Presidenti i Shteteve të Bashkuara, Donald Trump, ka vendosur të zgjasë edhe për një vit gjendjen e emergjencës kombëtare në lidhje me Ballkanin Perëndimor, duke mbajtur në fuqi regjimin e sanksioneve ndaj individëve dhe subjekteve që konsiderohen kërcënim për paqen, stabilitetin dhe institucionet demokratike në rajon.
Sipas dokumentit të publikuar nga Euronews Albania, administrata amerikane vlerëson se situata në Ballkanin Perëndimor vijon të paraqesë rreziqe për sigurinë kombëtare dhe politikën e jashtme të Shteteve të Bashkuara.
Në arsyetimin e vendimit theksohet se mbeten shqetësuese përpjekjet për të minuar sovranitetin dhe integritetin territorial të vendeve të rajonit, për të dobësuar institucionet e krijuara pas konflikteve të viteve ’90, si dhe rastet e korrupsionit të rëndë që cenojnë sundimin e ligjit dhe zhvillimin demokratik.
Shtëpia e Bardhë vlerëson gjithashtu se veprimet destabilizuese, dhuna ekstremiste dhe përpjekjet për t’iu shmangur sanksioneve amerikane vazhdojnë të përbëjnë kërcënim për stabilitetin rajonal dhe interesat strategjike të SHBA-së.
Me këtë vendim, baza ligjore që mundëson vendosjen dhe zbatimin e sanksioneve ndaj personave dhe organizatave të përfshira në aktivitete destabilizuese në Ballkanin Perëndimor do të mbetet në fuqi deri në qershor të vitit 2027.
Regjimi i emergjencës kombëtare për Ballkanin Perëndimor është në fuqi që prej vitit 2001 dhe është zgjeruar ndër vite për të përfshirë jo vetëm kërcënimet ndaj marrëveshjeve të paqes, por edhe korrupsionin e rëndë, minimin e institucioneve demokratike dhe aktivitetet që cenojnë stabilitetin e rajonit.
/Argumentum.al
