Kryeministri Edi Rama vijon sot turin me diasporën në një takim me shqiptarët Selanik të Greqisë në një sallë në ‘Porto Palace’.
Kryetari i Partisë Socialiste njëherësh kryeministri Edi Rama në takimin e sotëm me komunitetin shqiptar në Selanik, deklaroi se, Evropa ideale pakufi është njohur në jetën e përditshme të njerëzve të zakonshëm në Selanik shumë kohë përpara sesa të shfaqej Evropa e traktateve dhe të merrte formën e vetë BE-ja e qeverisur nga Brukseli.
“Ku më mirë sesa këtu në Selanik mund të lexohet e shkuara me sytë e të ardhmes. Selaniku është qyteti i jetëve të shumë brezave dhe njerëzve me prejardhje të ndryshme, të mbledhur bashkë si në një mozaik të gjallë të historisë në të cilin u ndërthuren fate dhe kultura dhe identitete të ndryshme, ku shqiptarët kanë pasur vendin dhe rolin e tyre të pamohueshëm për shekuj me radhë”, tha Rama.
“Herë si ushtarë, herë si tregtarë, herë si punëtorë, herë si individ problematik e herë si njerëz mendjendritur në mozaikun e mahnitshëm të historisë së këtij qyteti, përkrah hebrenjve, turqve, armenëve, bullgarëve dhe sigurisht dhe grekëve, shqiptarët kanë vendosur gurët e një modeli, jo vetëm bashkëjetese, por edhe bashkëveprimi dhe shkrirjeje ndëretnike, ku të vetmit kufij për t’u kapërcyer ishin kufijtë e imagjinatës”, tha Rama.
“Në Selanik tundimet e mbylljes dhe ngijumit në kështjella bashkësish etnike homogjene nuk u rezistonin dot vrulleve të njerëzisë për shkëmbime të hapura tregtare, veje-vajtjeve të anijeve me avull në portin e madh, prurjeve të lidhjeve hekurudhore me të katër anët e Mesdheut, shkëmbimeve të pareshtura kulturore, diplomatike, politike”, theksoi Rama.
Në këtë qytet, u shpreh Rama, “Evropa ideale pakufi është njohur në jetën e përditshme të njerëzve të zakonshëm shumë e shumë kohë përpara sesa të shfaqej Evropa e traktateve dhe të merrte formën e vetë BE-ja e qeverisur nga Brukseli”.
“Shpirti i lirisë dhe tolerancës dhe i bashkëjetesës në një rend ligjor të pashkruar bashkësie shumetnike është mishëruar këtu natyrshëm në Selanik shumë përpara se të kthehej në kriter përkatësie shumëkombëshe nën flamurin me shumë yjë të BE-së”.
Rama lajmëroi se do të firmoset një kontratë përmes së cilës 8 mësuese të gjuhës shqipe do t’u mësojnë gjuhën amtarë vogëlushëve shqiptarë në Greqi.
“Motra dhe vëllezër, shqiptarë të Greqisë, mirë se ju gjej përsëri këtë herë në Selanik dhe më lejoni në fillim që t’iu prezantoj këtu disa nga ne, që siç e premtova, mbas takimit të parë në Athinë, do të na ndihmojnë të qëndrojmë më pranë fëmijëve.
Janë këtu 8 nga 50 mësuesit e parë të gjuhës shqipe, me të cilët Ministria jonë e Arsimit do të lidhë kontratë punë për t’i mësuar gjuhën tonë amtare vogëlushëve. Dhe siç mund ta prisnit, janë 8 gra”, tha Rama.
Kryetari i Partisë Socialiste njëherësh kryeministri Edi Rama në takimin e sotëm me komunitetin shqiptar në Selanik, deklaroi sot se, Vorio Epiri është një term i vdekur me kohë dhe me vakt
“Në vazhdim të këtyre shfaqjeve të padëshiruara, diku këtu rreth e rrotull një grup fantazmash të gjalla të së shkuarës janë angazhuar në një protestë kundër ardhjes time këtu për t’ju takuar ju. Me fletushka dhe me parulla qesharake të frymëzuara nga ai ashtuquajturi Vori Epir, ata kanë bërë këto ditë në adresën time edhe kërcënime, të cilat mua më shkaktojnë vetëm keqardhje. Njësoj siҫ më shkakton keqardhje ҫdo spazëm e kujtdo në Shqipëri që ushqen ndjenja jo miqësore ndaj Greqisë fqinje dhe mike”, theksoi Rama.
“Vorio Epiri është një term i vdekur me kohë dhe me vakt. Ka vdekur bashkë me ҫdo ëndërr të lodhur të qarqeve dhe individëve të dalë boje dhe të dalë kohe këtyre anëve. Kush e përdor akoma sot termin Vorio Epir kur flet për jugun e Shqipërisë tregon vetëm dritëshkurtësinë dhe pafuqinë e vetë për të jetuar në shekullin e 21-të”, tha Rama.
Këto nënvizoi Rama, “këto janë fosile për gjynah, por nuk janë në asnjë mënyrë arsye që të ushqejmë brenda nesh ndjenja jo miqësore ndaj Greqisë”.
