Presidenti Bajram Begaj u bëri thirrje deputetëve, në nisje të sesionit të ri parlamentar, të lënë pas ndarjet politike dhe të përqendrohen te dialogu, bashkëpunimi dhe interesat afatgjata të vendit.
Në mesazhin drejtuar Kuvendit, Begaj theksoi se një demokraci e konsoliduar nuk matet nga mungesa e dallimeve, por nga mënyra se si ato përballohen përmes debatit dhe argumentit. Ai vlerësoi gjithashtu protestën paqësore dhe shprehjen e lirë të mendimit si pjesë të natyrshme të jetës demokratike.
Sipas Presidentit, qytetarët presin nga Kuvendi më shumë cilësi në debat, ligjbërje dhe përfaqësim, ndërsa vendimmarrja parlamentare duhet të sjellë zgjidhje konkrete dhe të forcojë llogaridhënien e institucioneve.
Begaj vendosi në qendër të mesazhit rrugën evropiane të Shqipërisë, duke e cilësuar integrimin në Bashkimin Evropian si një projekt kombëtar që kërkon vazhdimësi, bashkëpunim dhe përgjegjësi të përbashkët.
“Rruga evropiane dhe orientimi ynë Euroatlantik janë pjesë e kësaj zgjedhjeje”, u shpreh Begaj, duke nënvizuar se reformat e integrimit duhet të shërbejnë njëkohësisht për ta bërë Shqipërinë më demokratike, më të drejtë dhe më funksionale.
Presidenti kërkoi që mazhoranca të përkthejë angazhimet në rezultate, opozita të ofrojë kontroll dhe alternativë, ndërsa institucionet e pavarura të veprojnë me profesionalizëm, transparencë dhe integritet.
Një pjesë e rëndësishme e mesazhit iu kushtua edhe reformës në drejtësi dhe luftës kundër korrupsionit dhe krimit të organizuar. Begaj vlerësoi rezultatet e SPAK-ut si një nga arritjet e rëndësishme të reformës, duke theksuar se synimi duhet të jetë një drejtësi e pavarur, e paanshme dhe eficiente, që ndihet në jetën e qytetarëve.
Në përmbyllje, kreu i shtetit apeloi për një sesion parlamentar që të forcojë institucionet dhe besimin e qytetarëve te politika dhe shteti.
MESAZHI I PRESIDENTIT TË REPUBLIKËS, SH. T. Z. BAJRAM BEGAJ, NË HAPJEN E SESIONIT TË RI PARLAMENTAR
Shtator 2026
Të nderuar deputetë,
Të nderuar qytetarë,
Në nisje të këtij sesioni të ri parlamentar, ju uroj punë të mbarë dhe suksese në përmbushjen e përgjegjësive ndaj vendit dhe qytetarëve!
Hapja e një sesioni të ri parlamentar është një moment për të reflektuar mbi rezultatet, për të identifikuar sfidat prioritare dhe për të programuar në mënyrë më efektive e institucionale punën e ardhshme.
Shqipëria është sot një vend me ambicie të mëdha dhe me një shoqëri që merr pjesë gjithnjë e më shumë në jetën publike. Qytetarët shprehen më hapur për pritshmëritë, shqetësimet dhe kërkesat e tyre. Kjo është pjesë e vitalitetit të një shoqërie demokratike dhe një tregues se demokracia jonë vazhdon të zhvillohet.
Në këtë kuptim, protesta paqësore dhe shprehja e lirë e mendimeve janë pjesë e natyrshme e jetës demokratike. Jo gjithmonë do të kemi të njëjtat qëndrime dhe jo çdo kërkesë mund të gjejë të njëjtën përgjigje.
Është inkurajuese kur zëri i qytetarëve gjen hapësirë në debatin publik dhe merr vëmendjen e institucioneve. Sfida jonë e përbashkët është që kjo energji qytetare dhe ky angazhim institucional të ushqejnë një dialog që forcon besimin dhe ndihmon në gjetjen e zgjidhjeve më të mira.
