Të enjten paradite u zhvillua në Pekin konferenca përkujtimore me rastin e 90-vjetorit të fitores së Marshimit të Madh të Ushtrisë së Kuqe të Punëtorëve dhe Fshatarëve. Në fjalimin e mbajtur në këtë takim, presidenti kinez Xi Jinping bëri thirrje për mbajtjen mend të historisë dhe për promovimin e frymës së Marshimit të Madh, për të arritur suksese të reja në udhëtimin e ri të Marshimit të Madh.
Në emër të Komitetit Qendror të PKK-së, Këshillit të Shtetit, Komisionit Qendror Ushtarak dhe popullit kinez të kombësive të ndryshme, Xi shprehu nderimin më të lartë për brezin e vjetër të revolucionarëve që udhëhoqën Marshimin e Madh, si Mao Ce Dun, Çu En Lai, Zhu De etj., për oficerët dhe ushtarët e Ushtrisë së Kuqe, për banorët e kombësive të ndryshme që e mbështetën Ushtrinë e Kuqe në Marshimin e Madh dhe për veteranët e Ushtrisë së Kuqe që ende jetojnë.
“Fitorja e Marshimit të Madh ka rëndësi të madhe për Partinë, vendin e ushtrinë tonë dhe ka ushtruar ndikim të thellë për rilindjen e kombit kinez,” tha Xi Jinping-u.
Ai theksoi se kujtimi i historisë ka për qëllim që të nxjerrë mençuri dhe forcë për përparimin. Marshimi i Madh fitoi nën udhëheqjen e PKK-së, në mënyrë të pavarur dhe me mbështetjen e masave popullore.
Xi Jinping vuri në dukje më tej se Marshimi i Madh i Ushtrisë së Kuqe krijoi një mrekulli njerëzore dhe brumosi frymën e madhe të Marshimit të Madh. Kjo frymë tregon plotësisht fuqinë e besnikërisë, së vërtetës, drejtësisë e bashkimit dhe është gjithmonë thesari e energjia për mposhtjen e vështirësive dhe për përparimin.
Xi u shpreh që gjatë 90 vjetëve që nga fitorja e Marshimit të Madh, PKK-ja e ka udhëhequr popullin kinez në arritjen e fitoreve të mëdha njëra pas tjetrës në periudha të ndryshme historike. Që nga Kongresi i 18-të Kombëtar i PKK-së, socializmi me karakteristika kineze ka hyrë në epokën e re. Me përpjekjet e përbashkëta të popullit kinez të kombësive të ndryshme, Objektivi i Qindvjetorit të Parë për ndërtimin e një shoqërie të begatë në të gjitha drejtimet është arritur sipas planit. Aktualisht ka nisur udhëtimi i ri për të ndërtuar një vend socialist modern në të gjitha drejtimet dhe për të arritur Objektivin e Qindvjetorit të Dytë, si edhe për të çuar përpara në mënyrë gjithëpërfshirëse rigjallërimin e madh të kombit kinez nëpërmjet modernizimit kinez.
Në vijim presidenti Xi vuri në dukje se udhëtimi i ri është një Marshim i ri i Madh plot me lavdi dhe ëndrra. Duhet të zbatohet plotësisht Mendimi për Socializmin me Karakteristika Kineze në Epokën e Re e të mbahet mend misioni fillestar, duke u mbështetur te populli për të arritur suksese të reja historike. Gjithashtu, duhet të nxitet zhvillimi cilësor, të plotësohen pandërprerë kërkesat në rritje të popullit për jetën e bukur, të arrihet rritja cilësore ekonomike dhe të promovohet pasurimi i përbashkët i njerëzve. Është e nevojshme që të përshpejtohet shndërrimi i Ushtrisë Popullore në një ushtrisë të klasit të parë botëror dhe të nxitet modernizimi i mbrojtjes kombëtare dhe i ushtrisë, si edhe të promovohet qeverisja e rreptë e Partisë dhe të sigurohet që PKK-ja të jetë gjithmonë thelbi i udhëheqjes së kauzës së socializmit me karakteristika kineze.
© 2026 Argumentum