Rama: Absurd bllokimi i gazetarëve shqiptarë në kufi
Kryeministri Edi Rama komentoi sot aituatën e krijuar ditën e djeshme në pikën kufitare të Kapshticës, ku një grup gazetarësh shqiptarë u bllokuan për rreth 3 orë për asrye të panjohura.
Kryeministri falënderoi ministrin e Jashtëm grek për ndërhyrjen e tij në zhbllokimin e kësaj situate, të cilën e konsideroi absurde.
“Që në fillim dua t’ju shpreh keeqardhjen të gjithë gazetarëve të ardhur dje nga Shqipëria për të ndjekur këtë takim, të cilët u bllokuan për disa orë në kufi për arsye të panjohura për ne. Por dua edhe të falënderoj ministrin e Jashtëm grek për ndërhyrjen e tij dhe zhbllokimin e një situate absurde që kurrë nuk i ka ndodhur dhe nuk mund t’i ndodhë në asnjë mënyrë, për asnjë lloj arsyeje një gazetari grek në kufirin hyrës të Shqipërisë”, tha Rama.
Po ashtu, Rama bëri të ditur se që nesër qeveria shqiptare do t’i drejtojë zyrtarisht një kërkesë autoriteteve greke për rishikimin e një vendimi absurd të 12 viteve më parë për të ndaluar gazetarin Marin Mema që të hyjë në Greqi.
“Meqë po flasim për gazetarët dhe lirinë e informimit dhe lëvizjes së lirë të gazetarëve në territorin e Europës sonë të përbashkët, dua të besoj se ministri i Jashtëm i Greqisë, vetë qeveria greke, do t’i prëgjigjen me logjikën e shëndetshme europiane kërkesës që do t’ja drejtojmë zyrtarisht që nesër për rishikimin e një vendimi absurd të autoriteteve greke 12 vjet më parë për të ndaluar gazetarin Marin Mema që të hyjë në Greqi”, tha Rama.
Rama tha se “Marin Mema nuk ka kryer asnjë krim”.
“Ai nuk ka bërë asnjë gjë më shumë dhe asgjë më pak se sa punën e tij si gazetar i apasionuar pas gjurmëve të historisë së shqiptarëve. Dhe nëse këndvështrimi i tij i historisë është i ndryshëm nga i kujtdo qoftë në Athinë, që ka nxitur apo ka marrë vendimin absurd për të ndaluar lirinë e tij të hyrjes në një vend të BE-së siç është Greqia fqinje dhe mike, ky nuk mund të jetë kurrën e kurrës një shkak për t’i hequr arbitrarisht një gazetari lirinë europiane të lëvizjes”, tha Rama.
Përkundrazi, kryeministri theksoi se kjo ëshë një masë ekstreme antidemokratike, antieuropiane e cila bie ndesh me çdo vlerë dhe parim të komunitetit demokratik europian.
Kryeministri Edi Rama kërkoi gjithashtu votën e emigrantëve shqiptarë në Greqi, të cilët këtë vit do të votojnë për herë të parë nga vendet ku ata jetojnë.
Rama kërkoi votën e tyre, me qëllim që ta çojnë Shqipërinë në BE me të drejta të plota, ashtu siç shqiptarët kanë çuar familjet e tyre në Bashkimin Evropian.
Rama shpalosi objektivin e tij që në 2030 flamuri i Shqipërisë të ngrihet në Bruksel.
“Kjo është një ditë e veçantë për mua edhe për një arsye tjetër. Ju nuk jeni bashkatdhetarë jashtë atdheut me një të drejtë vote. Sot jemi votues që për herë të parë do merrni pjesë në zgjedhje duke gëzuar të drejtën të votoni, këtu ku jeni nga shtëpia juaj.
Ju e dini, më2 është dashur të përpiqem shumë gjatë për ta bërë realitet këtë premtim, të cilin nuk e mbajtën dot për një kohë jo të shkurtër, sepse pa marrë votat e palës tjetër ishte e pamundur. Unë mund tju them se në pranverën e ardhshme ju kërkoj votën tuaj nga Greqia për ta bërë Shqipërinë2 e 2030 anëtare me të drejta të plota në BE. Për ti dhënë Shqipërisë të njëjtin mundësi që ju shqiptarët e Evropës i keni dhënë familjeve tuaja, mundësinë për të përfituar nga të mirat e të jetuarit brenda familjes evropiane. Për të bërë të mundur që së bashku me shqiptarët kudo ku janë të greme flamurin e Skënderbeut dhe Ismail Qemalit në Bruksel brenda kësaj dekada”, tha Rama.
Kryeministri e vuri theksin edhe tek raportet mes shqiptareve te Greqise dhe grekeve te Shqiperise.
“Ju shqiptarët e Greqisë dhe grekët e Shqipërisë jeni thelbi brenda bërthamës së pandashme të një fqinjësie që duhet të jetë burim miqësie dhe jo burgim konfliktesh,. Burim fuqie të përbashkët jo karshillaqesh ndaj njeri tjetrit. Burim partneritetesh në cdo nivel. Jo sebepesh për ngërçe mes njërit tjetrit që pastaj paguajnë qytetarët e zakonshëm të dy vendeve tona”.
/Argumentum.al
