Nga 28 deri më 30 nëntor do të mbahet në Guangzhou të provincës Guangdong në Kinën Jugore Konferenca Botërore e Shkencave të Jetës 2026, njoftuan organizatorët të mërkurën në një konferencë shtypi.
Konferenca Botërore e Shkencave të Jetës është një nga veprimtaritë akademike ndërkombëtare më të njohura dhe me ndikim më të gjerë në komunitetin e shkencave të jetës në Kinë.
Nëpërmjet shkëmbimeve akademike në nivel të lartë dhe paraqitjes së arritjeve më të fundit shkencore, konferenca ka për qëllim të forcojë bashkëpunimin ndërkombëtar dhe të promovojë integrimin më të thellë midis inovacionit shkencor e industrial, duke trajtuar sfida si sëmundjet kryesore, plakjen e popullsisë, ndotjen e mjedisit dhe mungesën e burimeve.
Gao Fu, një nga kryetarët e Komitetit Shkencor dhe të Programit të konferencës dhe anëtar i Akademisë Kineze të Shkencave, i tha medias se në këtë veprimtari do të ketë dhjetë folës kryesorë, duke përfshirë gjashtë shkencëtarë të huaj fitues të çmimeve “Nobel”, “Lasker” e “Wolf”, dhe katër shkencëtarë nga Kina.
Konferenca gjithashtu do të përmbajë 33 sesione tematike. Më shumë se 200 shkencëtarë kanë pohuar pjesëmarrjen e tyre, duke përfshirë 40 akademikë, ndërsa pritet që numri i akademikëve pjesëmarrës ta kalojë 50.
Gjithashtu pritet që konferenca të eksplorojë bashkëpunimin më të ngushtë midis industrisë dhe qarqeve arsimore e shkencore me kompanitë në Guangdong, duke synuar të përshpejtojë shndërrimin e zbulimeve shkencore në aplikime reale dhe të mbështesë zhvillimin e industrive të shkencave të jetës dhe biofarmaceutikës në Zonën e Madhe të Gjirit Guangdong – Hong-Kong – Makao./cgtn
