Kryetari i Komitetit për Punët e Jashtme (AFET) i Parlamentit Evropian, David McAllister deklaroi sot në një konferencë për mediet, integrimi në Bashkimin Europian është vendimtar për Shqipërinë.
McAllister theksoi se vizita vjen në një moment vendimtar për Shqipërinë, teksa vendi ka hapur grupkapitullin e fundit të negociatave për anëtarësim në Bashkimin Europian dhe pret raportin e vlerësimit të progresit të saj.
Ai vlerësoi rezultatet e arritura nga Shqipëria në hapjen e të gjithë kapitujve brenda 13 muajve, por shtoi se nuk ka kohë për vetëkënaqësi dhe vendi duhet të intensifikojë punën për të përmbushur kërkesat e BE-së dhe për të përfunduar negociatat.
“Vizita jonë vjen në një moment shumë vendimtar, teksa Shqipëria ka hapur grupkapitullin e fundit të negociatave për anëtarësim në BE dhe është në pritje të raportit të vlerësimit të punës së saj. Ne vazhdojmë mbështetjen e fortë për Shqipërinë në rrugën e integrimit në BE. Njohim rezultatet e arritura për hapjen e të gjithë kapitujve brenda 13 muajve. Por nuk ka kohë për vetëkënaqësi. Shqipëria duhet të vazhdojë dhe të punojë edhe më shumë për të përmbushur kërkesat dhe për të mbyllur negociatat”, tha ai.
Ai theksoi se tre prioritetet kryesore që duhet të adresohen janë lufta ndaj korrupsionit, reforma zgjedhore dhe ruajtja e stabilitetit politik.
Sa i përket luftës kundër korrupsionit, McAllister nënvizoi nevojën për të ruajtur ritmin e deritanishëm, duke shtuar se sistemi i drejtësisë duhet të plotësohet me staf të mjaftueshëm dhe të funksionojë pa presion politik, ndërsa politika duhet të japë shembullin dhe ta mbështesë këtë proces.
“Ekziston nevoja për ta ruajtur forcën shtytëse në luftën ndaj korrupsionit. Shumë është arritur në këtë fushë, por ende nuk është në nivelin e kënaqshëm. Vetëm javën që shkoi në raportin e TIA, Shqipëria ka rënë me 11 vende”, u shpreh ai.
“Është e nevojshme që të ketë një zbatim të plotë të legjislacionit, të ketë plotësim me staf të strukturave të drejtësisë, mos ketë ndërhyrje politike në to dhe duhet që politikanët të udhëheqin duke dhënë ata vetë shembullin”, tha ai.
Në lidhje me reformën zgjedhore, ai u shpreh se është e nevojshme një reformë reale, gjithëpërfshirëse dhe në përputhje me rekomandimet e OSBE/ODIHR, e cila të zbatohet brenda afateve të caktuara.
“Dëshirojmë të shohim një reformë zgjedhore reale, që të bëhet në kohë të mjaftueshme përpara zgjedhjeve të ardhshme. Një reformë që të jetë gjithëpërfshirëse dhe të zbatojë rekomandimet e lëna nga OSBE/ODIHR”, tha ai.
“Së treti, dëshirojmë të shohim më shumë përpjekje sa i takon lirisë së shprehjes dhe pluiralizmit mediatik dhe kjo kërkon më shumë transparencë sa u takon pronarëve dhe pronësisë së mediave si edhe masave garantuese për të mbrojtur mediet nga presionet politike dhe nga sulmet kundër gazetarëve”, tha ai.
Për sa i përket mbështetjes së institucioneve dhe procesit të zgjerimit, McAllister theksoi se procesi i zgjerimit është meritokratik, ku secili vend vlerësohet sipas arritjeve të tij, por shprehu shqetësimin për polarizimin politik në vend dhe theksoi se protestat e dhunshme nuk kanë vend në një demokraci funksionale.
“Procesi i zgjerimit është një proces i bazuar mbi meritën; secili vend vlerësohet në bazë të përmbushjes së kritereve. Por jemi të shqetësuar për polarizimin politik në vend. Protestat e dhunshme nuk kanë vend në një demokraci funksionale”, tha McAllister.
Ai ripërsëriti mbështetjen e Parlamentit Europian për Shqipërinë në rrugën drejt integrimit, duke nënvizuar se respektimi i ligjit, lufta ndaj korrupsionit dhe stabiliteti politik janë elementë kyç për arritjen e një integrimi të suksesshëm në Bashkimin Europian.
Ai shprehu gjithashtu shqetësim për protestat e dhunshme
“Jemi të shqetësuar për polarizimin politik në vend. Protestat e dhunshme nuk kanë vend në një demokraci funksionale”, tha McAllister.
McAllister: Nuk komentojmë çështje individuale që janë në hetim
Kryetari i Komitetit për Punët e Jashtme (AFET) i Parlamentit Evropian, David McAllister, deklaroi sot në një konferencë për mediat, i pyetur mbi çështjen që lidhet me zv/kryeministren Belinda Balluku, se nuk mund të komentojë raste të veçanta, ndërsa shtoi se kjo është një çështje juridike që ka edhe përgjegjësi politike.
“Sigurisht që kjo temë është folur, por unë nuk mund të jap komente për çështje dhe emra konkretë. Jam në dijeni të kësaj çështjeje, por është një çështje që nuk ka të bëjë vetëm me aspektet ligjore, por edhe me dimensionin politik.”
“Nuk mund të komentoj çështje individuale, por për këtë rast, çështja që përfshin Ballukun, është një test kritik për Shqipërinë në luftën ndaj korrupsionit”, u shpreh ai.
Ambasadori i BE në Tiranë, Silvio Gonzato, tha se pret që Bashkimi Evropian të konsultohet për ndryshimet ligjore të propozuara në Kodin e Procedurës Penale.
“Siç e dini, ne i kemi ndjekur nga afër të gjitha nismat e qeverisë që kanë të bëjnë me shtetin e së drejtës. Kemi shqetësim që mos të preket Reforma e drejtësisë e vitit 2016. Presim që të konsultohemi për këtë nismë”, u shpreh Gonzato.
