Në një moment simbolik për historinë dhe identitetin kombëtar turk, Ambasada e Republikës së Turqisë në Tiranë organizoi një pritje solemne me rastin e 30 Gushtit – Ditës së Fitores dhe të Forcave të Armatosura Turke. Në një atmosferë miqësore dhe diplomatike, ngjarja jo vetëm përkujtoi një nga fitoret më të rëndësishme të Turqisë moderne, por shërbeu edhe si një dëshmi e marrëdhënieve të ngushta strategjike mes Turqisë dhe Shqipërisë.
Ceremonia u zhvillua në ambientet e një hoteli në kryeqytet, nën kujdesin e Ambasadorit të Turqisë në Shqipëri, Tayyar Kağan Atay, dhe atasheut ushtarak turk, kolonel Tolga Kip. Të pranishëm ishin përfaqësues të institucioneve turke në Shqipëri, zyrtarë të lartë shqiptarë, përfaqësues të Forcave të Armatosura Shqiptare, diplomatë, gazetarë, si dhe personalitete të fushave të ndryshme.
Pas interpretimit të himneve kombëtare të Turqisë dhe Shqipërisë nga Orkestra Frymore e Forcave të Armatosura Shqiptare, pjesëmarrësit patën mundësinë të ndjekin një video prezantuese që sillte në fokus rolin, aftësitë dhe zhvillimin e Forcave të Armatosura Turke. Videoja pasqyroi një panoramë të qartë të trashëgimisë historike, traditës ushtarake dhe kapaciteteve moderne teknologjike të ushtrisë turke, duke theksuar kontributin e saj në mbrojtjen kombëtare dhe misionet ndërkombëtare.
Gjithashtu gjatë ceremonisë u lexua edhe mesazhi i Presidentit të Turqisë, Recep Tayyip Erdoğan, për 30 Gushtin.
Kjo ditë historike, e cila shënon 103-vjetorin e fitores përfundimtare në Betejën e Dumlupinarit më 1922, përkujtohet çdo vit me nderim dhe krenari. Nën udhëheqjen e Mustafa Kemal Atatürkut, forcat turke arritën një fitore vendimtare ndaj ushtrisë pushtuese greke, duke i hapur rrugën shpalljes së Republikës së Türkiye-s dhe duke vulosur fitoren e Luftës së Pavarësisë.
Atasheu ushtarak Kip: “Forcat tona janë trashëgimtare të guximit historik”
Nga ana tjetër, kolonel Tolga Kip, atasheu ushtarak i Turqisë në Shqipëri, foli për trashëgiminë historike dhe përparimin teknologjik të Forcave të Armatosura Turke. Ai nënvizoi se shpirti i sakrificës dhe guximi i treguar nga ushtarët turq një shekull më parë është i njëjti që i udhëheq edhe sot.
“Forcat tona të armatosura janë ndër më të aftat në botë, duke kombinuar shekuj tradite ushtarake me fuqinë e teknologjisë moderne”, tha Kip, duke përmendur prodhimin vendas të anijeve luftarake, helikopterëve, dronëve, avionëve dhe sistemeve raketore si dëshmi të zhvillimit të industrisë së mbrojtjes turke.
Kolonel Kip theksoi gjithashtu aftësitë e larta operacionale dhe teknologjike të ushtrisë turke, duke theksuar zhvillimin e fuqishëm të industrisë turke të mbrojtjes, e cila prodhon një gamë të gjerë sistemesh moderne që shërbejnë jo vetëm për mbrojtjen kombëtare, por edhe për fuqizimin e NATO-s dhe partnerëve aleatë.
Ai e konsideroi të veçantë faktin që kjo ditë po përkujtohej në Shqipëri, një mik i afërt, aleat në NATO dhe partner strategjik i Turqisë. Koloneli vlerësoi marrëdhëniet e shkëlqyera ushtarake dhe mbrojtëse mes dy vendeve, duke përmendur bashkëpunimin në trajnime, shkollim të oficerëve shqiptarë në institucionet ushtarake turke, misionet e përbashkëta në kuadër të NATO-s, si dhe përdorimin e sistemeve të mbrojtjes turke nga Forcat e Armatosura të Shqipërisë.
