Ushtria izraelite paralajmëroi të premten se do të veprojë me “forcë të paprecedent” në Qytetin e Gazës, duke u bërë thirrje banorëve të largohen drejt jugut, ndërsa njoftoi mbylljen e një rruge të përkohshme evakuimi të hapur 48 orë më parë.
Në një postim në X duke iu drejtuar banorëve të Qytetit të Gazës, zëdhënësi i ushtrisë në gjuhën arabe, Avichay Adraee, tha:
Nga ky moment, rruga Salah al-Din është e mbyllur për udhëtimin drejt jugut. Forcat Mbrojtëse Izraelite do të vazhdojnë të veprojnë me forcë të paparë kundër Hamasit dhe organizatave të tjera terroriste.
Ai shtoi se e vetmja rrugë e mundshme drejt jugut ishte nëpërmjet rrugës Al-Rashid dhe u bëri thirrje banorëve të “shfrytëzojnë këtë mundësi dhe t’u bashkohen qindra mijëra banorëve të qytetit që janë zhvendosur në jug në zonën humanitare”.
Sulmet nga artileria, tanket dhe avionët luftarakë izraelitë goditën përsëri Qytetin e Gazës të enjten, ndërsa një zyrtar i OKB-së tha se “valë të reja zhvendosjeje masive” ishin në proces, pasi rreth 60,000 njerëz ikën nga sulmi i ri brenda 72 orëve më parë këtë javë, raporton The Guardian
Zyrtarët ushtarakë izraelitë thanë se Qyteti i Gazës ishte një “bastion i Hamasit” dhe se deri në 450,000 civilë ishin larguar.
Pjese të ndryshme të Qytetit të Gazës, dikur një qendër e ngarkuar tregtare dhe kulturore, janë shndërruar në rrënoja të pabanueshme. Deri para disa javësh, atje jetonin më shumë se një milion njerëz, shumë prej të cilëve ishin zhvendosur disa herë.
Ofensiva e mbështetur nga SHBA-të në Qytetin e Gazës filloi më 16 shtator dhe erdhi ndërsa një hetim i OKB-së akuzoi Izraelin për kryerjen e “gjenocidit” në Rripin e Gazës, duke thënë se kryeministri Benjamin Netanyahu dhe zyrtarë të tjerë të lartë e kanë nxitur krimin.
Izraeli i hodhi poshtë gjetjet dhe i quajti ato “të shtrembëruara dhe të rreme”.
Sulmi i Hamasit ndaj Izraelit më 7 tetor 2023, i cili shkaktoi luftën, rezultoi në vdekjen e 1,219 personave, shumica e të cilëve civilë.
Fushata hakmarrëse e Izraelit ka vrarë të paktën 65,141 persona, kryesisht civilë.
/Argumentum.al
