Kryeministri në detyrë i Kosovës, Albin Kurti, ka reaguar pas arrestimit të pesë personave të dyshuar për bashkëpunim me shërbimin sekret serb (BIA), duke e cilësuar këtë si një sukses të rëndësishëm të Agjencisë së Kosovës për Inteligjencë (AKI) dhe institucioneve të rendit në vend.
Në një postim në rrjetet sociale, Kurti nënvizoi se brenda pak më shumë se një viti janë arrestuar tre shqiptarë dhe dy serbë, të gjithë të dyshuar për përfshirje në veprimtari të inteligjencës serbe në territorin e Kosovës.
“Arrestimi i pesë personave të dyshuar për bashkëpunim me shërbimin sekret serb (BIA), është rezultat i operacioneve të suksesshme të udhëhequra nga AKI-ja në bashkëpunim me Policinë dhe Prokurorinë. Këto raste, përveçse dëshmojnë përpjekjet e vazhdueshme të Serbisë për destabilizim, konfirmojnë suksesin tonë në zbulimin dhe çmontimin e rrjeteve të inteligjencës serbe në Kosovë,” deklaroi Kurti.
Sipas Kryeministrit në detyrë, veprimtaritë e të dyshuarve përfshinin përpjekje për rishkrim të historisë në dëm të imazhit të luftës së UÇK-së dhe mohimin e masakrës së Reçakut, si dhe për infiltrime në organizata ndërkombëtare dhe qarqe ekstremiste fetare me synim dëmtimin e sigurisë dhe reputacionit të shtetit të Kosovës.
Kurti bëri të ditur se njëri nga të dyshuarit, i identifikuar si A.V., ka pranuar fajësinë pas përballjes me dëshmitë e mbledhura nga autoritetet.
“AKI ka treguar efikasitet të jashtëzakonshëm dhe aftësi të avancuara analitike e operative në mbrojtjen e sovranitetit dhe rendit kushtetues të Republikës së Kosovës,” theksoi ai.
Kryeministri në detyrë u bëri thirrje qytetarëve që të jenë të vëmendshëm dhe të angazhuar në përpjekjet për ruajtjen e stabilitetit dhe sigurisë, ndërsa trajtimin e suksesshëm të këtyre rasteve e konsideroi si një shembull për rritjen e vetëdijes dhe forcimin e frontit të përbashkët për siguri kombëtare.
