Më 11 shtator 2024, akademikë kinezë dhe shqiptarë u takuan në Tiranë për një sesion shkëmbimi idesh dhe tryezë të rrumbullakët.
Takimi mblodhi së bashku studiues dhe profesionistë të shquar nga të dy vendet për të eksploruar më mirë mundësitë e bashkëpunimit dhe për të shqyrtuar paradigmat bashkëkohore të kërkimit shkencor.
Në bisedime morën pjesë Prof. Zhao Chen, Prof. Kong Tianping dhe Prof. Cao Hui nga Akademia Kineze e Shkencave Sociale (CASS), Instituti i Studimeve Evropiane.
Profesor Zhao, Shefi i Departamentit të Diplomacisë Evropiane, prezantoi historinë, arritjet dhe perspektivat e Akademisë Kineze të Shkencave Sociale dhe Institutit të Studimeve Evropiane. Për më tepër, profesor Zhao prezantoi institutin e parë kinez me bazë në Evropë, specifikisht në Budapest, dhe i paraqiti akademikëve shqiptarë një tablo të arritjeve akademike të IES dhe fushave të fokusimit.
Prof. Kong, ofroi një panoramë gjithëpërfshirëse të fushave të tij të kërkimit, duke u mbështetur në ekspertizën e tij të gjerë në rajonin e Ballkanit. Ai angazhoi pjesëmarrësit shqiptarë, duke ofruar njohuri të hollësishme mbi eksplorimin historik dhe bashkëkohor të rajonit ballkanik në Kinë. Prof. Kong theksoi momente kritike të historisë, duke hedhur dritë mbi rëndësinë e kërkimit të kryer në këtë fushë.
Prof. Shpëtim Cami, Sekretar i Përgjithshëm i Kolegjit Universitar të Biznesit (KUB) në Shqipëri, prezantoi para homologëve kinezë vizionin, misionin dhe synimet për të ardhmen e KUB. Prof. Cami shprehu interesin e KUB për shkëmbimet e studentëve dhe stafit akademik me universitetet dhe grupet e mendimit në Kinë, si dhe për trajnime, programe të përbashkëta dhe projekte. Gjithashtu, ai theksoi mundësinë e një marrëveshjeje bashkëpunimi që do të ishte reciprokisht e dobishme për të dy institucionet (CASS & KUB).
Prof. Edit Bregu, Dekane e Fakultetit të Ekonomisë, Drejtësisë dhe Shkencave Sociale, bëri një prezantim të thelluar mbi gjendjen aktuale të universitetit, partneritetet e vazhdueshme, riorganizimin dhe parashikimet për të ardhmen. Prof. Bregu theksoi angazhimin e KUB për ndërkombëtarizimin e mëtejshëm dhe shprehu intersin mbi qasjen aktive të universitetit me institucionet e huaja akademike.
Prof. Mira Andoni, Dekane e Fakultetit të Inxhinierisë dhe Shkencave Kompjuterike në KUB, prezantoi shtrirjen, kapacitetin dhe mundësitë që fakulteti po ofron për të rinjtë shqiptarë në kohën tonë. Prof. Andoni theksoi rëndësinë jetike të kësaj fushe për të ardhmen dhe mënyrën se si KUB po eksploron dhe përshtatet me nevojat e tregut.
Dr. Irsida Dinoshi, zv.dekane e Fakultetit të Ekonomisë, Drejtësisë dhe Shkencave Sociale në KUB, i njohu homologët kinezë me synimet dhe arritjet e institucionit. Dr. Dinoshi theksoi angazhimin dhe pritshmëritë e KUB për shkëmbimin e njohurive, ideve dhe përvojave.
Prof. Enver Bytyçi, Drejtor Ekzekutiv i Institutit të Studimeve të Evropës Juglindore, prezantoi objektivat e institucionit të tij dhe ekspertizën e tij personale mbi rajonin. Autori i disa librave dhe artikujve për Kinën, prof. Bytyçi shprehu bindjen se bota akademike shqiptare ka vullnetin, synimin dhe aspiratën për të punuar me Kinën. Ai kujtoi vizitat e tij në Kinë dhe potencialin e madh në dy nismat e Pekinit, respektivisht Kinë-EQL dhe nisma “Një Brez, një rrugë”.
Marjana Doda, kryeredaktore e Argumentum.al, një zë thelbësor në peizazhin mediatik shqiptar, prezantoi historinë, arritjet dhe vlerat thelbësore të kësaj medieje. Ajo u ndal në rëndësinë thelbësore të portretizimit të duhur të realitetit të Kinës në Shqipëri, nevojën për informacion të paanshëm dhe aktorët që formojnë narrativën. Zonja Doda i prezantoi të ftuarit kinezë edicionin special të revistës Argumentum, e cila është një revistë mujore e fokusuar në gjeopolitikë.
I pranishëm në takim ishte edhe Z. Chong Daihai, Kryereporter i Agjencisë së Lajmeve Xinhua, Byroja e Tiranës.
Dr. Marsela Musabelliu, Drejtore Ekzekutive e Institutit Shqiptar për Studimet e Globalizimit, moderoi takimin. Si studiuese e aktualitetit kinez, ajo i njohu homologët se si perceptohet Kina në Shqipëri, çfarë arritjesh janë bërë deri tani në kërkimet e lidhura me Kinën dhe çfarë mund të sjellin perspektivat për të ardhmen. Dr. Musabelliu shprehu bindjen se akademikët mund të krijojnë ura solide bashkëpunimi midis Kinës dhe Shqipërisë.
Të gjithë pjesëmarrësit theksuan interesin dhe angazhimin e ndërsjellë të institucioneve kineze dhe shqiptare për të rritur përpjekjet bashkëpunuese, për të nxitur inovacionin e kërkimin dhe për të forcuar lidhjet akademike. Pjesëmarrësit shfrytëzuan këtë mundësi për të çuar përpara bashkëpunimin akademik midis Kinës dhe Shqipërisë.
Fokusi kryesor ishte në rritjen e shkëmbimeve dypalëshe dhe shfrytëzimin e interesave të përbashkëta për të nxitur përpjekje më të mëdha në të ardhmen.
Takimi u karakterizua nga prezantime të thella, frymë bashkëpunimi dhe diskutime që nxorën në pah traditat e pasura dhe pikat e forta të të dy vendeve. Vullneti i të dyja palëve është i pozicionuar shumë mirë për të përdorur ekspertizën e kombinuar, në kërkim të arritjeve fitimprurëse në të ardhmen./AIGS
/Argumentum.al
