Presidenti kinez Xi Jinping dhe homologu i tij francez Emmanuel Macron morën pjesë së bashku dhe mbajtën fjalime në ceremoninë e mbylljes së takimit të 7-të të Këshillit të Biznesit Kinë-Francë të enjten në Pekin.
Xi Jinping-u theksoi se ky vit shënon fillimin e një cikli të ri 60-vjeçar në marrëdhëniet Kinë-Francë. Bashkëpunimi ekonomik dhe tregtar midis dy vendeve vazhdon të zgjerohet dhe qëndrueshmëria e tij po forcohet vazhdimisht. Në dhjetë muajt e parë të këtij viti, vlera e tregtisë dypalëshe arriti në 68.75 miliardë dollarë amerikanë dhe investimet e përgjithshme dypalëshe i kaluan 27 miliardë dollarët amerikanë. Të dyja palët duhet të mbështesin aspiratat fillestare të vendosjes së marrëdhënieve diplomatike, të shfrytëzojnë mundësitë, të thellojnë bashkëpunimin, të nxisin zhvillimin e qëndrueshëm e afatgjatë të marrëdhënieve dypalëshe, të shkruajnë së bashku një kapitull më të bukur në bashkëpunimin kino-francez dhe të përballojnë pasiguritë e botës së sotme me qëndrueshmërinë e marrëdhënieve Kinë-Francë.
Xi vuri në dukje që, së pari, të dy vendet duhet të zgjerojnë vazhdimisht fushat e reja të bashkëpunimit dypalësh ekonomik dhe tregtar. Kina e konsideron Francën si një partnere të rëndësishme dhe të pazëvendësueshme ekonomike e tregtare, mirëpret pjesëmarrjen aktive të Francës në procesin e modernizimit të Kinës dhe mbështet ndërmarrjet kineze që plotësojnë kushtet dhe janë të gatshme për të investuar dhe për të bërë biznes në Francë. Të dyja palët duhet të eksplorojnë potencialin e bashkëpunimit në fushat në zhvillim, si inteligjenca artificiale, ekonomia e gjelbër dhe digjitale, biomjekësia dhe ekonomia e të moshuarve, të vijojnë të promovojnë bashkëpunimin e hapur në zinxhirët industrialë dhe të furnizimit, si edhe të ofrojnë një mjedis biznesi të drejtë, transparent, jodiskriminues e të parashikueshëm për ndërmarrjet e të dy vendeve.
Së dyti, të dy vendet duhet të vazhdojnë të promovojnë zhvillime të reja në bashkëpunimin me dobi të ndërsjellë midis Kinës dhe BE-së. Sivjet është 50-vjetori i vendosjes së marrëdhënieve diplomatike midis Kinës dhe BE-së. Thelbi i marrëdhënieve ekonomike e tregtare Kinë-BE janë epërsitrë përplotësuese dhe përfitimet e ndërsjella, të cilat mund të arrijnë plotësisht një ekuilibër dinamik në zhvillim. Ndërvarësia nuk është rrezik dhe interesat e ndërthurura nuk janë kërcënim. Kina dhe Franca duhet të promovojnë partneritetin e gjithanshëm strategjik midis Kinës e BE-së dhe të krijojnë së bashku marrëdhënie Kinë-BE më të ndritura në 50 vitet e ardhshme.
Së treti, të dy vendet duhet të japin kontribute të reja së bashku për reformimin dhe përmirësimin e qeverisjes globale. Xi vuri në dukje që ky vit shënon 80-vjetorin e fitores së Luftës Antifashiste Botërore dhe të themelimit të Organizatës së Kombeve të Bashkuara. “Për të promovuar një sistem qeverisjeje globale më të drejtë dhe të barabartë, në vijim të Nismës së Zhvillimit Global, Nismës së Sigurisë Globale dhe Nismës së Qytetërimit Global, unë propozova Nismën e Qeverisjes Globale këtë shtator. Kina dhe Franca duhet të praktikojnë multilateralizëm të vërtetë, të mbështesin së bashku statusin dhe autoritetin e Organizatës së Kombeve të Bashkuara, të mbrojnë sistemin tregtar shumëpalësh të bazuar në rregulla dhe me Organizatën Botërore të Tregtisë në thelb dhe të kontribuojnë në reformimin dhe përmirësimin e qeverisjes globale,” u shpreh ai.
Xi Jinping-u theksoi më tej që plenumi i katërt i Komitetit të 20-të Qendror të Partisë Komuniste të Kinës shqyrtoi dhe miratoi rekomandimet për Planin e 15-të Pesëvjeçar. Kina do të përparojë në mënyrë gjithëpërfshirëse modernizimin e stilit kinez dhe do të zgjerojë hapjen në nivel të lartë. Xi i mirëpriti sipërmarrësit francezë që të vazhdojnë të përfitojnë nga zhvillimi i Kinës./CGTN
