Ndonëse Kryeministri Rama lajmëroi në korrik të këtij viti se tashmë “Ballkani i Hapur” e ka përmbyllur misionin e tij duke ia lënë vendin “Procesit të Berlinit”, në fakt ende Shqipëria nuk po heq dorë nga “Ballkani i Hapur”.
“Procesi i Berlinit është tani më aksi ynë kryesor. “Ballkani i Hapur” ishte një iniciativë e cila lindi nga nevoja për ta shtyrë përpara Procesin e Berlinit dhe e ka kryer tani atë mision për të cilin lindi”, ka thënë Rama.
Por kjo kjo nuk është plotësisht e vertetë, pasi Shqipëria mori pjesë në panairin e verës në Beograd, po në kuadër të Ballkanit të Hapur ku 15 prodhues të verës nga Shqipëria, ekspozuan prodhimet e tyre në Panairin Ndërkombëtar të Verës “Wine Vision”, që po mbahet në Beograd, të Serbisë në datat 16-19 nëntor 2023.
Këtë e dëshmon Ministrja e Bujqësisë dhe Zhvillimit Rural, Anila Denaj, e cila teksa publikoi në rrjete sociale pamje stenda e Shqipërisë në panair, vlerësoi markat shqiptare të prodhimit të verës.
15 kantina shqiptare konkurruan denjësisht ndër 600 pjesëmarrës në total në këtë panair nga vendet e Ballkanit, por edhe nga Italia, Franca, Spanja etj, duke ngjallur interesin e blerësve ndërkombëtarë.
“Krenarë për verën shqiptare. Përfaqësim dinjitoz i etiketave shqiptare të verës në “Wine Vision” Beograd, të cilat u vlerësuan me 5 medalje ari, 6 argjendi dhe 8 bronxi”, tha Denaj.
Denaj shprehu faleminderim për kantinat shqiptare, për garantimin e cilësisë së lartë, të cilat siç tha ministrja, “e kanë sjellë verën shqiptare në nivele ndërkombëtare”.
Kujtojmë se në panairin e dytë te verës në kuadër të “Open Balkan”, ndonëse Kryemministri Rama nuk mori pjesë, surprizë ishte pjesmarrja e presidentit te Malit të Zi, Jakov Milatoviç.
/Argumentum.al
