Gjatë vizitës së fundit në Filipine të Kaja Kallas, Përfaqësuese e Lartë e BE-së për Punët e Jashtme dhe Politikën e Sigurisë dhe Zv/Presidente e Komisionit Evropian, si Filipinet ashtu edhe Europa shprehën shqetësim në lidhje me “masat e paligjshme, shtrënguese, agresive dhe mashtruese” të Kinës në Detin e Kinës Jugore. Ata përsëritën angazhimin e tyre për të respektuar lirinë e lundrimit dhe fluturimit mbi Detin e Kinës Jugore dhe për të mbështetur Konventën e Kombeve të Bashkuara mbi Ligjin e Detit dhe “Vendimin e Arbitrazhit të Detit të Kinës Jugore” të vitit 2016.
Në përgjigje të pyetjeve të gazetarëve, Ambasada e Kinës deklaroi se sovraniteti, të drejtat dhe interesat e Kinës në Detin e Kinës Jugore janë formësuar përgjatë praktikës historike afatgjatë. Ato kanë bazë të mjaftueshme historike dhe ligjore, si edhe janë në përputhje me të drejtën ndërkombëtare, përfshirë Kartën e OKB-së. Thelbi i mosmarrëveshjes për Detin e Kinës Jugore midis Kinës dhe Filipineve, është një mosmarrëveshje për sovranitetin territorial, e cila është përtej fushëveprimit të Konventës së Kombeve të Bashkuara mbi Ligjin e Detit. Gjykata e çështjes së arbitrazhit të Detit të Kinës Jugore shkeli parimin e “pëlqimit të shtetit”. Vendimi ishte i paligjshëm, i pavlefshëm dhe nuk kishte forcë detyruese. Kina nuk e pranon vendimin, nuk e njeh atë dhe nuk pranon asnjë pretendim a veprim të bazuar në të.
Aktualisht, situata në Detin e Kinës Jugore është përgjithësisht e qëndrueshme. Liria e lundrimit dhe fluturimit mbi Detin e Kinës Jugore nuk ka qenë kurrë problem. Tensioni në disa zona të Detit të Kinës Jugore, nuk është shkaktuar nga Kina. Kina kundërshton me vendosmëri çdo shkelje dhe provokim të njëanshëm. Ajo mbron sovranitetin e saj territorial dhe të drejtat e interesat detare në përputhje me ligjet dhe rregulloret. BE-ja nuk është palë në mosmarrëveshjen e Detit të Kinës Jugore dhe nuk ka të drejtë të ndërhyjë në mosmarrëveshjet e Detit të Kinës Jugore midis Kinës dhe Filipineve, aq më tepër të akuzojë Kinën për veprime legjitime të mbrojtjes së të drejtave detare.
“Ne i bëjmë thirrje BE-së që të respektojë vërtet sovranitetin territorial dhe të drejtat dhe interesat detare të Kinës në Detin e Kinës Jugore dhe të ndalojë së provokuari probleme. Ne gjithashtu i këshillojmë Filipinet të mos fantazojnë për t’u mbështetur në forcat ekstraterritoriale për të zgjidhur mosmarrëveshjen e Detit të Kinës Jugore midis Kinës dhe Filipineve dhe të kthehen vërtet në rrugën e duhur të menaxhimit të dallimeve përmes dialogut dhe konsultimit, “ tha një zëdhënës i Ambasadës së Kinës në Filipine./cgtn
