Zyra e Bashkimit Evropian në Prishtinë dhe Ambasada e Shteteve të Bashkuara kanë reaguar ashpër pas vendimit të Komisionit Qendror të Zgjedhjeve (KQZ) për të mos e certifikuar Listën Serbe për zgjedhjet e parakohshme parlamentare të 28 dhjetorit.
Në një deklaratë të publikuar mbrëmjen e së martës, Zyra e BE-së shprehu keqardhje për vendimin, duke paralajmëruar se politizimi i procesit brenda KQZ-së po cenon integritetin e zgjedhjeve.
“Politizimi i KQZ-së nga Lëvizja Vetëvendosje dhe partitë e tjera politike është i dëmshëm për procesin zgjedhor gjithëpërfshirës që është në përputhje me standardet ndërkombëtare dhe raportin e Misionit të BE-së për Vëzhgimin e Zgjedhjeve”, thuhet në reagim.
Edhe ambasadori britanik në Kosovë, Jonathan Hargreaves, shprehu shqetësim për, siç u shpreh ai, “përpjekjet e fundit nga aktorët politikë për të mos e lejuar Listën Serbe të marrë pjesë në zgjedhje”, duke paralajmëruar se këto veprime minojnë reputacionin e Kosovës si një demokraci shumetnike.
Reagimi i ashpër i SHBA-së: Vendim “shkurtpamës dhe përçarës”
Pas zhvillimeve, edhe Ambasada e SHBA-së në Prishtinë publikoi sot një reagim të fortë, duke e cilësuar rolin e Lëvizjes Vetëvendosje në këtë proces si “shkurtpamës dhe përçarës”.
“Përpjekjet e VV-së për ta bllokuar certifikimin që Lista Srpska të marrë pjesë në zgjedhjet e Kosovës janë shkurtpamëse dhe përçarëse. Të gjithë qytetarët e Kosovës duhet të jenë në gjendje të ushtrojnë të drejtat e tyre demokratike. Veprime të tilla minojnë stabilitetin e Kosovës dhe interesat e SHBA-së, përfshirë rinisjen e dialogut tonë strategjik për avancimin e mundësive për bizneset amerikane dhe kosovare”, thuhet në reagim.
SHBA paralajmëroi se veprimet e tilla rrezikojnë stabilitetin e Kosovës dhe ndikojnë negativisht edhe në interesat strategjike amerikane, përfshirë ringjalljen e dialogut strategjik dhe mundësitë ekonomike mes dy vendeve.
Si u mor vendimi në KQZ
Në mbledhjen e së martës, rekomandimi për certifikimin e Listës Serbe mori vetëm 2 vota pro, ndërsa 2 votuan kundër dhe 7 abstenuan. Anëtarët e Vetëvendosjes, Sami Kurteshi dhe Alban Krasniqi, votuan kundër, duke argumentuar se Lista Serbe “punon kundër interesave të Kosovës”.
Partitë e tjera shqiptare në KQZ – PDK, LDK dhe AAK – abstenuan.
Lista Serbe, që gëzon mbështetje të plotë nga Beogradi dhe është partia kryesore e komunitetit serb në Kosovë, ka të drejtë të paraqesë ankesë në Panelin Zgjedhor për Ankesa dhe Parashtresa (PZAP), i cili edhe në dy rastet e kaluara e ka rrëzuar vendimin e KQZ-së për moscertifikim.
Reagime të tjera ndërkombëtare dhe rajonale
Vendimi u kritikua po ashtu nga OSBE-ja, e cila e cilësoi situatën si “thellësisht shqetësuese”, duke theksuar se politizimi brenda KQZ-së po minon paanshmërinë dhe besueshmërinë e institucionit zgjedhor.
Nga ana tjetër, ministri i Jashtëm i Serbisë, Marko Gjuriq, e quajti vendimin “plotësisht të papranueshëm”, duke pretenduar se ai paraqet qëndrim negativ ndaj një komuniteti të tërë kombëtar.
Zgjedhjet e parakohshme dhe sfutat politike
Kosova po shkon drejt zgjedhjeve të parakohshme pasi Lëvizja Vetëvendosje nuk arriti ta sigurojë shumicën e nevojshme për formimin e qeverisë. Ndonëse fitoi zgjedhjet e 9 shkurtit, 48 ulëset e saj në Kuvend rezultuan të pamjaftueshme për të ndërtuar koalicion.
Moscertifikimi i Listës Serbe ka hapur një debat të gjerë për kredibilitetin e procesit zgjedhor dhe për marrëdhëniet e Kosovës me partnerët ndërkombëtarë, të cilët kanë kërkuar qartazi që të garantohet pjesëmarrja e të gjitha komuniteteve në zgjedhje.
/Argumentum.al
