REAL POLITIK NR. 130
21 KORRIK – 20 GUSHT 2026
Komente “ flash” mbi 4 ngjarjet kryesore diplomatike, shqip dhe shkurt, vetëm me 1000 fjalë nga analisti i njohur, Mjeshtër i Madh në Diplomaci
1.Beogradi, Zelenski dhe Konsullata! Në fund të muajit korrik tërhoqën vëmendjen deklarata e Ministres serbe Snezana Paunoviç për spastrimin etnik të Kosovës; marrëveshja për çeljen e Kosullatës serbe në Shkodër në këmbim të hapjes së Konsullatës sonë në Bujanoc dhe deklarimi i Presidentit Zelenski në Beograd më 10 Gusht për mosnjohjen e Kosovës. Tri ngjarje që vunë në provë edhe koherencën dhe konseguencën e diplomacisë sonë për Kosovën. Ra në sy për keq qëndrimi i Kryeministrit Rama ndaj bashkombasve në Tiranë, në Prishtinë dhe gjetkë, të cilët në të drejtën e tyre qytetare kërkuan prononcimin e tij çka mungoi. U justifikua me deklaratën e Ministrit të Jashtëm Hoxha, duke e quajtur thjesht marrëzi deklarimin e saj! Ky ”kurnacllëk” dhe negativitet kryeministror për çështje të tilla madhore kur nuk le gjë pa folur, nuk la shije të mirë.
Lidhur me konsullatën, deklarata e MEPJ-së nuk ishte bindëse për reciprocitetin. Sepse ai nuk zbatohet automatikisht dhe në të njëjtin rast, por sipas nevojës përkatëse dhe jo detyrimisht në të njëjtën fushë. Po, çelja e Konsullatës sonë në Bujanoc është plotësisht e justifikuar me mbi 100.000 shqiptarë dhe shumë probleme që ulërasin për zgjidhje. Ndërsa Konsullata serbe në Shkodër është krejtësisht e panevojshme. Se në Shkodër ka vetëm 54 shtetas serbë, dhe se vetëm 2 ora larg është Ambasada e Serbisë në Tiranë! Edhe këtu qndrimi i Ramës ishte në anën e Beogradit. Dhe së treti, me të drejtë shumë bashkëatdhtarë e kritikuan Zelenskin për mosnjohjen e Kosovës dhe pretendimin e tij se ajo na shkelka të drejtën ndërkombëtare! Përkundrazi, GJND e ka konfirmuar përputhshmërinë e saj me këtë të drejtë. Pastaj, Zelenski fare mirë mund ta kishte shmangur përgjigjen e gabuar ose ta kishte kaluar me finesë por jo duke dalë kundër qëndrimit europian dhe amerikan. Edhe më rëndë gaboi Rama kur iu turr pa të drejtë bashkështetasve, duke i etiketuar si i turbo-folk dhe nacionalistë. Në atë rast Rama do kishte bërë mirë të mos kishte folur fare, se ta trashte zullumin e tij alla serb! Madje, ai duhej t’i përgëzonte qytetarët e vet por jo t’i stigmatizonte dhe viktimizonte!
2. Pakti europian i azilit futi ujë qysh në rastin e parë!Kriza e azilit në enklavën spanjolle Ceuta në fund të muajit korrik tregoi dështimin e Paktit të sapomiratuar të migrimit pas 14 vitesh debatesh dhe diskutimesh të ashpra! Ai tregoi paaftësinë e forcave të sigurisë spanjolle dhe europiane në këtë fushë me ndjeshmëri të madhe publike. Arsyet janë treguar edhe te ARGUMENTUM, por ciladoqofshin ato diçka nuk funksionon ende në këtë drejtim; ndaj BE-ja duhet të gjejë pikat e dobëta dhe vendet se ku “fut ujë“ anija e saj, që të tilla raste të mos përsëriten më në të ardhmen.
