Ministrja Spiropali, ka bërë të ditur përmes një postimi në rrjetet sociale se Shqipëria do të hapë zyrtarisht bisedimet për pesë kapitujt e Klasterit 5 – “Bujqësia, Kohezioni dhe Burimet” më datë 17 nëntor 2025, duke përmbushur objektivin e shpallur nga qeveria për hapjen e të gjithë kapitujve të negociatave me Bashkimin Europian brenda këtij viti.
“Premtimet marrin kuptim vetëm kur ato mbahen. Kishim premtuar hapjen e të gjithë kapitujve të negociatave brenda vitit 2025. Pak kush e besonte. Por sot, ai që dukej angazhim i pamundur, është bërë realitet,” – shkroi Spiropali në “Facebook”.
Sipas saj, ky moment përfaqëson një fazë historike për Shqipërinë dhe “një gur kilometrik në procesin e anëtarësimit në Bashkimin Europian”, i cili dëshmon se reformat dhe vullneti politik kanë sjellë rezultate konkrete në rrugën drejt integrimit.
Në të njëjtën linjë reagoi edhe Kryeministri Edi Rama, i cili përmes një postimi në “Facebook” e cilësoi këtë zhvillim si një rekord absolut në procesin e integrimit europian:
“Asgjë nuk na ndal dot drejt majës së Shqipërisë 2030 në BE. Shqipëria e arriti të pamendueshmen – të gjithë kapitujt e negociatave të hapur brenda 12 muajsh. Askush nuk na ndal dot drejt objektivit madhor të mbylljes së negociatave brenda vitit 2027,” – shkroi Rama.
Kryeministri theksoi gjithashtu se gjatë këtij procesi vendi po njeh përmirësime të vazhdueshme në ekonomi dhe standardet e jetesës:
“Ne po e rrisim dhe po e forcojmë muaj pas muaji Shqipërinë, me ekonomi që po rritet, me pensione e paga që po rriten, me investime të brendshme e të huaja që po rriten, pa rritur asnjë taksë dhe duke përmirësuar hap pas hapi punën e institucioneve.”
/Argumentum.al