Ambasadori Atay: “30 Gushti – simbol i qëndresës dhe unitetit kombëtar”
Në fjalimin e tij, ambasadori Tayyar Kağan Atay vuri në dukje domethënien historike të kësaj dite, duke e përshkruar si një moment kulmor në historinë turke. Ai theksoi se 30 Gushti nuk është thjesht një datë kalendarike, por një simbol i guximit, qëndresës dhe unitetit kombëtar, i mishëruar në fitoren vendimtare të Luftës së Pavarësisë më 1922, nën udhëheqjen e Mustafa Kemal Atatürk.
Ambasadori Atay theksoi se 30 gushti përkujton fitoren përfundimtare të Luftës së Pavarësisë, të udhëhequr nga themeluesi i Republikës së Turqisë, Mustafa Kemal Atatürk, një udhëheqës me vizion të madh dhe guxim të jashtëzakonshëm. Ai e cilësoi këtë ditë si jo vetëm një përvjetor historik, por edhe një simbol të unitetit dhe qëndresës së popullit turk në mbrojtje të lirisë dhe pavarësisë.
Në fjalën e tij, Ambasadori shprehu mirënjohje për Shqipërinë si vend mikpritës dhe për të gjithë aleatët e partnerët që ndanë këtë moment me popullin turk. Ai vuri në dukje rolin e pazëvendësueshëm të Forcave të Armatosura Turke si garanci për paqe dhe siguri, jo vetëm në Turqi, por edhe në kuadër të NATO-s, ku Turqia mbetet një anëtare e palëkundur dhe një kontribuese neto në stabilitetin rajonal dhe global.
Një nga momentet kyçe të fjalimit ishte theksimi i rikthimit të komandës së KFOR-it nga Turqia në muajin tetor, një sinjal i qartë për angazhimin e vazhdueshëm turk në Ballkan, një rajon me rëndësi të veçantë strategjike. Në një kohë kur arkitektura globale e sigurisë po ndryshon, roli udhëheqës i NATO-s po rikonfirmohet, dhe sipas ambasadorit Atay, Turqia është një shtyllë kyçe në këtë proces përmes fuqisë së saj ushtarake dhe zhvillimeve të avancuara në industrinë e mbrojtjes.
Ai solli në vëmendje një tjetër aspekt të rëndësishëm të marrëdhënieve turko-shqiptare: partneritetin strategjik, i cili është thelluar edhe më shumë me vendosjen në përdorim të dronëve të armatosur BAYKAR TB2 në Shqipëri. Këta dronë, tashmë pjesë e flotës së Forcave të Armatosura Shqiptare, i japin vendit një kapacitet të avancuar për sulm dhe mbikëqyrje, duke rritur kështu edhe fuqinë e NATO-s në rajon.
“Forcat e Armatosura Turke qëndrojnë si mbrojtëse të vlerave tona kombëtare. Si një anëtare e palëkundur e NATO-s, Turqia është një kontribuese neto për sigurinë rajonale dhe globale”, deklaroi ai, duke theksuar gjithashtu se Turqia do të marrë përsëri komandën e KFOR-it në Kosovë në muajin tetor, një shenjë e angazhimit të saj të vazhdueshëm në ruajtjen e paqes dhe stabilitetit në Ballkan.
30 Gushti, më shumë se një përvjetor historik, është një kujtesë e fuqishme për vlerat e lirisë, pavarësisë dhe unitetit kombëtar, vlera që Türkiye i ndan sot me aleatët dhe partnerët e saj strategjikë, si Shqipëria. Kjo ditë mbetet një burim frymëzimi për brezat e rinj, si dhe një dëshmi e vendosmërisë për të ndërtuar një të ardhme më të sigurt dhe më të qëndrueshme për të gjithë rajonin.
© 2025 Argumentum
