Spanja ka vendosur të dislokojë forca ushtarake në enklavën e saj të Ceutës, pas një vale të madhe emigrantësh që hynë nga Maroku duke notuar në det, raportoi BBC.
Sipas autoriteteve, të paktën 18 persona kanë humbur jetën gjatë përpjekjes për të arritur në territorin spanjoll. Përballë rritjes së ndjeshme të kalimeve të paligjshme, autoritetet lokale kërkuan ndërhyrjen e qeverisë në Madrid, pasi situata doli jashtë kontrollit dhe masat e sigurisë në kufi u dobësuan.
Ministria e Brendshme e Spanjës njoftoi se ushtria do të mbështesë Gardën Civile në ruajtjen e rendit dhe sigurisë në qytet. Paralelisht, Madridi bëri të ditur se po bashkëpunon me autoritetet marokene për riatdhesimin sa më të shpejtë të personave që kanë hyrë në mënyrë të paligjshme.
Sipas mediave spanjolle, vetëm gjatë ditës së djeshme në Ceuta mund të kenë hyrë mes 2,000 dhe 3,000 emigrantë, megjithëse autoritetet nuk kanë publikuar ende një bilanc zyrtar. Ndërkohë, qindra persona të tjerë arritën të kalojnë edhe në Melilla, enklava tjetër spanjolle në Afrikën e Veriut.
Pamjet nga terreni treguan mijëra emigrantë, kryesisht të rinj, që kaluan natën në rrugë, ndërsa nuk munguan përplasjet me forcat e policisë dhe incidentet me hedhje gurësh pranë pikave kufitare.
Në qytetin maroken të Fnideq, pranë kufirit me Ceutën, autoritetet përdorën ujë me presion për të shpërndarë turmat dhe për të penguar kalimet drejt territorit spanjoll.
Ceuta dhe Melilla janë dy territoret e vetme të Bashkimit Evropian me kufi tokësor me Afrikën dhe prej vitesh përbëjnë një nga pikat kryesore të hyrjes së emigrantëve drejt Evropës.
Kriza ka nxitur edhe tensione politike brenda Bashkimit Evropian. Kryeministrja italiane, Giorgia Meloni, deklaroi se Italia po shqyrton masa të jashtëzakonshme, përfshirë mundësinë e pezullimit të përkohshëm të rregullave të zonës Shengen me Spanjën, duke e cilësuar emigracionin e pakontrolluar si një kërcënim për sigurinë e kufijve evropianë.
Nga ana tjetër, ministri i Jashtëm spanjoll, José Manuel Albares, kritikoi deklaratat e Romës, duke i cilësuar ato si një “politizim të çështjes së emigracionit” dhe bëri thirrje për një përgjigje të përbashkët dhe më shumë solidaritet nga vendet e Bashkimit Evropian.
Zhvillimet e fundit rikthejnë kujtimet e krizës së majit 2021, kur rreth 8,000 persona hynë në Ceuta nga Maroku brenda pak ditësh, duke shkaktuar një përkeqësim të ndjeshëm të marrëdhënieve diplomatike mes Madridit dhe Rabatit.
© 2026 Argumentum
