Presidenti i Serbisë, Aleksandar Vuçiç, po zhvillon sot një vizitë njëditore në Ukrainë, sipas njoftimit të bërë nga zyra e shtypit e presidencës serbe. Gjatë kësaj vizite, Vuçiç pritet të marrë pjesë në samitin “Ukrainë-Evropa Juglindore”, sipas agjencisë TANJUG.
Kujtojmë se më 28 shkurt, Shqipëria organizoi një edicion të këtij samiti në Pallatin e Kongreseve në Tiranë, ku presidenti ukrainas Volodymyr Zelensky zhvilloi vizitën e tij të parë në Shqipëri si bashkorganizator i takimit. Samiti kishte në fokus solidaritetin dhe angazhimin e vendeve demokratike të rajonit kundër agresionit rus, duke u përqendruar në forcimin e bashkëpunimit për mbështetjen e Ukrainës dhe rritjen e sigurisë e stabilitetit në Evropë dhe në rajon.
Vizita e Vuçiç në Ukrainë shënon herën e parë që ai shkel në këtë vend që prej shpërthimit të luftës me Rusinë. Udhëtimi i papritur i tij në një shtet që prej më shumë se dy vitesh përballet me pushtimin rus ka tërhequr vëmendjen, sidomos për shkak të qëndrimit tradicionalisht neutral të Serbisë.
Ky zhvillim nuk është pritur mirë nga Moska. Zëdhënësja e Ministrisë së Jashtme ruse, Maria Zakharova, ka reaguar ashpër, duke akuzuar Serbinë se po furnizon Ukrainën me armatime dhe municione. Ajo përdori një gjuhë të ashpër dhe nënkuptoi se Beogradi duhet të sqarojë pozicionin e tij mes Rusisë dhe atyre që ajo i quajti “neonazistë”.
“Ata që pretendojnë se duan të ndërtojnë marrëdhënie me Rusinë dhe të zhvillojnë dialog me të, duhet të pyesin veten: janë në anën e së vërtetës apo të neonazizmit?”, deklaroi Zakharova. Ajo u pyet gjithashtu nëse vizita e Vuçiç në qytetin Odesa ishte rezultat i presionit të Perëndimit, duke sjellë në vëmendje se disa javë më parë ai ishte pjesëmarrës në Paradën e Fitores në Sheshin e Kuq të Moskës.
/Argumentum.al
