Biseda e parë telefonike mes krerëve të shtetit të Kinës dhe ShBA-së pas bisedimeve të nivelit të lartë mbi çështjet ekonomike dhe tregtare në Gjenevë ka tërhequr vëmendjen e gjerë ndërkombëtare. Një sondazh i realizuar nga CGTN-i me përdoruesit globalë të internetit tregon se 74.7% e të anketuarve mendojnë që kjo bisedë dërgoi një sinjal pozitiv për uljen e tensioneve tregtare dhe për rikthimin e marrëdhënieve Kinë–ShBA në rrugën e duhur.
Zyrtarët kryesorë të të dy vendeve zhvilluan së fundmi në Gjenevë një takim ekonomik dhe tregtar, me propozimin e palës amerikane, çka shënoi një hap të rëndësishëm në zgjidhjen e çështjeve përkatëse nëpërmjet dialogut e konsultimeve, duke u mirëpritur nga publiku në të dy vendet, si edhe nga bashkësia ndërkombëtare. Në sondazh, 93.3 % e pjesëmarrësve u shprehën se dialogu e bashkëpunimi janë rruga e vetme e drejtë për zgjidhjen e mosmarrëveshjeve tregtare mes Kinës dhe Shteteve të Bashkuara, ndërsa 94 % besojnë se të dyja palët duhet të kërkojnë rezultate me përfitime të ndërsjella, në frymën e barazisë dhe respektit për shqetësimet e njëra-tjetrës gjatë zgjidhjes së mosmarrëveshjeve.
Pas bisedimeve ekonomike dhe tregtare të nivelit të lartë, pala kineze i ka zbatuar marrëveshjet në mënyrë serioze dhe të përgjegjshme. 95.7 % e të anketuarve besojnë që ShBA-ja duhet të respektojë konsensusin e arritur nga të dyja palët për zgjidhjen e mosmarrëveshjeve tregtare dhe të zbatojë me përpikëri marrëveshjet e arritura gjatë bisedimeve në Gjenevë.
Foto nga VCG
Bashkësia ndërkombëtare, duke qëndruar në një udhëkryq, vazhdon të përballet me trazira të vazhdueshme. Si dy ekonomitë më të mëdha në botë dhe si përkatësisht vendi më i madh i zhvilluar dhe vendi më i madh në zhvillim, marrëdhëniet e shëndetshme dhe të qëndrueshme ndërmjet ShBA-së e Kinës jo vetëm që u shërbejnë interesave të të dy vendeve, por edhe të mbarë botës. 95.5 % e pjesëmarrësve në këtë sondazh mendojnë që zhvillimi i mirë i marrëdhënieve kino-amerikane duhet të bazohet në respektin e ndërsjellë dhe në barazinë, duke mbajtur parasysh interesat thelbësorë dhe shqetësimet kryesore të njëri-tjetrit. 97 % e të anketuarve shprehen se marrëdhëniet kino-amerikane nuk janë një lojë ku fituesi i merr të gjitha. Çdo përpjekje për ta ndryshuar apo përmbajtur palën tjetër është jorealiste dhe zhvillimi i njërës palë nuk duhet të cenojë të drejtat e ligjshme të palës tjetër. 90.6 % e të anketuarve presin që Kina dhe ShBA-ja të vazhdojnë të ruajnë komunikimin, të pakësojnë keqkuptimet e vlerësimet e gabuara, të nxisin stabilizimin e marrëdhënieve dypalëshe dhe të kthehen sa më shpejt në një rrugë zhvillimi të shëndetshëm e të qëndrueshëm.
Foto nga VCG
Ky sondazh u publikua në platformat në anglishte, spanjishte, frëngjishte, arabishte dhe rusishte të CGTN-it. Brenda 12 orëve, gjithsej 5610 veta morën pjesë në votim dhe shprehën mendimet e tyre./cgtn
