Protesta kundër investimit të planifikuar në Zvërnec të Vlorës ka hyrë sot në ditën e tetëmbëdhjetë, ndërsa qytetarë, aktivistë të shoqërisë civile dhe mbështetës të kauzës vijojnë të mblidhen çdo mbrëmje në Tiranë për të kërkuar ndalimin e projektit, mbrojtjen e pasurive natyrore dhe ndryshime në drejtimin politik të vendit.
Ashtu si në ditët e mëparshme, protestuesit kërkuan dorëheqjen e kryeministrit Edi Rama dhe kreut të opozitës Sali Berisha, ndërsa përsëritën edhe katër kërkesat e tjera që kanë artikuluar që prej nisjes së lëvizjes. Në qendër të qëndrimeve të tyre mbetet kundërshtimi i asaj që ata e cilësojnë si shitje të pasurive kombëtare dhe dëmtim të zonave të mbrojtura.
Për shkak të temperaturave të larta, organizatorët vendosën që protesta të niste në orën 19:00, një orë më vonë se zakonisht. Pas grumbullimit në sheshin “Skënderbej”, pjesëmarrësit marshuan përgjatë bulevardit “Dëshmorët e Kombit” drejt Kryeministrisë.
Me pankarta në duar dhe thirrje si “Revolucion”, “Dorëheqje” dhe “Shqipëri e re”, protestuesit u vendosën përpara godinës së Kryeministrisë, ku ritheksuan kërkesat e tyre.
“Nuk do të ndalemi. Sot ka ndodhur një zhvillim i rëndësishëm, pasi në Parlamentin Europian është kërkuar që ligji për zonat e mbrojtura të amendohet dhe të rikthehet për shqyrtim. Kjo ka qenë kërkesa jonë që nga dita e parë”, u shpreh një nga protestuesit.
Një nga veçantitë e protestës së sotme ishte vendosja në qendër të zërit të pensionistëve dhe të moshuarve. Organizatorët kishin bërë thirrje që të rinjtë të sillnin në protestë gjyshërit dhe gjyshet e tyre, si simbol i vështirësive ekonomike me të cilat përballen pensionistët.
“Në familjen e secilit prej nesh ka të moshuar që nuk mund të jetojnë me dinjitet vetëm me pensionin e tyre dhe varen nga ndihma e fëmijëve në emigracion. Sot thirrja ishte: ‘Merr gjyshin në protestë. Nëse gjyshi nuk vjen dot, protesto për gjyshin’”, tha një protestuese.
Ndërkohë, një pensionist ngriti shqetësimin për nivelin e ulët të pensioneve në vend, duke krahasuar Shqipërinë me vendet fqinje.
“Duhet të dëgjohet edhe fjala e pensionistëve. Maqedonia e Veriut dhe Mali i Zi kanë pensione më të larta se ne. Si shpjegohet që në Shqipëri pensionet mbeten kaq të ulëta?”, tha ai.
Një tjetër protestuese iu referua zhvillimeve të ditës në Parlamentin Europian, duke deklaruar se eurodeputetët kanë kërkuar një moratorium të menjëhershëm për ligjin e zonave të mbrojtura dhe pezullimin e lejeve të ndërtimit në këto zona deri në një rivlerësim të plotë të situatës.
Protesta e sotme u dallua edhe për simbolikat e përdorura. Një bari iu bashkua tubimit së bashku me tufën e tij të dhive, duke tërhequr vëmendjen e të pranishmëve. Ai tha se “dhitë janë me flamingot”, duke shprehur mbështetjen për mbrojtjen e natyrës dhe kundërshtimin e ndërhyrjeve që, sipas protestuesve, rrezikojnë habitatet natyrore në zonat e mbrojtura.
Mes pankartave kundër qeverisë dhe thirrjeve për dorëheqjen e kryeministrit Edi Rama, në protestën e ditës së 18-të nuk munguan as mesazhet kritike ndaj reformës në drejtësi dhe institucioneve të vettingut.
Vëmendjen e të pranishmëve e tërhoqi një pankartë me mbishkrimin “Poshtë drejtësia sorosiane!”, në të cilën ishin vendosur edhe fotografitë e ish-Prokurores së Përgjithshme, Ina Rama, dhe anëtarit të Komisionit të Posaçëm të Apelimit (KPA), Sokol Çomo.
Në pankartë përfshiheshin akuza dhe kritika të drejtuara ndaj dy figurave të përmendura, si dhe ndaj procesit të vettingut dhe institucioneve të krijuara në kuadër të reformës në drejtësi.
Pas afro dy orësh qëndrimi përpara Kryeministrisë, ashtu si edhe në mbrëmjet e mëparshme, protestuesit zhvilluan marshimin e tyre nëpër rrugët kryesore të kryeqytetit, duke përcjellë mesazhet dhe kërkesat e tyre. Organizatorët kanë bërë të ditur se tubimet do të vijojnë edhe në ditët në vazhdim.
/Argumentum.al
