Shqipëria, SHBA dhe BE përshëndesin votimin e propozimit francez nga RMV/ Pritet hapja e negociatave me BE-në

Votimi i propozimit francez sot (16.07) nga kuvendi i Maqedonisë së Veriut që i hap rrugë negociatave me BE është mirëpritur nga partitë politike shqiptare në Maqedoninë e Veriut në Shqipëri e njëkohësisht dhe nga ndërkombëtarët. SHBA dhe BE kanë përshëndetur njëzëri këtë vendim duke nxitur hapjen e negociatave për Shqipërinë dhe Maqedoninë e Veriut javën e ardhshme

Maqedoni e Veriut

Kryetari i Qeverisë së Republikës së Maqedonisë së Veriut, Dimitar Kovaçevski, shprehu falënderim dhe përgëzim të madh për deputetët që sot në Kuvend votuan konkluzionet për propozimin evropian.

“Urime dhe falënderime të mëdha për deputetët që treguan sot kapacitetin e tyre demokratik, mbështetën konkluzionet për propozimin europian dhe votuan për të ardhmen europiane të vendit. Nuk ka patriotizëm më të madh se të përkrahësh prosperitetin e vendit dhe vendimet që janë me interesin më të lartë për shtetin dhe qytetarët. Më në fund, gjuha maqedonase do të ketë jehonë kudo në Evropë. Kështu e duan shtetin, me vendime të mençura dhe burrështetas!”, thuhet në postimin në profilin e kryeministrit Kovaçevski në Facebook.

Lideri i partisë opozitare shqiptare, Ziadin Sela, përmes një njoftimi në Facebook ka uruar të gjithë qytetarët për miratimin e propozimit francez.

Ai deklaron se me votimin e propozimit, u dëshmua se sa serioze janë partitë ne momente vendimtare për shtetin dhe rrugëtimin evropian.

“Partitë serioze, të përgjegjshme dhe të sinqerta shihen në ditët vendimtare, kur pa pazare, me dije, guxim dhe fytyrë të pastër, duke qenë edhe në opozitë sjellin vendime të rëndësishme e shpëtojnë procese vendimtare për të ardhmen e qytetarëve. Sot deputetët e Aleancës për Shqiptarët ishin vendimtarë në sigurimin e kuorumit të nevojshëm për miratimin e konkluzave për propozimin francez, që hap dyert e BE-së, të cilat ishin mbyllur për tre dekada. Ashtu si edhe në vitin 2017 kur mundësuam anëtarësimin në NATO edhe sot, dëshmuam se pushteti nuk na josh, e të qenurit në opozitë nuk na bën më pak përgjegjës, por përkundrazi, duke parë papërgjegjësinë e këtij pushteti i qëndruam besnik fjalës së dhënë qytetarëve tanë dhe amanetin e çuam në vend. Urime shqiptarëve dhe të gjithë qytetarëve, me të cilët bashkërisht arritëm deri këtu. Vazhdojmë përpara!”, thuhet në njoftim.

Propozimi francez u miratua me gjithsej 68 vota pro, ndërsa që nga pranimi i propozimit francez nga shteti i Maqedonisë, ASH u deklarua se do ta përkrah të njejtin.

Shqipëri

Presidenti Ilir Meta ka përshëndetur sot votimin nga Kuvendi i Maqedonisë së Veriut për paketën e Francës që i hap rrugë integrimit në BE.

Meta përgëzon faktorin politik shqiptarë për kontributin në integrimin europian të vendit.

“Përshëndes votimin pro-formulës Makron nga Parlamenti i Maqedonisë së Veriut, që çel rrugën e negociatave të anëtarësimit në BE javën e ardhshme për të dy vendet tona. Përgëzoj faktorin politik shqiptar, që gjithmonë mbetet besnik i orientimit europian, vendimtar për paqen, sigurinë dhe bashkëjetesën ndëretnike”, shprehet Presidenti.

Meta shton se “Vendimi i Këshillit Europian që do të merret pas disa ditësh duhet të kthjellojë mirë çdo vendimmarrës këtu për përgjegjësitë që ka në ndjekjen e politikave që Shqipërinë e bëjnë më europiane, më demokratike dhe më shpresëdhënëse”.

