Korridori VIII është një domosdoshmëri ekonomike, e sigurisë dhe evropiane, deklaroi sot në Sofje ministri për Evropën dhe Punët e Jashtme, Ferit Hoxha, i cili përfaqësonte Shqipërinë në Konferencën Ndërkombëtare Ministrore për Korridorin VIII.
Ai tha se ”gjeografia bëhet një aset strategjik vetëm kur vendet arrijnë të ndërtojnë lidhje me njëri-tjetrin”.
”Korridoret nuk janë thjesht rrugë dhe akse transporti, por përcaktojnë se cilat vende lidhen, si tregtojnë ato dhe cilit hapësirë më të gjerë i përkasin”, shtoi ai.
Hoxha vuri në dukje se Korridori VIII lidh Detin e Zi – përmes Varnës, Sofjes, Shkupit dhe Tiranës – me Italinë.
Ai theksoi tri dimensione kryesore të projektit.
”I pari është ai ekonomik. Ballkani Perëndimor nuk mund të jetë konkurrues pa një lidhshmëri më të mirë”, tha Hoxha, duke shtuar se Korridori VIII do të ndihmonte në uljen e kostove, përshpejtimin e tranzitit, tërheqjen e investimeve dhe krijimin e vendeve të punës.
Ai përmendi ndërtimin e hekurudhës Tiranë-Durrës-Aeroporti “Nënë Tereza” si shembull se Korridori VIII nuk është më thjesht një vijë në hartë, por po shndërrohet në një projekt konkret infrastrukturor.
”Dimensioni i dytë është ai evropian. Korridori VIII është pjesë e zgjerimit të Rrjetit Trans-Evropian të Transportit drejt Ballkanit Perëndimor”, tha Hoxha.
”Integrimi evropian bëhet i prekshëm për qytetarët kur udhëtimet janë më të shkurtra, kalimi i kufijve më i lehtë dhe bizneset mund të arrijnë tregjet evropiane brenda pak orësh në vend të disa ditëve”, shtoi ai.
”Dimensioni i tretë është siguria. Në botën e sotme, infrastruktura është gjithashtu gjeopolitikë”, tha Hoxha, duke vënë në dukje se lidhjet energjetike, të transportit dhe ato digjitale përcaktojnë shkallën e qëndrueshmërisë dhe pavarësisë së vendeve.
”Një korridor evropian i sigurt, që lidh vendet e rajonit dhe aleatët e NATO-s, forcon sigurinë e Evropës”, tha ai.
Hoxha theksoi se Korridori VIII do të përfundohej vetëm nëse të gjitha vendet do t’i përmbushnin angazhimet e tyre.
”Marrëveshjet politike duhet të përkthehen në financim, prokurim dhe zbatim në kohë të segmenteve individuale. Vonesat na kushtojnë në aspektin e konkurrueshmërisë, investimeve dhe besimit”, tha Hoxha.
”Shqipëria është e angazhuar për të përfunduar segmentet e saj dhe do të bashkëpunojë me vendet fqinje për lidhjet ndërkufitare”, shtoi ai.
”Shqipëria pret të njëjtën vendosmëri nga partnerët e saj evropianë, përfshirë vendime më të shpejta, financim të parashikueshëm dhe një angazhim të qartë për të gjithë korridorin”, tha Hoxha.
“Korridori VIII dikur ishte një ëndërr e hedhur në letër. Sot, ai është një angazhim”, theksoi ai.
© 2026 Argumentum
