studimin e fizibilitetit të projektit për ndërtimin e linjës hekurudhore Durrës-Prishtinë.

Në kuadër të mbledhjes së dy qeverive që po mbahet në Prishtinë, ministrja e Infrastrukturës dhe Energjisë, Belinda Balluku si dhe ministri i Mjedisit, Planifikimit Hapësinor dhe Infrastrukturës, Liburn Aliu bënë të ditur detaje nga marrëveshja sipas së cilës, Shqipëria do të paguajë 1 milion euro, ndërsa Kosova 980 mijë euro për hartimin e projektit.

“Kjo marrëveshje synon përcaktimin dhe ndarjen e kostove. Fondi i përcaktuar për të gjithë projektin është 1 milion e 980 mijë euro, kështu që Shqipëria do të mbulojë 51 % të këtij financimi dhe pjesa tjetër do të mbulohet nga Ministria e Mjedisit Planifikimit Hapësinor dhe Infrastrukturës së Kosovës”, tha ministrja Balluku.

Sipas saj, ky studim tejkalon një projekt infrastrukturor.

“I përket një projekti kombëtar të shumëpritur dhe është pjesë e një projekti të madh, të integruar, që ka të bëjë me ndërtimin e portit të Durrësit dhe integrimin e ndërtimit të kësaj hekurudhe në këtë projekt të madh. Kjo linjë hekurudhore është nisja e një korridori të ri, duke qenë se një nga problematikat që kemi hasur është përjashtimi i Shqipërisë, më shumë se ai i Kosovës, nga korridoret qendrore të Europës, duke dhënë mundësi që ky mjet transporti, shumë efikas, pjesë e axhendës së gjelbër të BE-së, të kthehet në një nga më të rëndësishmit për qytetarët shqiptarë në dy anët e kufirit”, tha Balluku.

Ministri Aliu u shpreh se Kosova do të kërkojë që ky korridor të njihet si pjesë e korridoreve hekurudhore europiane, pasi do të shkurtonte rrugët edhe për portet e tjera të rajonit.

“Linjën hekurudhore që lidh Durrësin me Prishtinën, e që në Prishtinë krijon “portin e thatë të Durrësit”, ne e shohim të rëndësishme në nivel kombëtar. Nga ana tjetër, i shërben edhe zhvillimit ekonomik, pasi rrit kapacitetet e Portit të Durrësit, sepse Prishtina mund të shpërndajë mallrat përmes rrugës hekurudhore në të gjithë rajonin. Është sfidë që të njihet si korridor”, deklaroi ministri.