Kryeministri shqiptar Edi Rama ka reaguar pasi Parlamenti maqedonas votoi propozimin francez që i hap rrugë Maqedonisë së Veriut dhe Shqipërisë t’i fillojnë negociatat për anëtarësim.

Rama ka postuar një fotografi me ish-kancelaren Angela Merkel, duke thënë se s’ka asnjë pengesë më për negociatat për anëtarësim të Shqipërisë në BE.

“Negociatat për anëtarësimin e Shqipërisë në Bashkimin Europian s’kanë më asnjë pengesë! Parlamenti i Maqedonisë së Veriut sapo ia ka ndezur dritën jeshile propozimit të fundit francez. Pengmarrja absurde e Shqipërisë ka marrë fund”, ka shkruar ai.

Ai ka thënë se delegacioni shqiptar do të niset të hënë në Bruksel për të nisur negociatat e anëtarësimit.

“Delegacioni shqiptar do të niset të hënën në Bruksel për ta filluar këtë pjesë të re rruge, duke filluar negociatat e anëtarësimit. Do t’ia dalim në krye edhe kësaj pjese të re përpjekjesh, duke u lidhur më ngushtë me shqiptarët dhe duke e synuar me forca të reja majën ku do ta ngjisim me se s’bën Shqipërinë”, ka thënë Rama duke shkruar edhe “për hajër” në fund të postimit.

Kryetari i PD-së Sali Berisha ka përshëndetur sot votimin nga Kuvendi i Maqedonisë së Veriut të paketës franceze për t’i hapur rrugë integrimit në BE.

Berisha shprehet se “Partia Demokratike e Shqipërisë përgëzon Parlamentin e Maqedonisë së Veriut dhe përshëndet vendimin e guximshëm dhe historik që mori sot, me të cilin zhbllokoi hapjen e negociatave me BE për të dy vendet tona”.

“Lidhur me votimin e propozimit francez në Parlamentin e Maqedonisë së Veriut! Parlamenti i Maqedonisë së Veriut miratoi propozimin e Francës që i hap rrugën çeljes se negociatave të Shqipërisë dhe Maqedonisë së Veriut me Bashkimin Europian. Me këtë rast Partia Demokratike e Shqipërisë përgëzon Parlamentin e vendit fqinj, dhe përshëndet vendimin e guximshëm dhe historik që mori sot, me të cilin zhbllokoi hapjen e negociatave me BE për të dy vendet tona. Hapjen e negociatave për Shqipërinë me BE, të bllokuara prej 6 vitesh, dhe pasi ato u shtynë 5 herë, për shkak të mosplotësimit të kushteve nga qeveria Rama, dhe vitin e fundit për shkak të bllokimit nga Bullgaria të Maqedonisë së Veriut për zgjedhjen e kundërshtive midis këtyre vendeve, Partia Demokratike e konsideron si një zhvillim të lidhur kryesisht me dëshirën fisnike të BE dhe vendeve anëtare për të garantuar perspektivën europiane të vendeve të Ballkanit Perëndimor, pavarësisht se, siç sanksionon rezoluta e Parlamentit Europian, Shqipëria ka probleme të mëdha me standardet, kushtet dhe kriteret e BE”, shprehet ai.

Reagime nga Bashkimi Europian

“Një Bashkim Evropian që përfshin të gjithë Ballkanin Perëndimor, përfshirë Shqipërinë dhe Maqedoninë e Veriut, do të jetë më i fortë dhe më i begatë”, shprehet ai në deklaratën për shtyp, duke shtuar se tani është koha për të vazhuar punën për hapat e ardhshëm.

Vendimi i Maqedonisë së Veriut u përshëndet edhe nga Bashkimi Evropian.

“Urime Maqedonisë së Veriut për votimin që tani hap rrugën për hapjen e shpejtë të negociatave të anëtarësimit. Ishte një mundësi historike. Dhe ju e shfrytëzuat atë. Një hap i madh në rrugën tuaj drejt një të ardhmeje evropiane. E ardhmja juaj”, shkruante në Twitter Presidentja e Komisionit Evropian Ursula von der Leyen.