Të nderuar deputetë,
Një demokraci e konsoliduar nuk përcaktohet nga mungesa e dallimeve. Përkundrazi, ajo dallohet nga mënyra se si i përballon ato. Dallimet politike bashkëjetojnë me demokracisë dhe Kuvendi është vendi ku ato duhet të shprehen, të debatohen dhe të përballen me argumente.
Qytetarët kanë pritshmëri të larta ndaj Kuvendit për cilësinë e debatit, gjuhën politike, ligjbërjen dhe nivelin e përfaqësimit.
Kuvendi duhet të jetë institucioni ku qytetarët shohin se vendimmarrja parlamentare sjell zgjidhje konkrete: një Kuvend përfaqësues, funksional dhe llogaridhënës.
Interesat afatgjata të Shqipërisë kërkojnë një vizion përtej ndarjeve të ditës.
Siguria kombëtare, shteti i së drejtës, zhvillimi ekonomik dhe mirëqenia e qytetarëve, partneriteti strategjik me Shtetet e Bashkuara të Amerikës dhe Bashkimin Evropian, lufta kundër krimit të organizuar dhe korrupsionit, zgjedhjet dhe reforma territoriale, si dhe e ardhmja evropiane e vendit kërkojnë vazhdimësi dhe një ndjenjë përgjegjësie që i bashkon të gjitha forcat politike.
Të nderuar deputetë,
Shqipëria ka bërë një zgjedhje të qartë strategjike për të ardhmen e saj. Rruga evropiane dhe orientimi ynë Euroatlantik janë pjesë e kësaj zgjedhjeje. Rrugëtimi evropian është një projekt kombëtar, një proces i thellë ndryshimi shoqëror që kërkon vazhdimësi, bashkëpunim dhe përgjegjësi të përbashkët.
Në këtë projekt, secili mund të japë kontributin që i takon. Kuvendi, duke ushtruar plotësisht funksionin ligjvënës dhe mbikëqyrës; mazhoranca, duke i shndërruar angazhimet në rezultate; opozita, duke ofruar kontroll dhe alternativë; institucionet e pavarura, duke vepruar me profesionalizëm, transparencë, llogaridhënie dhe integritet; shoqëria civile, universitetet, media, sipërmarrja, rinia dhe Diaspora janë aktorë të domosdoshëm në këtë projekt.
Bashkimi Evropian nuk është vetëm një destinacion diplomatik apo një objektiv politik. Për qytetarët tanë, ai lidhet me besimin te reformat, me cilësinë e institucioneve dhe me sigurinë se ligji zbatohet për të gjithë.
Reformat që na ndihmojnë për të hyrë në Bashkimin Evropian janë reforma që e bëjnë Shqipërinë më demokratike, më të drejtë, më sociale, më funksionale dhe më krenare për qytetarët e saj.
Në këtë rrugëtim, konsolidimi i reformës në drejtësi mbetet një nga përgjegjësitë më të rëndësishme të shtetit shqiptar. Rezultatet e SPAK-ut janë një nga arritjet e saj më të rëndësishme. Reforma duhet të arrijë një drejtësi eficiente, me standarde evropiane dhe që ndihet në jetën e qytetarit. Një drejtësi e pavarur, e paanshme dhe me integritet është, para së gjithash, një garanci për qytetarin.
Të nderuar deputetë,
Shqipëria ka përpara saj objektiva të rëndësishme dhe shumë mundësi. Për t’i shfrytëzuar ato, kemi nevojë për bashkëpunim, angazhim, dialog, dhe për besimin se, edhe kur kemi dallime, jemi në gjendje të punojmë së bashku për atë që është në interes të vendit.
Mandatet dhe bindjet politike janë të ndryshme, por përgjegjësia ndaj Shqipërisë është e përbashkët.
Uroj që ky sesion parlamentar të jetë një periudhë bashkëpunimi në shërbim të Shqipërisë dhe të gjithë qytetarëve të saj: një sesion që afron Shqipërinë me Bashkimin Evropian, që forcon institucionet, që forcon besimin e qytetarëve te politika dhe shteti!
Ju uroj punë të mbarë dhe suksese!
© 2026 Argumentum
