Nga mallrat “Prodhuar në Kinë” që nisen nga portet kineze për në çdo cep të botës, te një shumëllojshmëri e “produkteve globale” në raftet e supermarketeve kineze, tregtia e jashtme e Kinës vazhdon të fuqizojë ekonominë botërore nëpërmjet fluksit të saj dinamik të importeve dhe eksporteve. Një sondazh i kryer nga CGTN-i me përdorues të internetit në mbarë botën tregon se 87 për qind e tyre besojnë që, në një botë të mbushur me pasiguri, Kina – duke vepruar njëkohësisht si “superblerëse” dhe “supershitëse” – po i jep tregtisë globale një siguri të fortë.
foto nga VCG
Si “supershitëse”, Kina i ofron botës furnizim të qëndrueshëm me mallra me cilësi të lartë e çmime të përballueshme. Në sondazh, pajisjet inteligjente, automjetet elektrike dhe artikujt e përdorimit të përditshëm të prodhuar në Kinë u renditën si tre kategoritë kryesore me interes për përdoruesit e internetit. Gjithsej 89.2 për qind e pjesëmarrësve në sondazh mendojnë që eksportet kineze janë konkurruese në tregun global, 84.7 për qind thonë se teknologjia e përparuar dhe raporti i lartë ndërmjet cilësisë e çmimit janë forca konkurruese thelbësore e mallrave kineze, kurse 80.4 për qind pajtohen me mendimin që eksportet e Kinës po u sjellin gjithnjë e më shumë përfitime vendeve të botës. Ndërkohë, 80.2 për qind e tyre vërejnë se shumica e produkteve të eksportuara nga Kina janë mallra që vendet e tjera ose nuk mund t’i prodhojnë, ose mund t’i prodhojnë vetëm me kosto shumë më të lartë, që është pasojë e natyrshme e ndarjes ndërkombëtare të punës dhe e epërsisë krahasuese.
foto nga VCG
Si “superblerëse”, tregu i madh kinez po shndërrohet në një mundësi për botën, duke u bërë një nga burimet më të rralla në nivel global. Në vitin 2025, Kina u rendit si importuesja e dytë më e madhe në botë për vitin e 17-të radhazi dhe shërbeu si një destinacion kryesor eksporti për gati 80 vende e rajone. Në shtatë muajt e parë të këtij viti, importet e Kinës nga më shumë se 150 partnerë tregtarë patën rritje. Në sondazh, 89.8 për qind e të anketuarve besojnë që Kina ka krijuar punësim e të ardhura tatimore të konsiderueshme për një numër gjithnjë e më të madh vendesh, kurse 85.9 për qind thonë se Kina po zgjeron në mënyrë aktive importet dhe po promovon zhvillimin e balancuar të tregtisë. Në maj të këtij viti, Kina zbatoi plotësisht trajtimin me tarifa zero për 53 vendet afrikane me të cilat ka marrëdhënie diplomatike, dhe 80.1 për qind e të anketuarve e shohin këtë si një pasqyrim të sinqeritetit të Kinës për të hapur më tej tregun dhe për të ndarë përfitimet prej tij. Gjithsej 85.7 për qind e pjesëmarrësve në sondazh besojnë që përfitimet prej ngritjes së nivelit të konsumit në Kinë po përhapen në mbarë botën, duke ndihmuar më shumë vende në zhvillim të gjejnë tregje të gjera për produktet e tyre karakteristike. 90.9 për qind e të anketuarve mendojnë që Kina po ndihmon më shumë vende me ekonomi të bazuara në burimet natyrore dhe të orientuara nga eksporti të zhvillojnë ekonomitë e tyre, duke promovuar fuqimisht një globalizim ekonomik me përfitime për të gjithë dhe përfshirës.
Sondazhi u publikua në platformat në gjuhën angleze, spanjolle, frënge, arabe dhe ruse të CGTN-it, me 8 864 përdorues interneti që morën pjesë dhe shprehën mendimet e tyre brenda 24 orëve./cgtn
