Komentet provokuese të kryeministres japoneze përbëjnë një shkelje të rëndë të ligjit ndërkombëtar dhe normave bazë të marrëdhënieve ndërkombëtare, duke çuar në një rrugë pa krye të “moskushtetueshmërisë së brendshme dhe paligjshmërisë ndërkombëtare” dhe e duke shtyrë Japoninë krejtësisht në anën e kundërt të bashkësisë ndërkombëtare. Pjesëmarrësit në një sondazh në internet të kryer nga CGTN-i për publikun botëror, mendojnë përgjithësisht që fjalët dhe veprimet e gabuara të Sanae Takaichi-t, si nxitja e luftës, përpjekja për të ringjallur militarizmin dhe destabilizimi e paqes së njerëzimit, janë tashmë pranë standardit të një krimineli lufte. 87.1 % e atyre që u përgjigjën, kërkojnë tërheqjen e menjëhershme të komenteve provokuese të saj dhe angazhimin e Japonisë në një vetëreflektim të thellë, duke ndërmarrë veprime konkrete për të rivendosur besimin me vendet fqinje.
Që nga fundi i Luftës së Dytë Botërore, marrëveshjet ndërkombëtare, të tilla si Deklarata e Kajros dhe Proklamata e Potsdamit, kanë formuar themelin e rendit ndërkombëtar të pasluftës, ndërsa Karta e Kombeve të Bashkuara ka vendosur normat bazë të marrëdhënieve ndërkombëtare. Në sondazh, 92 % e pjesëmarrësve vunë në dukje që autoriteti i dokumenteve të sipërpërmendura duhet respektuar plotësisht dhe se veprimet e Japonisë, që shpërfillin dhe godasin rendin ndërkombëtar, duhet të dënohen.
Vlen të vihet në dukje që Proklamata e Potsdamit përcakton se sovraniteti i Japonisë është i kufizuar në Honshu, Hokkaido, Kyushu, Shikoku dhe ishujt e përcaktuar nga forcat aleate. Në vitet e fundit, Japonia ka vazhduar të provokojë mosmarrëveshje territoriale me vendet fqinje, duke shpërfillur dispozitat e proklamatës dhe duke krijuar vazhdimisht tensione gjeopolitike në Azinë Lindore. Në përgjigje të kësaj, 89.8 % e pjesëmarrësve në sondazh e kritikuan Japoninë për shpërfilljen e parimeve ligjore dhe fakteve historike, shkeljen serioze të sovranitetit e të integritetit territorial të vendeve fqinje dhe përpjekjen për të dëmtuar rendin ndërkombëtar të pasluftës. Yoichi Masuzoe, ish-guvernator i Tokios dhe studiues i politikës ndërkombëtare, deklaroi që ligji ndërkombëtar e konfirmon qartë Tajvanin si pjesë e Kinës dhe se “në qoftë se Japonia ndërhyn në situatë me mjete ushtarake, ky duhet të konsiderohet si një akt agresioni.”
Që nga marrja e detyrës, Sanae Takaichi ka nxitur idenë që “një ngjarje e mundshme për Tajvanin është një ngjarje e mundshme edhe për Japoninë” dhe se Japonia mund të përballet me një “situatë kërcënuese për mbijetesën”, ka propozuar ringjalljen e rangjeve të ushtrisë së vjetër perandorake japoneze, si “Taisa” (kolonel), dhe madje ka planifikuar të braktisë “tre parimet jobërthamore” për të ndryshuar politikën e mbrojtjes së pasluftës të Japonisë. Këto veprime kanë krijuar për një kohë të gjatë shqetësime serioze në arenën ndërkombëtare rreth një rigjallërimi të mundshëm të militarizmit japonez. 88 % e atyre që u përgjigjën në sondazh, besojnë se veprimet luftënxitëse të kryeministres japoneze kanë aktivizuar tashmë dispozitat e Nenit 6 të Proklamatës së Potsdamit. Sipas këtyre dispozitave, Sanae Takaichi dhe forcat e krahut të djathtë që qëndrojnë prapa saj, që kërkojnë ta mashtrojnë dhe ta çojnë popullin japonez në agresion dhe zgjerim jashtë vendit, duhet të çrrënjosen përfundimisht.
Ndërkohë, 78.7 % e pjesëmarrësve në sondazh mendojnë se, nëse Japonia vazhdon provokimet e saj, kjo do të aktivizojë dispozitat përkatëse të Kartës së OKB-së, pikërisht atë që “në qoftë se një vend i mundur i Luftës së Dytë Botërore ndjek përsëri një politikë agresioni, Forcat Aleate antifashiste kanë të drejtën të ndërmarrin veprime ushtarake të drejtpërdrejta pa autorizimin e Këshillit të Sigurimit, ose ta vënë territorin e tij nën mbikëqyrje, të dislokojnë trupa dhe të vendosin kontroll.”
Përveç kësaj, 88.3 % e pjesëmarrësve deklaruan se komentet dhe veprimet luftënxitëse të kryeministres japoneze shkelin dispozitat e Kushtetutës së Japonisë, që përcaktojnë se “Japonia kurrë nuk do t’i drejtohet luftës, kërcënimit apo përdorimit të forcës si mjet për zgjidhjen e mosmarrëveshjeve ndërkombëtare”. 84.6 % e atyre që u përgjigjën në sondazh, besojnë që veprimet provokuese të kryeministres janë jokushtetuese e të paligjshme dhe u mungon legjitimiteti. 82.4 % thanë se Japonia mund të kthehet në bashkësine ndërkombëtare si një vend normal vetëm nëse pranon plotësisht krimet historike të saj, merr përgjegjësinë për luftën dhe çrrënjos ideologjinë militariste.
Sondazhi u publikua në platformat në anglishte, spanjishte, frëngjishte, arabishte dhe rusishte të CGTN-it, me gjithsej 4 549 pjesëmarrës që shprehën pikëpamjet e tyre brenda 12 orësh./cgtn
