Viti i ri shkollor 2026–2027 ka nisur sot në të gjithë vendin, me rreth 25 mijë fëmijë që ulen për herë të parë në bankat e shkollës. Me këtë rast, drejtuesit më të lartë të shtetit dhe politikës kanë përcjellë mesazhet e tyre për nxënësit, mësuesit dhe prindërit, duke vënë theksin te rëndësia e arsimit, por edhe te sfidat me të cilat përballet sistemi arsimor.
Begaj shprehet se çdo ditë e re në shkollë është një mundësi për të mësuar, për të zbuluar dhe për të ëndërruar.
Duke vlerësuar rëndësinë e shkollës në formësimin e brezave të rinj dhe arsimimin cilësor si themel për të ardhmen e vendit, Kreu i Shtetit motivon nxënësit të ndjekin më përkushtim këtë vit shkollor.
“Besoni te vetja, besoni tek ëndrrat tuaja dhe tek e ardhmja. Ajo do të jetë më e mirë dhe është në duart tuaja”, shprehet presidenti.
Begaj përcolli një urim të veçantë për fëmijët që ulen për herë të parë në bankat e shkollës.
Ai shprehu gjithashtu mirënjohje për të gjithë ata mësues, të cilët me përkushtim, durim dhe dashuri kryejnë këtë mision fisnik.
Kryeministri Rama: 53 shkolla të reja ose të rehabilituara hapin dyert
Kryeministri Edi Rama uroi për një vit të mbarë shkollor nxënësit, mësuesit, drejtuesit e shkollave dhe prindërit.
Rama publikoi në rrjetet sociale fotografi nga disa prej shkollave të reja ose të rikonstruktuara që presin nxënësit me kushte dhe standarde të reja.
Sipas të dhënave të bëra publike prej tij, 53 shkolla të reja ose të rehabilituara hapin dyert këtë vit shkollor, ndërsa janë miratuar edhe 39 projekte të tjera për rikonstruksionin e institucioneve arsimore.
Një tjetër risi është zgjerimi i programit “Pas Shkolle”, i cili tashmë përfshin 408 institucione arsimore në të gjithë vendin, duke u ofruar fëmijëve mundësi për aktivitete edhe përtej orarit mësimor.
Për nxënësit shqiptarë në Diasporë, janë shpërndarë rreth 5,800 paketa mësimore, me afro 17 mijë tekste, në 17 vende.
Kumbaro: Mbi 400 oficerë sigurie dhe 900 psikologë e punonjës socialë
Ministrja e Arsimit, Mirela Kumbaro, iu drejtua nxënësve përmes një videomesazhi, duke i uruar për një vit të mbarë shkollor.
Kumbaro vuri theksin te përmirësimi i infrastrukturës, forcimi i sigurisë dhe zgjerimi i aktiviteteve pas mësimit.
“Ne do të punojmë çdo ditë këtë vit që ju të keni kushte sa më të mira ku mësoni”, u shpreh ministrja, duke përmendur laboratorët, projektet shkencore, olimpiadat dhe aktivitetet kulturore e sportive.
Ajo u ndal edhe te rregulli për ndalimin e përdorimit të celularëve gjatë orarit mësimor, duke argumentuar se synimi është përqendrimi i nxënësve te mësimi.
Për sigurinë në shkolla, këtë vit do të jenë në shërbim të nxënësve mbi 400 oficerë sigurie, ndërsa shërbimi psiko-social është fuqizuar me rreth 900 psikologë dhe punonjës socialë.
Ndërkohë, 20 shkolla në Tiranë janë përfshirë në projektin pilot “Smart City”, me masa të shtuara sigurie përmes kamerave inteligjente.
Berisha: Shqipëria përballet me alarm demografik dhe arsimor
Një mesazh me tone kritike ka përcjellë edhe kryetari i Partisë Demokratike, Sali Berisha.
Në urimin e tij për nxënësit, mësuesit dhe prindërit, Berisha u ndal te zhvillimet demografike dhe numri në rënie i nxënësve në sistemin arsimor.
Sipas tij, në vetëm një vit Shqipëria ka humbur rreth 5,900 nxënës të arsimit fillor, ndërsa numri i tyre ka rënë nga 146,962 në 141,089, ose rreth 4 për qind.
Berisha e krahasoi këtë shifër me mesataren e Bashkimit Europian, ku, sipas tij, rënia ka qenë 0.2 për qind.
“Ky është rezultati i një politike që nuk ka arritur të ndalë shpopullimin, emigracionin dhe largimin e familjeve shqiptare”, deklaroi kreu i PD-së, duke e lidhur rënien e numrit të nxënësve me krizën demografike dhe emigracionin.
Në mesazhin e tij, Berisha uroi veçanërisht nxënësit që ulen për herë të parë në bankat e shkollës, duke u dëshiruar një vit të mbushur me dije, suksese dhe ëndrra të bukura.
Nisja e vitit të ri shkollor është shoqëruar kështu me mesazhe urimi nga institucionet dhe mazhoranca, por edhe me kritika nga opozita, e cila e ka vendosur arsimin në kontekstin e sfidave demografike dhe emigracionit.
© 2026 Argumentum
