Qeveria turke po kryen sulme kibernetike ndaj qeverive dhe organizatave të tjera në Europë dhe Lindjen e Mesme, ku mes ‘viktimave’ prestigjiozja “Reuters” përmend edhe Shqipërinë.
Hapurat, që sipas tre zyrtarëve të lartë, veprojnë në interes të qeverisë turke, kanë sulmuar të paktën 30 organizata duke përfshirë ministritë, ambasadat dhe shërbimet e sigurisë, si dhe kompanitë dhe grupet e tjera, sipas të dhënave të siguruara nga Reuters.
Mes viktimave është agjencia e inteligjencës shtetërore shqiptare dhe shërbimet e postës elektronike të qeverisë qipriote dhe greke, si dhe këshilltari i qeverisë irakiane për Sigurinë Kombëtare.
“Inteligjenca shtetërore shqiptare kishte qindra emra përdoruesish dhe fjalëkalimesh të komprometuar si rezultat i sulmeve kibernetike. Shërbimi Informativ i Shtetit Shqiptar tha se nga sulmet nuk janë prekur informacionet e klasifikuara si ‘sekret shtetëror’ apo të sigurisë së lartë të çdo niveli”, shkruan “Reuters”.
Sulmet kanë nisur nga fillimi i vitit 2018 sipas të dhënave të mbledhura nga regjistrimet në internet.
“Sulmet vënë në pah një paaftësi në një shtyllë thelbësore të infrastrukturës në internet, që mund t’i lënë viktimat të ekspozuar ndaj sulmeve që ndodhin jashtë rrjeteve të tyre dhe nga ana tjetër i bëjnë të vështirë për t’u zbuluar dhe për t’u mbrojtur. Hakerat përdorën një teknikë që përfshinte rregullimin e librit të adresave efektive të internetit, të quajtur Sistemi i Domain Name. Kjo metodë mundëson që kompjuterët të përputhen me adresat e internetit me serverin e duhur”, sqarohet në artikullin e Reuters. Sipas zyrtarëve, nuk është ende e qartë se cilët persona ose organizata specifike ishin përgjegjës. Por nisur nga fakti se të gjitha sulmet përdornin të njëjtët serverë ngre dyshime të forta se valët e sulmeve ishin urdhëruar nga qeveria.