I menjëhershëm ka qenë edhe reagimi i Presidentit të Këshillit Evropian, Charles Michel.

“Votimi i sotëm në Kuvendin e Maqedonisë së Veriut i shtron rrugën për  mbajtjen e konferencës së parë ndërqeveritare gjatë javës së ardhshme”, u shpreh Charles Michel- president i Këshillit Evropian.

Komisionari për Zgjerim në Bashkimin Evropian, Oliver Varhelyi, shkruan në Tëitter se pret me padurim nisjen e negociatave për anëtarësi, duke theksuar se vendi i Maqedonisë së Veriut është në Bashkimin Evropian.

“Me padurim presim hapjen e negociatave të anëtarësimit me Maqedoninë e Veriut të martën ndërsa takohemi për Konferencën  e parë ndërqeveritare në Bruksel. Maqedonia e Veriut i përket BE-së”, tha Oliver Varhelyi- Komisioner për zgjërim të BE-së.

Kancelari gjerman Olaf Scholz shkruan se do të jenë pranë Maqedonisë së Veriut gjatë gjithë rrugës drejt BE-së.

“Përshëndes votën e Parlamentit të Maqedonisë që hap rrugën për konferencat e para të anëtarësimit të Bashkimit Evropian  me Maqedoninë e Veriut dhe Shqipërinë. Ne ju duam si anëtarë të Bashkimit Evropian dhe do të jemi pranë jush gjatë gjithë rrugës”, u shpreh Olaf Scholz- kancelar gjerman.

Shefi i politikës së jashtme të BE-së, Josep Borrell shkruan se ky është një hap vendimtar në rrugën drejt BE-së për Shqipërinë dhe Maqedoninë e Veriut”.

“Në Maqedoninë e Veriut, Parlamenti ka votuar. Në favor të hapjes së negociatave për anëtarësim, në favor të së ardhmes sonë të përbashkët evropiane. Një hap vendimtar në rrugën drejt BE-së për Shqipërinë dhe Maqedoninë e Veriut, në momentet kur ne duhet të qëndrojmë së bashku për të përballuar sfidat e përbashkëta”, tha Josep Borell- She i Politikës së Jashtme të BE-së.

SHBA-ja mirëpret vendimin e Kuvendit të Maqedonisë së Veriut

Shtetet e Bashkuara thanë se mirëpresin vendimin e Kuvendit të Maqedonisë së Veriut, që miratoi propozimin francez për t’i hapur rrugën integrimit evropian.

Sekretari amerikan i Shtetit, Antony Blinken, tha se votimi i 16 korrikut është hap i radhës në rrugën e Maqedonisë së Veriut drejt BE-së.

“Ne i dimë kompromiset e vështira të bëra për këtë kompromis, i cili njeh dhe respekton identitetin kulturor të Maqedonisë së Veriut dhe gjuhën maqedonase. Ky vendim vjen në një moment kritik për Maqedoninë e Veriut, Ballkanin Perëndimor dhe Evropën. Një Bashkim Evropian që përfshin të gjithë Ballkanin Perëndimor, përfshirë Shqipërinë dhe Maqedoninë e Veriut, do të jetë më i fortë dhe më i begatë. Tani është koha për të ndërtuar momentum dhe për të punuar në hapat e ardhshëm”, tha Blinken përmes një deklarate me shkrim.

Negociatat për anëtarësimin e Maqedonisë dhe Shqipërisë pritet të nisin në të njëjtën kohë. Bullgaria si shtet anëtar i BE-së, për më shumë se dy vjet kishte mbajtur në fuqi veton ndaj nisjes së negociatave të Shkupit me Brukselin, për shkak të mosmarrëveshjeve sa i përket gjuhës dhe historisë.

Një shumicë prej 68 anëtarësh në parlamentin me 120 vende votoi në favor të propozimit që kishte si synim zgjidhjen e mosmarrëveshjes me Bullgarinë që po pengonte ecjen përpara në procesin e anëtarësimit të vendit në BE.

Opozita ishte kundër dhe u larguan nga salla pa votuar.

/Argumentum.al