3. Droni në Laipcig dhe lufta hibride!!Më 5 Gusht, në Aeroportin e Laipcigut në Gjermani u zbulua fare pranë pistës së fluturimit një dron me lëndë plasëse. Po të kishte shpërthyer, çka nuk ndodhi vetëm për një difekt të vogël te ndezësi, do të ishte shkatërruar një avion i madh mallrash ” Antonov” i ngarkuar me armë për në Ukrainë dhe shumë dëme të tjera të mëdha materiale. Edhe pse aeroporti në fjalë ka sistem mbrojtjeje anti-dron, në këtë rast ajo dështoi, çka dëshmon se pajisjet e tanishme nuk janë të nivelit që të përballojnë sulme me dronë. Alarmi dhe paniku në politikën, median dhe publikun gjerman ishte i menjëhershëm dhe i jashtëzakonshëm. Ministri i Brendshëm Federal, Alexander Dobrindt ndërpreu pushimet dhe u kthye në Berlin. Ai foli për një sulm me dron tejet profesional dhe të përgatitur me kohë. Dobrindt e konsideroi këtë sulm si pjesë përbërëse të luftës hibride të ”fuqive të huaja” duke nënkuptuar qartë Rusinë, që nuk e përmendi me emër se nuk ka dëshmitë përkatëse. Por eksperti i mirënjohur i luftës kundër terrorizmit ndërkombëtar, Peter Naumann, Profesor në King’s College në Londër thotë se ”lufta hibride” ka të bëjë pikërisht me Rusinë, protagoniste e kësaj lufte. Ca më tepër kur dihet se në Aeroportin e Laipcigut ndodhen disa avionë të mëdhenj mallrash ukrainas, të cilët transportojnë armë dhe municione për në Kiev.
Për sqarim, lufta hibride synon dëmtimin dhe destabilizimin e një shteti tjetër pa dërguar ushtarë por kryesisht me akte sabotazhi, sulme kibernetike, sulme ndaj infrastrukturës energjitike dhe dixhitale, propagandë armiqësore dhe ndërhyrje në proceset zgjedhore. Ajo i paraprin konfrontimit ushtarak, duke krijuar panik dhe pasiguri. Sipas ekspertit ushtarak austriak, Kolonel Markus Reisner, ”në shoqëritë e vendeve europiane, 1000 trolle Interneti kanë shumë më tepër efekt se sa 100.000 ushtarë të armatosur rëndë”.
Kjo ngjarje tregon se pas Rumanisë, Polonisë dhe vendeve balltike, Rusia tani po shinjestron edhe Gjermaninë. Madje, ekspertët kanë paralajmëruar me kohë se Gjermania është objektivi parësor i luftës hibride ruse, në forma dhe mjete të ndryshme, ku sulmet me dronë po zenë vendin kryesor.
4. Ja pse duhet armëpushimi në shtator! Me afrimin e vjeshtës, është shtruar pyetja madhore nëse mund të ketë armëpushim në vjeshtë, çka do t’i hapte rrugën bisedimeve për një marrëveshje paqeje të qëndrueshme në Ukrainë dhe me Iranin.
Sipas ekspertëve, mundësitë për armëpushim janë, nisur nga gjendja dhe treguesit kryesorë të të gjitha palëve të përfshira në luftë dhe në konflikt. Sidomos gjendja e rëndë e krijuar për Rusinë muajt e fundit në terrenin e luftës por edhe perspektiva e zymtë për Ukrainën në prag të dimrit të ardhshëm pas bombardimeve ruse, shkatërruese për infrastrukturën energjitike dhe furnizimit me ujë në Kiev dhe gjetkë. Po, ashtu, nga ana politike, në fillim të muajit nëntor në SHBA do të jenë zgjedhjet e mesmandatit për Kongresin ku sondazhet janë tejet negative për Republikanët e Trump-it. Kësisoj, nëse ai do që të dali mirë në ato zgjedhje, i duhet patjetër një armëpushim premtues për paqe aty dhe në Iran. Ndaj po ushtron trysni të madhe duke aktivizuar Kushnerin dhe Witkoffin në Lindjen e Mesme, në Kiev dhe në Moskë.
Tregues tjetër është edhe hezitimi amerikan për të mos e furnizuar Kievin me sistemet tejet të nevojshme “Patriot“ që Trump e premtoi në Samitin e NATO-s në Ankara në korrik; mirëpo, mbrojtja kundërajrore pa to është “Thembra e Akilit“ për Ukrainën. Gjithashtu Trump i ka kërkuar Zelenskit të mos kryejë bombardime në rajone të caktuara ruse me rafineri nafte. Por sa do të realizohet ky armëpushim, kjo mbetet për t’u parë.
© 2026 Argumentum
