Presidenti Joe Biden miratoi dislokimin e afro 3,000 trupave amerikane në Evropën Lindore gjatë ditëve të ardhshme.
Pentagoni tha të mërkurën se ky veprim është një sinjal i gatishmërisë së Shteteve të Bashkuara për të mbrojtur aleatët e NATO-s.
Me dislokimin e këtyre trupave si edhe vendosjen e 8,500 trupave në gatishmëri të lartë muajin e kaluar për t’u dërguar në Evropë, nëse është e nevojshme, Shetet e Bashkuara synojnë të qetësojnë aleatët e NATO-s përballë grumbullimit të trupave ruse pranë Ukrainës.
Sipas një burimi që është në dijeni të detajeve, 1700 trupa do të vendosen në Poloni dhe 300 të tjerë në Gjermani. Rreth 1,000 trupa që ndodhen në Gjermani do të dërgohen në Rumani.
Pentagoni tha se nuk përjashtonte dërgimin e trupave të tjera, përveç atyre të njoftuara të mërkurën.
“Është e rëndësishme që t’i dërgojmë një sinjal të fortë zotit Putin dhe botës se NATO-ja është e rëndësishme për Shtetet e Bashkuara dhe për aleatët tanë,” tha zëdhënësi i Pentagonit John Kirby në një konferencë shtypi.
Rusia mohon se ka në plan të pushtojë Ukrainën. Por pasi ka rrethuar Ukrainën me forca nga veriu, lindja dhe jugu, Moska tani po përmend reagimin perëndimor si provë për deklarimet e saj se Rusia është objektivi dhe jo nxitësja e agresionit.
Pentagoni ripërsëriti paralajmërimet ndaj Rusisë, por shprehu shpresën se zoti Putin do të zgjidhte alternativën diplomatike.
“Nuk besojmë se ai ka marrë një vendim për të ndërhyrë më tej në Ukrainë,” tha zoti Kirby.
SHBA ka tashmë midis 75,000 dhe 80,000 trupa në Evropë si forca të stacionuara përgjithmonë dhe si pjesë e rotacioneve të rregullta në vend si Polonia.
Uashingtoni dhe Moska kanë qenë në mosmarrëveshje për Ukrainën, me pak shenja të një rruge diplomatike përpara.
Në komentet e tij të para publike në më shumë se një muaj, Putin akuzoi të martën SHBA-në dhe aleatët e saj për injorimin e kërkesave të sigurisë qendrore të Rusisë, por ai tha se Moska është e gatshme të flasë më shumë për të lehtësuar tensionet mbi Ukrainën.
Vërejtjet e tij sugjeruan se një pushtim i mundshëm rus mund të mos jetë i afërt dhe se të paktën një raund tjetër diplomacie ka të ngjarë.
Ukraina është duke luftuar me kryengritjet e mbështetura nga Moska në dy rajone separatiste që nga viti 2014, kur Moska aneksoi gadishullin e Krimesë.
Më shumë se 13,000 njerëz janë vrarë në luftimet, lufta e fundit e madhe e vazhdueshme në Evropë.
