Kohët e fundit, Ministria e Tregtisë e Kinës shpalli përfshirjen e 20 subjekteve japoneze në listën e kontrollit të eksportit, si edhe të 20 të tjerave në listën e vëzhgimit. Kjo është një kundërpërgjigje tjetër e saktë nga pala kineze sipas ligjit, pasi shpalli mbi një muaj më parë kontrollin e eksportit të artikujve me përdorim të dyfishtë ndaj Japonisë, me qëllim që të ndalojë orvatjet e Japonisë për përshpejtimin e nxitjes së “rimilitarizimit” dhe për disponimin e armëve bërthamore, në të mirë të mbrojtjes së paqes rajonale e botërore. Analistët janë të mendimi se ky veprim i palës kineze është i drejtë, i arsyeshëm e i ligjshëm dhe përputhet me pritshmërinë e botës dhe interesat globale, thuhet në një koment të Grupit Mediatik të Kinës (CMG).
Nga këndvështrimi i veprimeve aktuale të ndërmarrjeve ushtarake japoneze, është e domosdoshme të vendosen sanksione ndaj tyre, vijon komenti. “Mitsubishi Heavy Industries”, “Kawasaki Heavy Industries” dhe kompani të tjera të përfshira në listën e kontrollit të eksportit, ishin forca kryesore në prodhimin e armëve të agresionit gjatë Luftës së Dytë Botërore dhe tani janë bërë pararojë e “rimilitarizimit” të Japonisë dhe sjellja e tyre tashmë ka prekur vijën e kuqe të sigurisë rajonale. Për shembull, “Mitsubishi Heavy Industries” është kompleksi më i madh ushtarako-industrial i Japonisë, që jo vetëm fitoi 2.84 miliardë dollarë kontrata kërkim-zhvillimi raketash dhe 6.8 miliardë dollarë në porositë e anijeve luftarake australiane, por drejtoi edhe zhvillimin e raketave të përmirësuara kundër anijeve të tipit 12 me një rreze prej mbi 1 000 kilometrash, duke marrë pjesë thellësisht në kërkim-zhvillimin e teknologjisë bërthamore e duke ofruar mbështetje teknike për potencialin e armatimit bërthamor të Japonisë. Ndërsa “Kawasaki Heavy Industries” ndërmori kërkim-zhvillimin e pajisjeve për njësitë japoneze të operacioneve hapësinore dhe eksportoi raketa kundërajrore dhe fregata të nxjerra jashtë shërbimit në Filipine.
Mund të shihet se këto ndërmarrje janë të lidhura thellësisht me sistemin e industrisë ushtarake japoneze dhe janë bërë shtyllat industriale të zgjerimit ushtarak të Japonisë, vihet në dukje në komentin e CMG-së. Sipas të dhënave, pesë kompani ushtarake japoneze, duke përfshirë “Mitsubishi Heavy Industries” dhe “Kawasaki Heavy Industries”, patën të ardhura nga shitjet prej 13.3 miliardë dollarësh në vitin 2024, me një rritje 40 % në krahasim me vitin 2024. Në bazë të dispozitave përkatëse të ligjeve dhe rregulloreve kineze, si Ligji i Kontrollit të Eksportit i Republikës Popullore të Kinës dhe Rregulloret e Republikës Popullore të Kinës për Kontrollin e Eksportit të Artikujve me Përdorim të Dyfishtë, Kina ka forcuar kontrollet e eksportit ndaj Japonisë. Kjo bëhet pikërisht për të ndërprerë “ushqimin” e militarizimit të Japonisë dhe për të sulmuar drejtpërdrejt themelet industriale të zgjerimit dhe forcimit ushtarak të Japonisë, duke qenë një masë e nevojshme për të parandaluar rreziqet e sigurisë.
Nga këndvështrimi i prirjes së rrezikshme të qeverisë së Sanae Takaichi-t në fushën e sigurisë, kundërpërgjigjja e saktë e Kinës është gjithashtu e ligjshme. Pas zgjedhjeve për Dhomën e Përfaqësuesve të Japonisë në shkurt të këtij viti, Partia Liberaldemokrate e udhëhequr nga Takaichi bëri hapa të mëtejshëm në rrugën e zgjerimit ushtarak duke u mbështetur në pozitën e saj dominuese në parlament. Ato përfshijnë nga orvatja për përfshirjen e Forcave të Vetëmbrojtjes në nenin e 9-të të Kushtetutës Paqësore dhe për t’u shkëputur nga frenimet ligjore të “heqjes dorë nga lufta”, deri te rritja e buxhetit të mbrojtjes për vitin fiskal 2026 në 9.04 trilionë jenë (rreth 57.9 miliardë dollarë amerikanë), shifër kjo që përbën mbi 2 % të PBB-së, për të formuar me të gjitha forcat një sistem të goditjes mësymëse me rreze të gjatë; nga heqja dorë prej ndalimit të eksportit të armëve, duke dërguar armë të ndryshme në 12 vende për të thurur një rrjet rajonal të rrethimit strategjik, deri te pretendimi për të rishikuar “Tre parimet jobërthamore” dhe “Tre dokumentet e sigurisë” të Japonisë…
Prirja e rritjes së buxhetit të mbrojtjes të Japonisë gjatë periudhës 2023-2026 / CMG
Ndërsa nga këndvështrimi i mbrojtjes së paqes rajonale dhe botërore, qasja e Kinës përputhet me pritshmëritë e komunitetit ndërkombëtar. Në një sërë dokumentesh ndërkombëtare që vendosën rendin e pasluftës dhe në Kushtetutën japoneze kërkohen qartazi çrrënjosja e kushteve për militarizmin dhe kufizimi i zhvillimit ushtarak të Japonisë. Pas “rimilitarizimit” të Japonisë qëndron çështja e mosshlyerjes krejtësisht të fajit të agresionit. Sot organizatat e krahut të djathtë të Japonisë kontrollojnë Kongresin, duke manipuluar tekstet mësimore, duke dobësuar faktet historike të agresionit, duke shtrembëruar njohjen historike dhe duke kultivuar terrenin ideologjik për ringjalljen e militarizmit. Fakti i nxitjes së shfrenuar të zgjerimit ushtarak nga një vend që nuk mund të reflektojë thellë mbi historinë e tij të agresionit, jo vetëm do të acarojë rënien e nivelit të jetesës së popullit të tij, recesionin ekonomik dhe ndarjen shoqërore, por gjithashtu do të shkaktojë një garë rajonale armatimesh, do të goditë sistemin global të mospërhapjes bërthamore dhe do të përmbysë rendin ndërkombëtar pas Luftës së Dytë Botërore.
Duhet vënë në dukje se masat e kontrollit të eksportit të Kinës ndaj Japonisë janë krejtësisht në përputhje me ligjin e praktikën ndërkombëtare. Ato synojnë vetëm disa subjekte të përfshira në zgjerimin ushtarak dhe nuk ndikojnë në shkëmbimet normale ekonomike e tregtare midis Kinës dhe Japonisë, thuhet në komentin e CMG-së.
Paqja dhe zhvillimi janë synimi i përjetshëm i njerëzimit dhe shpresa e përbashkët e të gjitha vendeve të Azisë Lindore, vihet në dukje në koment, duke shtuar që bashkësia ndërkombëtare duhet të bashkohet për të parandaluar ringjalljen e militarizmit japonez, për të mbrojtur fitoren e Luftës së Dytë Botërore dhe për të ruajtur paqen dhe lulëzimin botëror./cgtn
