Tensionet mes Rusisë dhe NATO-s janë përshkallëzuar në Baltik, pasi Moska i ka dërguar aleancës një paralajmërim se është e gatshme të përdorë të gjithë arsenalin e saj, përfshirë armët bërthamore, në rast se NATO do të përpiqej të izolonte Kaliningradin.
Rusia akuzon NATO-n për ndjekjen e një “kursi të rrezikshëm dhe të pamatur” dhe paralajmëron se një përballje mund të çojë në një konflikt të drejtpërdrejtë të armatosur. Moska përmend edhe mundësinë e goditjeve ndaj qendrave vendimmarrëse në vendet anëtare të NATO-s.
Paralajmërimi rus lidhet me pretendimin e Moskës se NATO po përgatit një bllokadë ajrore dhe detare të Kaliningradit, enklavës ruse në Detin Baltik, e vendosur mes Polonisë dhe Lituanisë, të dyja vende anëtare të aleancës.
Sekretari i Përgjithshëm i NATO-s, Mark Rutte, e hodhi poshtë këtë vlerësim dhe deklaroi se aleanca është mbrojtëse, ndërsa i kërkoi Rusisë të ndalë kërcënimet bërthamore. Rutte tha se nuk ka një kërcënim të menjëhershëm ndaj territorit të NATO-s nga Rusia dhe se vlerësimi i aleancës për kërcënimin rus nuk ka ndryshuar.
“Ne do të mbrojmë çdo centimetër të territorit të NATO-s”, deklaroi Rutte, duke shtuar se Rusia nuk mund ta fitojë një përballje të drejtpërdrejtë me aleancën.
Kaliningradi, pika e ndjeshme e Baltikut
Kaliningradi është një territor rus në brigjet e Detit Baltik, i ndarë gjeografikisht nga pjesa tjetër e Rusisë dhe i kufizuar nga Lituania në veri dhe lindje, Polonia në jug dhe Deti Baltik në perëndim. Pozicioni i tij e ka bërë prej dekadash një nga pikat më strategjike dhe më të militarizuara të Rusisë në Evropë.
Pozicioni i tij mes dy vendeve anëtare të NATO-s e bën Kaliningradin një nga pikat më të ndjeshme të përplasjes Rusi–NATO. Tensionet rreth rajonit janë rritur që prej pushtimit rus të Ukrainës në vitin 2022 dhe zgjerimit të pranisë së NATO-s në krahun lindor.
Sipas Reuters, një burim ushtarak perëndimor ka thënë se në gusht dhjetëra avionë të vendeve të NATO-s morën pjesë në një operacion të paparalajmëruar në hapësirën ajrore përreth Kaliningradit, duke demonstruar aftësinë për të ndërprerë lidhjet radio dhe radarike të enklavës, si dhe mbrojtjen e saj ajrore në rast konflikti.
NATO thotë se ka rritur praninë e saj në Detin Baltik edhe për shkak të shqetësimeve mbi sigurinë e infrastrukturës kritike nënujore të energjisë dhe komunikimeve. Aleanca i ka bërë thirrje Moskës të ndalë atë që e cilëson si “retorikë bërthamore të papërgjegjshme”.
Përplasja e re e retorikës vjen në një kohë kur marrëdhëniet Rusi–NATO mbeten në nivelin më të tensionuar të dekadave të fundit, ndërsa Kaliningradi shfaqet gjithnjë e më shumë si një pikë potenciale për një përshkallëzim të drejtpërdrejtë në Baltik.
© 2026 Argumentum
