Presidenti turk, Recep Tayyip Erdogan dhe kryeministri i Mbretërisë së Bashkuar, Keir Starmer, kanë nënshkruar në Ankara një marrëveshje bashkëpunimi për avionin luftarak Eurofighter Typhoon, duke shënuar një etapë të re në marrëdhëniet dypalëshe të mbrojtjes, raporton Anadolu.
Duke folur në një konferencë të përbashkët për media me kryeministrin britanik, Keir Starmer, presidenti Erdogan e përshkroi marrëveshjen si një “shenjë të re të marrëdhënieve strategjike midis Turqisë dhe Mbretërisë së Bashkuar”, duke pohuar se kjo do të hapë rrugën për projekte të përbashkëta në mbrojtje.
Starmer, nga ana e tij, tha se “kjo do të forcojë sigurinë në të gjithë NATO-n, do të thellojë bashkëpunimin tonë dypalësh të mbrojtjes dhe do të nxisë rritjen ekonomike këtu dhe në Mbretërinë e Bashkuar”. Ai gjithashtu tha se kjo do të sigurojë 20 mijë vende pune britanike, duke ndërtuar këto avionë luftarakë të teknologjisë së fundit.
Ministri turk i Mbrojtjes Kombëtare, Yasar Guler, tha se Turqia po planifikon të blejë avionët Eurofighter Typhoon nga disa vende, përfshirë 20 nga Mbretëria e Bashkuar, si dhe nga Katari dhe Omani nga 12 prej secilës.
Guler foli me gazetarët pas takimit midis presidentit Erdogan dhe kryeministrit Starmer, duke theksuar se avionët nga Katari mund të mbërrijnë potencialisht në fillim të vitit të ardhshëm.
Marrëdhëniet dypalëshe
Starmer dhe Erdogan gjithashtu njoftuan nisjen e kornizës së parë të bashkëpunimit dypalësh midis Mbretërisë së Bashkuar dhe Turqisë.
Starmer e quajti atë “një moment historik që pasqyron thellësinë dhe gjerësinë në rritje të bashkëpunimit tonë ekzistues dhe ambicien tonë për të shkuar më tej”.
Ndërkaq, presidenti Erdogan tha se janë të përkushtuar për të rritur vëllimin tregtar Turqi-Mbretëri e Bashkuar, “fillimisht në 30 miliardë dollarë dhe përfundimisht në 40 miliardë dollarë”.
“Jemi të vendosur të forcojmë lidhjet tona ekonomike”, tha Erdogan.
Më herët, Starmer u prit me një ceremoni zyrtare dhe bashkë-kryesoi një takim ndër-delegacionesh me presidentin turk. Ai vizitoi Industritë Hapësinore Turke (TUSAS) për një informim mbi avionin luftarak turk KAAN dhe inspektoi avionin Eurofighter Typhoon të përfshirë në marrëveshje.
Gaza
Lidhur me çështjet rajonale, presidenti Erdogan përgëzoi Mbretërinë e Bashkuar për vendimin e saj për të njohur shtetin e Palestinës, duke e quajtur atë një “hap të guximshëm drejt një zgjidhje me dy shtete”.
Lidhur me armëpushimin në Gaza, presidenti turk tha: “Është përgjegjësia jonë kolektive të mbështesim armëpushimin në Gaza. Qeveria izraelite duhet të përmbahet”./AA
