Eljanos Kasaj*
Klasifikimi shqetësues i së premtës i partisë Alternative für Deutschland (AfD) të Gjermanisë si “ekstremiste e krahut të djathtë” nga zyra federale e vendit për mbrojtjen e kushtetutës (Bundesamt für Verfassungsschutz-BfV) nuk kaloi pa u vënë re nga komuniteti ndërkombëtar.
Raporti prej 1000 faqesh pretendon se “botëkuptimi i bazuar në etni dhe prejardhje të njerëzve që mbizotërojnë brenda partisë është i papajtueshëm me rendin e lirë demokratik”. Kjo po rrit mundësinë e një ndalimi të plotë të AfD-së – një mocion i tillë tashmë është paraqitur në Bundestag vitin e kaluar,ndërsa krahu rinor i AfD është klasifikuar tashmë si një grup ekstremist në 2023.
Gjetjet e BfV mund të nënkuptojnë potencialisht një ndalim të punësimit të anëtarëve ose simpatizantëve të AfD-së për punë publike, si policia, ushtria, mësimdhënia, nëpunësit publikë. Kjo do të thotë gjithashtu se shërbimet e inteligjencës tani kanë dritën jeshile për të përdorur metoda më ndërhyrëse të mbikqyrjes kundër njerëzve të lidhur me partinë nacionaliste, një fakt që do të jehojë në shumë njerëz që kanë vuajtur nën Stasi-në( policinë sekrete komuniste të Gjermanisë Lindore)-duke qenë se shumica e elektoratit të AfD është prej Republikës Demokratike Gjermane.
Në reagimin e tij ndaj raportit të BfV të së premtes, kryeministri i hekurt hungarez Viktor Orbán postoi në platformën X, duke thënë, “Çfarë dreqin po ndodh në Gjermani? Mund të mbështeteni tek ne, Alice Weidel!” Në përgjigjen e saj, kryetarja e përbashkët e AfD-së, Alice Weidel, falënderoi kryeministrin hungarez për inkurajimin dhe premtoi se “AfD do të vazhdojë rrugën e saj për të mirën e vendit tonë”. Aktualisht AfD është anëtare e “Aleancës Patriotët për Evropën” në Parlamentin Evropian, dhe po kështu është edhe partia Fidesz e kryeministrit Orban.
Zhvillimi shqetësues nga Gjermania nuk vonoj për të tërhequr vëmendjen edhe të administratës së re të presidentit republikan Donald Trump.
Sekretari amerikan i Shtetit Marco Rubio kritikoi ashpër veprimet e shërbimeve të inteligjencës gjermane, duke e quajtur sjelljen e tyre “tirani” dhe duke e dënuar publikisht faktin e ndërhyrjes së shërbimeve të inteligjencës gjermane në proceset politike të vendit.Interpretimi i Rubios për ankesën kryesore të strukturës politike të trashëgimisë gjermane kundër AfD-së, se është e vetmja parti që kundërshton doktrinën e ish-kancelares Angela Merkel të ‘kufijve të hapur’, ndahet gjithashtu nga shumë analistë dhe politikanë.
J.D. Vance, Zëvendëspresidenti i kabinetit të presidentit Trump, ka marrë pjesë gjithashtu në debatin duke akuzuar instancat shtetërore gjermane për “rindërtimin e Murit të Berlinit”, si një hije të Murit të ngritur nga regjimi komunist me 1961,duke theksuar se kësaj radhe ai “është rindërtuar – jo nga sovjetikët apo rusët, por nga strukturat gjermane!”
Përveç liderve evropian dhe atyre amerikan, reagimet nuk kanë munguar as nga Kremlini zyrtar, ku zëdhënësi presidencial Dmitrij Peskov, gjatë një interviste me Agjencinë Telegrafike të Lajmeve Ruse(TASS) ka deklaruar se “Rusia nuk do të ndërhyjë në situatën që përfshin shpalljen e Alternativës për Gjermaninë (AfD) si parti ekstremiste” dhe se “kjo është një çështje e brendshme për Gjermaninë dhe ne nuk kemi as të drejtën dhe as qëllimin për të ndërhyrë,” theksoi Peskov, duke adresuar shqetësimet rreth implikimeve të mundshme të përcaktimit të AfD-së nga Berlini si ekstremiste”.
Kjo levizje befasuese prej instancave gjermane bëhet edhe më shqetësuese kur shikojmë rezultatet e sondazhit të fundit të 22 prillit, ku AfD është aktualisht partia më popullore në Gjermani duke tërhequr mbi të katërtën e të gjitha votave ose rreth 26%. Njëkohësisht shifrat pasqyrojnë qartë një pakënaqësi të gjerë me kancelarin e ri të zgjedhur të Gjermanisë, Friedrich Merz i Unionit CDU/CSU, të cilin shumë e akuzojnë se ka mashtruar votuesit duke u tërhequr nga premtimet e tij zgjedhore, të tilla si frenimi i emigracionit të pakontrolluar, fundamentalizmi mjedisor dhe diskutimet për ri-adaptimin e ligjit për shërbimin e detyruar ushtarak në Bundeswehr(Ushtrinë Federale Gjermane)të pezulluar në vitin 2011.
Në të njëjtën kohë kjo paqëndrueshmëri politike, por edhe ekonomike në Gjermani po ndikon negativisht në shumë vende që kanë marrëdhënie të ngushta ekonomike me Gjermaninë(si në Hungari, Sllovaki, etj). Nga njëra anë, problemet e ekonomisë gjermane përkthehen në një rritje të ngadaltë të ekonomisë evropiane pasi Gjermania është ekonomia më e madhe e Bashkimit Evropian, njohur ndryshe dhe si “Lokomotive e BE-së”, ndërsa nga ana tjetër bizneset, korporatat dhe kompanitë gjermane shprehin shqetësim për situatën ku Gjermania pak-nga-pak është duke humbur konkurrueshmërinë e saj në tregjet botërore, përballë një Kine dhe një Indie gjithmonë e më ambioze dhe novative-duke e vënë kështu të ardhmen e Gjermanisë në një udhëkryq fort delikat, nga i cili do të varet jo vetëm fati i së ardhmes së popullit gjerman, por dhe ai i popujve evropian.
*Fakulteti i Shkencave Politike dhe Politikave Botërore,Universiteti i Wrocłw(Poloni)
/Argumentum.al
